ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

             (ສພຊ) ໃນຕອນເຊົ້າຂອງວັນທີ 25 ທັນວາ 2021 ກອງປະຊຸມໃຫຍ່ສະມາຊິກພັກ ຄັ້ງທີ II ຂອງຄະນະພັກຮາກຖານ ຄະນະເລຂາທິການສະພາແຫ່ງຊາດ ໄດ້ໄຂ້ຂຶ້ນຢ່າງເປັນທາງການ ທີ່ສະພາແຫ່ງຊາດ ໂດຍການເປັນປະທານຂອງສະຫາຍ ນາງ ປິ່ງຄຳ ລາຊະສິມມາ ກໍາມະການສູນກາງພັກ, ກຳມະການຄະນະບໍລິຫານງານພັກສະພາແຫ່ງຊາດ, ເລຂາຄະນະພັກຮາກຖານຄະນະເລຂາທິ ການສະພາແຫ່ງຊາດ, ເລຂາທິການສະພາແຫ່ງຊາດ ໂດຍການເຂົ້າຮ່ວມຂອງສະຫາຍ ປອ. ນາງ ສູນທອນ ໄຊຍະຈັກ ເລຂາ ທິການສູນກາງພັກ, ຮອງເລຂາຄະນະບໍລິຫານງານພັກສະພາແຫ່ງຊາດ, ຮອງປະທານສະພາແຫ່ງຊາດ; ມີສະຫາຍຮອງເລຂາຄະນະ ພັກຮາກຖານ, ກຳມະການຄະນະພັກຮາກຖານ, ຄະນະໜ່ວຍພັກທີ່ຂຶ້ນກັບຄະນະພັກຮາກຖານ, ຜູ້ຕາງໜ້າຈາກອົງການຈັດຕັ້ງມະ ຫາຊົນ, ສະມາຊິກພັກສົມບູນ-ສຳຮອງ, ສະມາຊິກພັກອະວຸໂສບຳນານພາຍໃນຄະນະພັກຮາກຖານ ແລະ ແຂກຖືກເຊີນຈາກຄະນະ ໜ່ວຍພັກຮາກຖານເຂົ້າຮ່ວມຢ່າງພ້ອມພຽງ.
          ກອງປະຊຸມ, ໄດ້ເປັນເອກະພາບກັນຮັບຮອງເອົາບົດລາຍງານການເມືອງ ແລະ ບົດສໍາຫລວດການນໍາພາລວມຂອງຄະນະພັກຮາກຖານຄະນະເລຂາທິການສະພາແຫ່ງຊາດ ສະໄໝທີ I ໄລຍະປີ (2019-2020) ພ້ອມດ້ວຍແຜນພັດທະນາຄະນະພັກຮາກຖານຄະນະເລຂາທິການສະພາແຫ່ງຊາດ ໄລຍະປີ 2021-2025; ພ້ອມນັ້ນ, ກອງປະຊຸມໄດ້ຕີລາຄາເລິກເຊິ່ງ, ກົງໄປກົງມາ ຕໍ່ການຈັດຕັ້ງປະຕິບັດໃນການນຳພາຂອງຄະນະພັກຮາກຖານຄະນະເລຂາທິການສະພາແຫ່ງຊາດ ໂດຍໄດ້ຍົກໃຫ້ເຫັນຜົນສໍາເລັດດ້ານດີ, ດ້ານອ່ອນ, ຂໍ້ຄົງຄ້າງ, ສາເຫດ, ບົດຮຽນທີ່ຖອດຖອນໄດ້ ເຊິ່ງໄດ້ສ້າງພື້ນຖານສໍາຄັນໃຫ້ແກ່ການສືບຕໍ່ປັບປຸງ, ຍົກລະດັບປະສິດທິພາບໃນການຈັດຕັ້ງປະຕິບັດວຽກງານຂອງຄະນະພົວພັນຕ່າງປະເທດສູນກາງພັກ ໃຫ້ສາມາດເຮັດສຳເລັດໜ້າທີ່ການເມືອງຂອງຕົນໃນຊຸມປີຕໍ່ໜ້າ ທັງຮັບປະກັນໃນການເປັນເສນາທິການໃຫ້ແກ່ອົງຄະນະບໍລິຫານງານພັກສະພາແຫ່ງຊາດຢ່າງໜັກແໜ້ນ.
          ກອງ​ປະ​ຊຸມ​ຄັ້ງ​ນີ້, ຜູ້ແທນສົມບູນຍັງ​ໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກຮາກຖານຄະນະເລຂາທິການສະພາແຫ່ງຊາດ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 11 ສະຫາຍ ຍິງ 4 ສະຫາຍ ແລະ ໄດ້ເລືອກເອົາ 9 ສະຫາຍ ຍິງ 3 ສະຫາຍ; ຈາກນັ້ນ, ໄດ້ເປີດກອງປະຊຸມຄັ້ງປະຖົມມະລືກ ເຊິ່ງກອງປະຊຸມໄດ້ເລືອກເອົາສະຫາຍ ນາງ ປິ່ງຄຳ ລາຊະສິມມາ ເປັນເລຂາຄະນະພັກຮາກຖານ, ສະຫາຍ ສິງຄຳ ວົງພະຈັນ ເປັນຮອງເລຂາຄະນະພັກຮາກຖານ, ສະຫາຍ ບຸນທັນ ບຸນວິໄລ ເປັນປະທານກວດກາພັກ, ສະຫາຍ ແສງແກ້ວ ວົງນະລາດ ແລະ ສະຫາຍ ນາງ ປານຄຳ ຂະຫຍອງເອກ ເປັນຮອງປະທານກວດກາ. ພ້ອມນັ້ນ, ຍັງໄດ້ເລືອກເອົາຄະນະຜູ້ແທນສົມບູນ-ສຳຮອງ ທີ່ຈະເຂົ້າຮ່ວມກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ ຈາກຜູ້ອອກສະໝັກທັງໝົດ ສະຫາຍ 54 ສະຫາຍ, ເລືອກໄດ້ຜູ້ແທນສົມບູນ 51 ສະຫາຍ ແລະ ຜູ້ແທນສຳຮອງ 2 ສະຫາຍ.
             ກອງປະຊຸມໃຫຍ່ຄັ້ງນີ້, ຍັງໄດ້ຮັບຟັງຄໍາເຫັນໂອ້ລົມຊີ້ນໍາຂອງສະຫາຍ ປອ. ນາງ ສູນທອນ ໄຊຍະຈັກ ເຊິ່ງສະຫາຍໄດ້ຕີລາຄາສູງຕໍ່ຜົນສໍາເລັດໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ I ຂອງຄະນະພັກຮາກຖານຄະນະເລຂາທິການສະພາແຫ່ງຊາດ, ບັນດາມະຕິ, ຄໍາສັ່ງຕ່າງໆ ຂອງພັກ ຕະຫລອດໄລຍະຜ່ານມາ ແລະ ສະແດງຄວາມຍ້ອງຍໍຊົມເຊີຍຕໍ່ການຊີ້ນຳ-ນຳພາຂອງບັນດາສະມາຊິກພັກ ໃນການປະຕິບັດໜ້າທີ່ການເມືອງທີ່ຂັ້ນເທິງມອບໝາຍໃຫ້ ແລະ ຍາດໄດ້ຜົນສຳເລັດໃນຫລາຍດ້ານ. ພ້ອມນັ້ນ, ສະຫາຍຍັງໄດ້ຊີ້ນໍາໃຫ້ສືບຕໍ່ເສີມຂະຫຍາຍດ້ານດີທີ່ຕັ້ງໜ້າ ແລະ ປັບປຸງແກ້ໄຂຈຸດອ່ອນຂໍ້ຄົງຄ້າງໃນແຕ່ລະດ້ານ ໂດຍສະເພາະແມ່ນດ້ານການເມືອງ-ແນວຄິດ; ການນຳພາວຽກງານກໍ່ສ້າງໜ່ວຍພັກປອດໃສ, ເຂັ້ມແຂງ, ໜັກແໜ້ນ; ວຽກງານດ້ານວິຊາສະເພາະ ແລະ ອື່ນໆ ເຮັດໃຫ້ທຸກດ້ານມີຄວາມສອດຄ່ອງ, ຖືກຕ້ອງ ແລະ ມີຜົນສຳເລັດເປັນຢ່າງດີ; ໃນໂອກາດນີ້, ສະຫາຍຍັງໄດ້ຮຽກຮ້ອງໃຫ້ຄະນະບໍລິຫານພັກຊຸດໃໝ່ ສືບຕໍ່ຊີ້ນໍາ-ນໍາພາຈັດຕັ້ງຜັນຂະຫຍາຍ ແລະ ສະມາຊິກພັກ-ລັດຖະກອນທັງໝົດທີ່ຂຶ້ນກັບຄະນະເຂາທິການສະພາແຫ່ງຊາດ ຈົ່ງສືບຕໍ່ເອົາໃຈໃສ່ໃນການຄົ້ນຄວ້າ ແລະ ປະຕິບັດມະຕິກອງປະຊຸມໃຫຍ່ໃນຄັ້ງນີ້ ໃຫ້ເຂົ້າສູ່ລວງເລິກ ແລະ ສອດຄ່ອງກັບສະພາບຄວາມເປັນຈິງ, ສູ້ຊົນນຳພາ-ຊີ້ນຳການຈັດຕັ້ງປະຕິບັດວຽກງານການເປັນເສນາທິການໃຫ້ອົງຄະນະພັກສະພາແຫ່ງຊາດ ກໍຄືສະພາແຫ່ງຊາດ ໃຫ້ມີຜົນສໍາເລັດຍິ່ງໃຫຍ່ກວ່າເກົ່າ.
(ພາບ: ອາລິນ ສຸພິມມະປະດິດ, ຂ່າວ: ປາກາລັກ ພົມມີໄຊ)