ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍ ວັນທີ 28 ກໍລະກົດ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດກອງ​ປະ​ຊຸມ ສະ​ຫຼຸບຕີລາຄາ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ປະຈໍາ 6 ເດືອນ​ຕົ້ນ​ປີ ແລະ ແຜນ​ການ 6 ເດືອນ​ທ້າຍ​ປີ 2022 ຂອງ​ຄະ​ນະ​ກຳ​ມະ​ການ​ເສດ​ຖະ​ກິດ, ແຜນ​ການ ແລະ ການ​ເງິນ (ຄສຜງ) ໂດຍການເປັນປະທານ ທ່ານ ນາງ ຈັນມະນີ ດວງພາສຸກ ປະທານ ຄສຜງ; ເປັນກຽດເຂົ້າຮ່ວມໂດຍທ່ານ ສົມຈິດ ຫັບລະກອນ ຮອງປະທານຄະນະປະຈໍາສະພາປະຊາຊົນແຂວງ (ຜູ້ຊີ້ນໍາວຽກງານ ຄສຜງ); ມີບັນດາທ່ານປະທານ, ຮອງປະທານຄະນະກໍາການ ສພຂ, ເລຂາທິການ ສພຂ, ຫົວໜ້າ, ຮອງຫົວໜ້າຂະແໜງ ແລະ ພະນັກງານ-ລັດຖະກອນພາຍໃນ ຄສຜງ ເຂົ້າຮ່ວມ.

ທີ່ກອງປະຊຸມໄດ້ຮັບຟັງ ທ່ານ ສຸວັນຟູ ລາວ ຮອງປະທານ ຄສຜງ ຂຶ້ນຜ່ານບົດສະ​ຫຼຸບ​ການ​ຈັດ​ຕັ້ງ​ປະ​ຕິ​ບັດ​ວຽກ​ງານ​ປະຈໍາ 6 ເດືອນ​ຕົ້ນ​ປີ ແລະ ແຜນ​ການ 6 ເດືອນ​ທ້າຍ​ປີ 2022  ຂອງ​ ຄສຜງ; ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາເຫັນຕໍ່ເນື້ອໃນ ດັ່ງກ່າວເພື່ອປັບປຸງເນື້ອໃນໃຫ້ມີຄວາມອຸດົມສົມບຸນ, ທັງຮັບປະກັນໃຫ້ທິດທາງແຜນການ ມີຄວາມຮັດກຸມ ແລະ ສາມາດນໍາໄປຈັດຕັ້ງປະຕິບັດໃນຕໍ່ໜ້າໄດ້ ຢ່າງມີປະສິດທິພາບ, ປະສິດທິຜົນ.

ໃນໂອກາດດຽວກັນນີ້ ທ່ານ ສົມຈິດ ຫັບລະກອນ ໃຫ້ກຽດໂອລົມຕໍ່ກອງປະຊຸມ ເຊິ່ງກ່ອນອື່ນທ່ານ ກໍໄດ້ກ່າວຍ້ອງຍໍຊົມເຊີຍຕໍ່ຜົນງານທີ່ ຄສຜງ ຍາດມາໄດ້ໃນໄລຍະຜ່ານມາ ແລະ ເພື່ອເປັນທິດໃນການເຄື່ອນໄຫວວຽກງານໃນຕໍ່ໜ້າທ່ານໄດ້ເໜັ້ນໜັກບາງບັນຫາ ເປັນຕົ້ນ: “ສືບຕໍ່ປັບປຸງບັນດາເນື້ອໃນບົດສະຫຼຸບ ປະຈໍາ 6 ເດືອນຕົ້ນປີ ແລະ ແຜນ 6 ເດືອນທ້າຍປີ 2022 ໃຫ້ຖືກຕ້ອງສອດຄ່ອງ ແລະ ພາວະວີໄສ; ເພີ່ມທະວີການຊີ້ນຳ-ນຳພາ ໂດຍສະເພາະດ້ານການເມືອງແນວຄິດໃຫ້ພະນັກງານ-ລັດຖະກອນ ໃນການຄົ້ນຄ້ວາ, ເຊື່ອມຊືມ, ກຳແໜ້ນແນວທາງນະໂຍບາຍຂອງພັກລັດ, ບັນດາກົດໝາຍ ແລະ ບັນດານິຕິກຳຕ່າງໆ ພ້ອມທັງຍົກສູງການກຳແໜ້ນທີ່ຕັ້ງ, ພາລະບົດ, ສິດ ແລະ ໜ້າທີ່ຂອງ​ຄະ​ນະ​ກຳ​ມະ​ການຕົນຢ່າງເລິກເຊີງ; ປັບປຸງແບບແຜນວິທີເຮັດວຽກ ແລະ ເປັນເຈົ້າການຍົກສູງສະຕິ​ຄວາມຮັບຜິດຊອບຕໍ່ໜ້າທີ່ການເມືອງຂອງຕົນ ໂດຍອີງໃສ່​​ທີ່ຕັ້ງ, ພາລະບົດບາດ ແລະ ຂອບເຂດສິດໜ້າທີ່ ຂອງ​ຄະ​ນະ​ກຳ​ມະ​ການທີ່ກຳນົດໄວ້ໃນກົດໝາຍ ວ່າດ້ວຍສະພາປະຊາຊົນແຂວງ; ເພີ່ມ​ທະວີ​ຄວາມ​ສາມັກຄີ​ພາຍ​ໃນ​ໃຫ້​ແໜ້ນ​ແຟ້ນ; ເອົາໃຈໃສ່ຕິດຕາມ, ກວດກາ, ປະເມີນຜົນການຈັດຕັ້ງປະຕິບັດວຽກງານ ຂອງພະນັກກງານ-ລັດຖະກອນ ພາຍໃນຄະນະກໍາມະການ ແລະ  ເປັນເຈົ້າການປະສານສົມທົບ ແລະ ຊຸກຍູ້ບັນດາຂະແໜງການຂອງແຂວງ ໃນການກະກຽມ ແລະ ດຳເນີນກອງປະຊຸມສະໄໝສາມັນ ເທື່ອທີ 3  ທີ່ຈະໄຂຂຶ້ນມໍໆນີ້”.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ