ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

          ໃນວັນທີ 20 ພຶດສະພາ 2022 ນີ້ ຢູ່ທີ່ຫ້ອງປະຊຸມສະພາປະຊາຊົນແຂວງ ໄດ້ຈັດກອງປະຊຸມວຽກງານຄະນະເລຂາທິການ ສະພາປະຊາຊົນແຂວງ ບໍລິຄໍາໄຊ ປະຈໍາປີ 2021 ຂຶ້ນ ໂດຍການເປັນປະທານຂອງ ທ່ານນາງ ຟອງສະໝຸດ ພົງວິຈິດ ກຳມະການພັກແຂວງ, ເລຂາທິການສະພາປະຊາຊົນແຂວງ, ໃຫ້ກຽດເຂົ້າຮ່ວມ ຂອງທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ, ປະທານສະພາປະຊາຊົນແຂວງ ມີ ບັນດາທ່ານ ຄະນະປະຈໍາສະພາປະຊາຊົນແຂວງ, ປະທານ ຄະນະ ສະມາຊິກສະພາປະຊາຊົນແຂວງ ປະຈໍາເຂດເລືອກຕັ້ງເມືອງ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ກອງປະຊຸມໄດ້ຮັບຟັງການລາຍງານການເຄື່ອນໄຫວວຽກງານແຕ່ກອງປະຊຸມຄັ້ງປະຖົມມະລືກຂອງສະພາປະ ຊາຊົນແຂວງບໍລິຄໍາໄຊ ຊຸດທີ II ແລະ ທິດທາງແຜນການ ປະຈໍາປີ 2022 ຂອງຄະນະເລຂາທິການສະພາປະຊາຊົນແຂວງ ເຊີ່ງຄະນະເລຂາທິການກໍ່ໄດ້ເອົາໃຈໃສ່ເຄື່ອນໄຫວວຽກງານຕາມພາລະບົດບາດ, ສິດ ແລະ ໜ້າທີ່ຂອງຕົນ ໃນຖານະທີ່ເປັນເສນາທິການໃຫ້ແກ່ສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ໃນການຄົ້ນຄວ້າ-ສັງລວມເນື້ອໃນວຽກງານຮອບດ້ານ; ສ້າງສິ່ງອໍານວຍຄວາມສະດວກໃຫ້ແກ່ການເຄື່ອນ ໄຫວວຽກງານ ຂອງສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ ແລະ ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ; ຄຸ້ມຄອງວຽກງານບໍລິຫານ, ແຜນການ ແລະ ການເງິນ, ພ້ອມນີ້ ຍັງໄດ້ປັບປຸງແບບແຜນວິທີເຮັດວຽກ, ມີການແບ່ງງານແບ່ງຄວາມຮັບຜິດຊອບ ຢ່າງຈະແຈ້ງ, ປະສານສົມທົບກັບຫ້ອງວ່າການແຂວງ, ພາກສ່ວນທີ່ກ່ຽວຂ້ອງ ແຕ່ລະໄລຍະເປັນຢ່າງດີ,ເຊີ່ງໄດ້ຍົກໃຫ້ເຫັນບາງວຽກງງານທີ່ພົ້ນເດັ່ນ ໄດ້ພິຈາລະນາ, ຮັບຮອງເອົາບັນຫາທີ່ສຳຄັນຕ່າງໆ ຕາມການສະເໜີຂອງອົງການປົກຄອງແຂວງ ແລະ ສະພາປະຊາຊົນແຂວງ ຕາມຂອບເຂດສິດ ແລະ ໜ້າທີ່ ໄດ້ທັງໝົດ 17 ຄັ້ງ, ສ້າງ ແລະ ປັບປຸງນິຕິກໍາຂອງສະພາປະຊາຊົນແຂວງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຂອງຕົນ ແລະ ນິຕິກໍາອື່ນໆ ໄດ້ທັງໝົດ 20 ກວ່າສະບັບ, ສ້າງແຜນໃຫ້ສະມາຊິກສະພາແຫ່ງຊາດ, ສະມາຊິກສະພາປະຊາຊົນແຂວງ ລົງພົບປະ-ປະຊາຊົນ ແລະ ໂຄສະນາເຜີຍແຜ່ຜົນສຳເລັດຂອງກອງປະ ຊຸມຄັ້ງປະຖົມມະລືກ ແລະ ກອງປະຊຸມສະໄໝສາມັນ ເທື່ອທີ 2 ຂອງສະພາແຫ່ງຊາດ ຊຸດທີ IX ແລະ ສະພາປະ ຊາຊົນແຂວງ ຊຸດທີ II, ຜ່ານການຈັດຕັ້ງປະຕິບັດ ສາມາດໄດ້ 118 ຈຸດ, ໃນນີ້ 4 ສໍານັກເມືອງ; ມີ 4 ກົມກອງ, 3 ໂຮງຮຽນ ແລະ 107 ບ້ານ  ມີຜູ້ເຂົ້າຮ່ວມຮັບຟັງ  8.566 ຄົນ, ຍິງ 4.313 ຄົນ, ຈັດຕັ້ງປະຕິບັດວຽກງານສື່ມວນຊົນ ໃນການໂຄສະນາເຜີຍແຜ່ພາລະບົດບາດ, ສິດ ແລະ ໜ້າທີ່ ແລະ ການເຄື່ອນໄຫວວຽກງານຂອງສະພາປະຊາຊົນແຂວງ, ຄະນະປະຈໍາສະພາປະຊາຊົນແຂວງ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ຜ່ານສື່ມວນຊົນ ອອກຂ່າວທາງວິທະຍຸ, ໂທລະພາບ, ໜັງສືພີມ, ສື່ສັງຄົມອອນລາຍ (ເຟດບຸກ), ດໍາເນີນລາຍການຜູ້ແທນປະຊາຊົນ ຜ່ານວິທະຍຸກະຈາຍສຽງແຂວງ ໃນຕອນເຊົ້າເວລາ 8:00 ໂມງ, ຂອງທຸກໆວັນພະຫັດ.

ກອງປະຊຸມ ຍັງໄດ້ຮັບຟັງການລາຍງານກ່ຽວກັບບາງມາດຕາ ຂອງຂໍ້ຕົກລົງຮ່ວມ ວ່າດ້ວຍການປະສານງານລະຫວ່າງຄະນະເລຂາທິການສະພາປະຊາຊົນແຂວງກັບຫ້ອງວ່າການແຂວງບໍລິຄໍາໄຊ, ການເປັນເສນາທິການໃຫ້ແກ່ອົງການປົກຄອງແຂວງ ໃນການກະກຽມບັນດາເນື້ອໃນທີ່ຈະນໍາເຂົ້າມາຄົ້ນຄວ້າພິຈາລະນາຮັບຮອງໃນກອງປະຊຸມສະພາປະຊາຊົນແຂວງ, ກອງປະຊຸມສະໃໝສາມັນ, ກອງປະຊຸມຄະນະປະຈໍາສະພາປະຊາຊົນແຂວງ, ວຽກງານພາຍຫຼັງສ້າງຕັ້ງໜ່ວຍງານຊ່ວຍວຽກຂອງຄະນະສະມາຊິກສະພາປະຊາຊົນແຂວງປະຈໍາເມືອງວຽງທອງ, ເພື່ອເປັນການສະຫລຸບຕີລາຄາການເຄື່ອນໄຫວວຽກງານປະຈໍາປີ 2021  ແລະ ວາງທິດທາງແຜນການ ປະຈໍາປີ 2022 ຂອງຄະນະເລຂາທິການສະພາປະຊາຊົນແຂວງ, ຜູ້ແທນກອງປະຊຸມ ປະກອບຄໍາຄິດຄໍາເຫັນຕາມຄໍາເຈາະຈີ້ມຂອງປະທານ ກອງປະຊຸມ ແລະ ໃຫ້ຄວາມກະຈ່າງແຈ້ງເພີ່ມເຕີມຕໍ່ວຽກງານຂອງຄະນະເລຂາທິການສະພາປະຊາຊົນແຂວງຈໍານວນໜຶ່ງ ພ້ອມທັງສັງ ລວມການປະກອບຄໍາເຫັນ

ພ້ອມນີ້, ໃນຕອນທ້າຍຂອງກອງປະຊຸມ ຍັງໄດ້ຮັບຟັງການໂອ້ລົມຈາກ ທ່ານ ປອ ສຸວັນນີ ໄຊຊະນະ ຮອງເລຂາພັກແຂວງ ປະທານສະພາປະຊາຊົນແຂວງ ໂດຍທ່ານໄດ້ເນັ້ນໜັກໃຫ້ສືບຕໍ່ຈັດຕັ້ງຜັນຂະຫຍາຍແຜນການ 5 ປີ ຂອງສະພາປະຊາຊົນແຂວງ ແລະ ຂອງຄະນະເລຂາທິການສະພາປະຊາຊົນແຂວງ ມາເປັນແຜນງານ, ໂຄງການອັນລະອຽດໃນແຕ່ລະໄລຍະ ແນໃສ່ເຮັດໃຫ້ທິດທາງ ແລະ ຄາດໝາຍລວມໄດ້ຮັບການຈັດຕັ້ງປະຕິບັດມີຜົນສໍາເລັດຕາມແຜນການກໍານົດໄວ້, ສືບຕໍ່ເອົາໃຈໃສ່ແກ້ໄຂບັນດາຂໍ້ຄົງຄ້າງໃນໄລຍະຜ່ານມາໃຫ້ມີການຫັນປ່ຽນຢ່າງຕັ້ງໜ້າ ແລະ ມີລັກສະນະບຸກທະລຸຢ່າງແຂງແຮງຂຶ້ນກວ່າເກົ່າທັງ 4 ດ້ານ ໂດຍສະເພາະແມ່ນ ບຸກທະລຸທານດ້ານຈິນຕະນາການ, ລະບຽບການບໍລິຫານ ແລະ ການພັດທະນາຊັບພະຍາກອນະນຸດ ໃນຂົງເຂດວຽກງານຂອງຕົນ.

ຂ່າວ ແລະ ພາບ ໂສລະຢ໋າ ໄຊຍະວົງ