ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 26 ກັນຍາ 2022 ທີ່ຫ້ອງປະຊຸມສະພາປະຊາຊົນແຂວງວຽງຈັນ, ໄດ້ຈັດກອງປະຊຸມ ຕິດຕາມກວດກາ ກ່ຽວກັບ ການສ້າງອາຊີບ, ການພັດທະນາສີມືແຮງງານ, ການສ້າງວຽກເຮັດງານທຳຂອງປະຊາຊົນ ແລະ ກ່ຽວກັບ ການຈັດຕັ້ງປະຕິບັດຄາດໝາຍໃນຂົງເຂດວັດທະນະທຳ-ສັງຄົມ ຂອງກຳມາທິການວັດທະນະທຳ-ສັງຄົມສະພາແຫ່ງຊາດ ໂດຍການເປັນປະທານຂອງທ່ານ ນາງ ມະນີວັນ ເຍຍປ່າວເຮີ ຮອງປະທານກຳມາທິການວັດທະນະທຳ-ສັງຄົມ ສະພາແຫ່ງຊາດ ແລະ ເປັນປະທານຮ່ວມຂອງ ທ່ານ ພູວົງ ບຸນຊູ ກຳມະການພັກແຂວງ ຮອງເຈົ້າແຂວງ ແຂວງວຽງຈັນ, ເຂົ້າຮ່ວມກອງປະຊຸມ ແລະ ກ່າວຕ້ອນຮັບໂດຍ ທ່ານ ບຸນສອນ ເພັດລາວັນ ຮອງເລຂາພັກແຂວງ, ປະທານສະພາປະຊາຊົນແຂວງວຽງຈັນ,  ພ້ອມດ້ວຍຄະນະເລຂາທິການສະພາ, ຫົວໜ້າ, ຮອງຫົວໜ້າ ພະແນກການອ້ອມຂ້າງແຂວງທີ່ກ່ຽວຂ້ອງ ແລະ ພະນັກງານວິຊາການເຂົ້າຮ່ວມຢ່າງພ້ອມພຽງ.

ຈຸດປະສົງຂອງການຈັດກອງປະຊຸມໃນຄັ້ງນີ້ ເພື່ອສືກສາຄົ້ນຄວ້າ, ເກັບກຳສະພາບການວ່າງງານ ຂອງແຮງງານລາວ, ການຝືກວິຊາຊີບ, ການພັດທະນາສີມືແຮງງານ, ການສ້າງວຽກເຮັດງານທຳຂອງປະຊາຊົນ, ການຈັດຫາງານ, ການຄຸ້ມຄອງ, ປົກປ້ອງສິດທິຜົນປະໂຫຍດຂອງຜູ້ອອກແຮງງານ, ຄວາມປອດໄພ, ສຸຂະພາບແຮງງານ ແລະ ນຳເອົາຂໍ້ມູນມາວິເຄາະວິໄຈ ໃຫ້ເຫັນສະພາບ, ຜົນສຳເລັດ, ຂໍ້ທີ່ຍັງຄົງຄ້າງ ແລະ ສາເຫດທີ່ພາໃຫ້ເກີດຂໍ້ຄົງຄ້າງ ເພື່ອລາຍງານຜົນການຕິດຕາມກວດການ ຕໍ່ກອງປະຊຸມຄະນະປະຈຳສະພາແຫ່ງຊາດ ແລະ ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX, ພ້ອມກັນນັ້ນຍັງຈະໄດ້ ສືບຕໍ່ລົງເຄື່ອນໄຫວຕິດຕາມກວດກາ ແລະ ຊຸກຍູ້ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຢູ່ຂັ້ນທ້ອງຖິ່ນ ໂດຍສະເພາະຢູ່ຂັ້ນເມືອງ ແລະ ບັນດາໂຮງຈັກໂຮງງານ ໃນຂອບເຂດແຂວງວຽງຈັນ.