ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມ ປະຈໍາປີ 2022 ຂອງຄະນະເລຂາທິການ ສພຂ ສາລະວັນ

​ພ.ຈ. 23, 2022 | ເຂດ 14 ສາ​ລະ​ວັນ

(ສພຂ) ກອງປະຊຸມ ສະຫຼຸບປະຈໍາປີ 2022 ຂອງຄະນະເລຂາທິການ ສະພາປະຊາຊົນແຂວງ (ຄລສຂ) ສາລະວັນ ໄຂຂຶ້ນຢ່າງເປັນທາງການ ດ້ວຍຮູບແບບກອງປະຊຸມເຊິ່ງໜ້າ ແລະ ຮູບແບບທາງໄກ ໃນຕອນເຊົ້າຂອງວັນທີ 22 ພະຈິກ ນີ້, ຢູ່ທີ່ຫ້ອງປະຊຸມສະພາປະຊາຊົນແຂວງ (ສພຂ) ສາລະວັນ; ໂດຍການເປັນປະທານກອງປະຊຸມຂອງທ່ານ ສົມພອນ ແສງສຸລິຈັນ ຄະນະປະຈໍາ ເລຂາທິການ ສພຂ, ເຂົ້າຮ່ວມມີຄະນະກຳມະການ, ຄະນະເລຂາທິການ, ບັນດາທ່ານສະມາຊິກສະພາປະຊາຊົນແຂວງ (ສສຂ) ອ້ອມຂ້າງແຂວງ ແລະ ປະຈໍາເຂດເລືອກຕັ້ງປະຈໍາເມືອງທົ່ວແຂວງ ເຂົ້າຮ່ວມຮູບແບບວິດີໂອທາງໄກ ຕະຫຼອດຮອດພະນັກງານ-ລັດຖະກອນ ພາຍໃນ ສພຂ ເຂົ້າຮ່ວມໃນຄັ້ງນີ້.

ກອງປະຊຸມໄດ້ຮັບຟັງ ການຜ່ານຮ່າງບົດສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2022 ແລະ ແຜນການເຄື່ອນໄຫວວຽກງານ ປະຈໍາປີ 2023 ຂອງ ຄລສຂ ຜ່ານໂດຍທ່ານ ສະນັ່ນ ພິມພິສານ ຮອງເລຂາທິການ ສພຂ ໃຫ້ຮູ້ວ່າ: ຕະຫຼອດໄລຍະ 1 ປີຜ່ານມາ ຄລສຂ ໄດ້ເອົາໃຈໃສ່ສຶກສາອົົບຮົມການເມືອງ-ແນວຄິດ ໃຫ້ສະມາຊິກພັກ ພະນັກງານ-ລັດຖະກອນ ດ້ວຍຫຼາຍຮູບການ ເຮັດໃຫ້ພະນັກງານ-ລັດຖະກອນ ມີຄວາມເຂົ້າໃຈຢ່າງເລິກເຊິ່ງ  ແລະ  ເຊື່ອໝັ້ນຕໍ່ການນຳພາຂອງພັກ, ມີທັດສະນະຫຼັກໝັ້ນການເມືອງໜັກແໜ້ນ ມີຄວາມອຸ່ນອ່ຽງ, ທຸນທ່ຽງ ເອົາໃຈໃສ່ປະຕິບັດໜ້າທີ່ ຂອງຕົນດ້ວຍຄວາມຮັບຜິດຊອບສູງ ແລະ ເຮັດໃຫ້ວຽກງານມີປະສິດທິຜົນ ແລະ ປະສິດທິພາບສູງ; ສຳລັບວຽກງານວິຊາສະເພາະ: ໄດ້ເອົາໃຈໃສ່ປະສານສົມທົບກັບພາກສ່ວນທີ່ກ່ຽວຂ້ອງ ຮັບໃຊ້ກອງປະຊຸມຮ່ວມລະຫວ່າງ ສພຂ ແລະອົງການປົກຄອງແຂວງ ຈາໍນວນ 2 ຄັ້ງ; ຮັບໃຊ້ກອງປະຊຸມສະໄໝສາມັນ 2, 3 ຂອງ ສພຂ ໃນນັ້ນໄດ້ສັງລວມການຊັກຖາມຂອງ ສສຂ ທີ່ໄດ້ຊັກຖາມໃນກອງປະຊຸມສະໄໝສາມັນ 2, 3 ມີຈໍານວນ 61 ເທື່ອຄົນ ມີ 67 ຄັ້ງ ແລະ ພະແນກການອົງການຂຶ້ນຊີ້ແຈງ 17 ພາກສ່ວນ; ສັງລວມບັນດາມະຕິກອງປະຊຸມສະໄໝສາມັນ ຈໍານວນ 15 ສະບັບ, ໄດ້ປະສານສົມທົບກັບຂະແໜງການກ່ຽວຂ້ອງຂອງ ສພຂ ໃນການແກ້ໄຂເນື້ອໃນໂທລະສັບສາຍດ່ວນ ກອງປະຊຸມສະໄໝສາມັນ ທີ່ສະພາແຫ່ງຊາດ (ສພຊ) ສົ່ງເຖິງ ສພຂ ມີ 6 ສາຍ, 6 ຄໍາສະເໜີ ຕໍ່ກັບຄໍາສະເໜີໄດ້ອອກແຈ້ງການໃຫ້ພາກສ່ວນກ່ຽວຂ້ອງນໍາໄປຄົ້ນຄວ້າແກ້ໄຂໄດ້ສໍາເລັດ; ໄດ້ອໍານວຍຄວາມສະດວກໃຫ້ ຄະນະປະຈໍາ ສະພາປະຊາຊົນແຂວງ (ຄຈສຂ) ຈັດກອງປະຊຸມທາບທາມຮ່າງກົດໝາຍ ທີ່ ສພຊ ສົ່ງໃຫ້ 3 ຄັ້ງ, ຈໍານວນ 09 ສະບັບ ແລະ ເຂົ້າຮ່ວມທາບທາມຮ່າງກົດໝາຍ ທັງພາຍໃນ ແລະ ຕ່າງແຂວງ; ເປັນເສນາທິການສັງລວມເນື້ອໃນ ຮັບຮອງເອົາບັນຫາສໍາຄັນຂອງແຂວງ ອອກເປັນມະຕິກອງປະຊຸມຂອງ ຄຈສຂ ຈໍານວນ 9 ສະບັບ ແລະ ນອກນັ້ນກໍ່ຍັງໄດ້ເອົາໃຈໃສ່ວຽກງານຈັດຕັ້ງ-ພະນັກງານ, ວຽກງານກວດກາ, ວຽກນະໂຍບາຍ, ວຽກສື່ມວນຊົນ, ໄອທີ, ວຽກງານການຕ່າງປະເທດ ແລະ ວຽກງານອື່ນໆ;

ຈາກນັ້ນ, ບັນດາຜູ້ເຂົ້າຮ່ວມກອງປະຊຸມ ໄດ້ພ້ອມກັນຄົ້ນຄວ້າປະກອບຄຳຄິດຄຳເຫັນຢ່າງກົງໄປກົງມາ ບົນພື້ນຖານຄວາມຮັບຜິດຊອບ ເຂົ້າໃສ່ຮ່າງບົດສະຫຼຸບຕີລາຄາການເຄື່ອນໄຫວວຽກງານ ປະຈໍາປີ 2022 ແລະ ແຜນການເຄື່ອນໄຫວວຽກງານ ປະຈໍາປີ 2023 ຂອງ ຄລສຂ ທັງນີ້ເພື່ອແນ່ໃສ່ໃຫ້ເນື້ອໃນມີຄວາມຖືກຕ້ອງ ຄົບຖ້ວນ, ເໝາະສົມ, ແລະ ທັງເຮັດໃຫ້ວຽກງານການເປັນເສນາທິການໃຫ້ແກ່ ສພຂ ໃຫ້ມີຄວາມແທດເໝາະກົມກຽວ ແລະ ເປັນຈະບ່ອນອີງໃຫ້ແກ່ ຄລສຂ ສືບຕໍ່ການຈັດຕັ້ງປະຕິບັດໜ້າທີ່ວຽກງານຕາມພາລະບົດບາດ, ສິດ ແລະ ໜ້າທີ່ ເປັນໄປຕາມແຜນການທີ່ວາງໄວ້ ໃຫ້ມີຜົນສຳເລັດຕາມລະດັບຄາດໝາຍ.

ຕອນທ້າຍ ທ່ານ ສົມພອນ ແສງສຸລິຈັນ ໄດ້ໂອ້ລົມ ແລະ ຊີ້ນຳ ຕໍ່ວຽກງານຂອງ ຄລສຂ ກ່ອນອື່ນທ່ານ ໄດ້ສະແດງຄວາມຍ້ອງຍໍ ແລະ ຊົມເຊີຍຢ່າງສຸດໃຈ ຕໍ່ໝາກຜົນໆງານຫຼາຍດ້ານ ທີ່ ຄລສຂ ສາມາດຍາດມາໄດ້ໄລຍະໜຶ່ງປີຜ່ານມາ; ຕໍ່ຜົນສຳເລັດດັ່ງກ່າວ ຍັງມີວຽກງານທີ່ສຳຄັນທີ່ຕ້ອງສືບຕໍ່ຄົ້ນຄວ້າຫັນເອົາມະຕິຂອງ ສພຂ, ຄຈສຂ ມາເປັນແຜນການ, ໂຄງການ ແລະ ກິດຈະກໍາລະອຽດ ເພື່ອຈັດຕັ້ງປະຕິບັດເປັນແຕ່ລະໄລຍະ ເຮັດໃຫ້ການເຄື່ອນໄຫວວຽກງານຂອງ ຄລສຂ ໃນປີ 2023 ບັນລຸຕາມລະດັບຄາດໜາຍ ແລະ ທ່ານຍັງໄດ້ຮຽກຮ້ອງໃຫ້ຜູ້ເຂົ້າຮ່ວມກອງປະຊຸມຄັ້ງນີ້ ຈົ່ງນໍາເອົາເນື້ອໃນຈິດໃຈຂອງກອງປະຊຸມນຳໄປຈັດຕັ້ງຜັນຂະຫຍາຍ ໃຫ້ເປັນແຜນການອັນລະອຽດ  ເພື່ອຈັດຕັ້ງປະຕິບັດໃຫ້ມີປະສິດທິຜົນ.

ພາບ-ຂ່າວ: ດີລຳພົນ ພົມມະຈັນ