ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າ ວັນທີ 21 ຕຸລາ 2022 ສະພາປະຊາຊົນແຂວງໄດ້ຈັດກອງປະຊຸມ ເພື່ອຕິດຕາມກວດກາ ຜົນການປະເມີນການຈັດຕັ້ງປະຕິບັດກົດໝາຍ ໃນຂົງເຂດຍຸຕິທໍາ ຈໍານວນ 04 ສະບັບ ທີ່ຫ້ອງປະຊຸມໃຫຍ່ຂອງສະພາປະຊາຊົນແຂວງຜົ້ງສາລີ ໂດຍການເປັນປະທານຂອງ ທ່ານ ສົມຈິດ ຫັບລະກອນ ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 2, ມີບັນດາທ່ານຄະນະປະຈໍາສະພາປະຊາຊົນແຂວງ, ບັນດາທ່ານຮອງປະທານຄະນະກໍາມະການ, ຮອງເລຂາທິການສະພາປະຊາຊົນແຂວງ, ບັນດາທ່ານຕາງໜ້າຈາກອົງການກວດກາລັດແຂວງ, ກອງບັນຊາການປກຊ, ກອງບັນຊາການ ປກສ ແຂວງ, ຫ້ອງວ່າການແຂວງ, ພະແນກຍຸຕິທໍາແຂວງ ແລະ ພະນັກງານວິຊາການທີ່ກ່ຽວຂ້ອງພາຍໃນສະພາປະຊາຊົນແຂວງ ເຂົ້າຮ່ວມ

 

ໃນກອງປະຊຸມ, ໄດ້ຮັບຟັງ ທ່ານ ພູເງິນ ສີຫາບຸດ ຮອງປະທານສານປະຊາຊົນແຂວງ ຂຶ້ນລາຍງານຜົນການປະເມີນການຈັດຕັ້ງປະຕິບັດກົດໝາຍວ່າດ້ວຍສານປະຊາຊົນ ແລະ ກົດໝາຍວ່າດ້ວຍການດໍາເນີນຄະດີແພ່ງ; ຮັບຟັງທ່ານ ຄໍາໄຊ ສູນວິເລີດ ຫົວໜ້າອົງການໄອຍະການປະຊາຊົນແຂວງ ລາຍງານຜົນການປະເມີນການຈັດຕັ້ງປະຕິບັດກົດໝາຍວ່າອົງການໄອຍະການປະຊາຊົນ ແລະ ກົດໝາຍວ່າດ້ວຍການດໍາເນີນຄະດີອາຍາ. ຫຼັງຈາກນັ້ນ, ຜູ້ເຂົ້າຮ່ວມກອງປະຊຸມກໍ່ໄດ້ປະກອບຄໍາຄິດຄໍາເຫັນ ຕາມຄໍາຖາມເຈາະຈີ້ມຂອງສະພາປະຊາຊົນແຂວງ ທັງນີ້, ກໍ່ເພື່ອເປັນຂໍ້ມູນ ແລະ ເປັນບ່ອນອີງໃນການນໍາສະເໜີຫາສະພາແຫ່ງຊາດ ປັບປຸງບັນດາກົດໝາຍ 04 ສະບັບ ດັ່ງກ່າວ ເພື່ອໃຫ້ສອດຄ່ອງກັບການຈັດຕັ້ງປະຕິບັດຕົວຈິງຢູ່ຂັ້ນທ້ອງຖິ່ນ

ພາບ-ຂ່າວ: ສຸນທອງ ວິໄລຈິດ