ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

              ວັນທີ 17 ມີນາ 2022 ສະພາປະຊາຊົນແຂວງ ອຸດົມໄຊ ໄດ້ເປີດກອງປະຊຸມ ເຜີຍແຜ່, ແນະນຳວຽກງານ ສະພາປະຊາຊົນແຂວງອຸດົມໄຊ ຂື້ນ, ຢູ່ທີ່ຫ້ອງປະຊຸມອົງການໄອຍະການປະຊາຊົນແຂວງ, ໂດຍການເປັນປະທານຂອງທ່ານ ຄຳດີ ວົງລ້ອມ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງອຸດົມໄຊ ຊຸດທີ II, ໃຫ້ກຽດເຂົ້າຮ່ວມກອງປະຊຸມໂດຍມີທ່ານ ບຸນລອດ ອ່ອນພະຈັນ ອາດີດຮອງເລຂາຄະນະບໍລິຫານງານພັກແຂວງ, ອາດີດປະທານສະພາປະຊາຊົນແຂວງອຸດົມໄຊ ຊຸດທີ I, ມີບັນດາທ່ານສະມາຊິກສະພາປະຊາຊົນແຂວງ, ພະນັກງານຊ່ວຍວຽກຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 7 ເມືອງຂອງແຂວງອຸດົມໄຊ ແລະ ພະນັກງານຂະແໜງກ່ຽວຂ້ອງພາຍໃນ ສພຂ ເຂົ້າຮ່ວມຢ່າງພ້ອມພຽງ.
       ກອງປະຊຸມໄດ້ຮັບຟັງການສະເຫນີກ່ຽວກັບລະບຽບການດໍາເນີນກອງປະຊຸມສະພາປະຊາຊົນຂັ້ນແຂວງເຊັນ: ທັກສະການຊັກຖາມຕໍ່ກອງປະຊຸມສະພາປະຊາຊົນແຂວງ; ທັກສະການປະກອບຄໍາເຫັນຕໍ່ກອງປະຊຸມສະພາປະຊາຊົນແຂວງ; ການພົບປະປະຊາຊົນຂອງສະມາຊິກສະພາປະຊາຊົນແຂວງ; ການຮັບຟັງ, ການຕອບ-ຊີ້ແຈງ ແລະ ການສັງລວມຄໍາສະເໜີຂອງປະຊາຊົນ; ສະເໜີໂດຍທ່ານ ບຸນລອດ ອ່ອນພະຈັນອາດີດຮອງເລຂາຄະນະບໍລິຫານງານພັກແຂວງ, ອາດີດປະທານສະພາປະຊາຊົນແຂວງອຸດົມໄຊ ຊຸດທີ I, ພ້ອມນັ້ນກອງປະຊຸມຍັງໄດ້ຮັບຟັງການສະເໜີກ່ຽວກັບການຄົ້ນຄວ້າ ແລະ ການແກ້ໄຂ ຄໍາຮ້ອງທຸກຂອງຜົນລະເມືອງທີ່ຢືນເຖິງສະພາປະຊາຊົນແຂວງ ແລະ ກ່ຽວກັບຂັ້ນຕອນການສ້າງນິຕິກຳໃຕ້ກົດໝາຍ(ຂໍ້ຕົກລົງຂອງທ່ານເຈົ້າແຂວງ) ສະເໜີໂດຍທ່ານ ທອງຄານ ວັດສະດາກອນ ປະທານຄະນະກຳມະການ ຍຸຕິທຳ ແລະ ປ້ອງກັນຊາດ-ປ້ອງກັນຄວາມສະຫງົບ ສພຂ ແລະ ໄດ້ຮັບຟັງການສະເໜີກ່ຽວກັບວຽກງານການເປັນເສນາທິການ ໃຫ້ແກ່ສະມາຊິກສະພາປະຊາຊົນແຂວງ ສະເໜີໂດຍ: ທ່ານ ຄຳພວງ ເດດກົງພົນ ຮອງເລຂາທິການ ສພຂ.

     ຈາກນັ້ນກອງປະຊຸມໄດ້ເປີດກວ້າງໃຫ້ຜູ້ເຂົ້າຮ່ວມມີຄໍາຄິດຄຳເຫັນ; ສົນທະນາແລກປ່ຽນ ຕໍ່ກັບບັນດາເນື້ອໃນຕ່າງໆ ທີ່ນໍາເຂົ້າຜ່ານໃນກອງປະຊຸມຄັ້ງນີ້ ເພື່ອເຮັດໃຫ້ການປະກອບຄຳຄິດເຫັນໃນກອງປະຊຸມສະໄໝສາມັນແຕ່ລະຄັ້ງ, ການມີຄໍາຄິດໃນເວລາລົງພົບປະປະຊາຊົນແຕ່ລະຄັ້ງ ຂອງສະມາຊິກສະພາປະຊາຊົນແຂວງ ໃຫ້ຖືກຕ້ອງສອດຄອງກັບສະພາບຄວາມເປັນຈິງ, ຖືກຕາມຫລັກການ ແລະ ບະບຽບການ, ຕາມພາລະບົດບາດ, ສິດ ແລະ ໜ້າທີ່ຂອງ ສສຂ ທີ່ໄດ້ກຳນົດໄວ້ໃນກົດໝາຍວ່າດ້ວຍສະພາປະຊາຊົນຂັ້ນແຂວງ, ກອງປະຊຸມດັ່ງກ່າວ ໄດ້ດຳເນີນໄປເຖິງວັນພະຫັດທີ 18 ມີນາ 2022 ຈຶ່ງຈະສໍາເລັດ.

📸✍: ແສງພອນ ອິນນະລົງ.