(ສພຊ) ກອງປະຊຸມໃຫຍ່ໜ່ວຍຊາວໜຸ່ມຮາກຖານກໍາມາທິການກົດໝາຍ ຄັ້ງທີ II ໄດ້ຈັດຂຶ້ນໃນຕອນບ່າຍ ຂອງວັນທີ 26 ກຸມພາ 2024 ທີ່ສະພາແຫ່ງຊາດ ໂດຍການເປັນປະທານຮ່ວມຂອງສະຫາຍ ອຳໄພ ຈິດມານົນ ກຳມະ ການຄະນະພັກສະພາແຫ່ງຊາດ, ຮອງເລຂາໜ່ວຍພັກຮາກຖານກຳມາທິການກົດໝາຍ, ສະຫາຍ ພອນແກ້ວ ຕົ້ນວໍລະຈິດ ກຳມະການຄະນະບໍລິຫານງານສູນກາງຊາວໜຸ່ມປະຊາຊົນປະຕິວັດລາວ, ເລຂາຄະນະບໍລິຫານງານຊາວໜຸ່ມສະພາແຫ່ງຊາດ ແລະ ສະຫາຍ ບຸນຍູ້ ອຸດົມເພັດ ເລຂາໜ່ວຍຊາວໜຸ່ມຮາກຖານກຳມາທິການກົດໝາຍ (ຜູ້ເກົ່າ); ມີບັນດາສະ ຫາຍຕາງໜ້າຈາກອົງການກຳມະບານ, ແມ່ຍິງ ໜ່ວຍຮາກຖານກຳມາທິການກົດໝາຍ, ໜ່ວຍຮາກຖານພາຍໃນສະພາແຫ່ງຊາດ ແລະ ສະມາຊິກຊາວໜຸ່ມຮາກຖານກຳມາທິການກົດໝາຍ ລວມທັງໝົດ 29 ສະຫາຍ ຍິງ 12 ສະຫາຍ.
ກອງປະຊຸມໄດ້ຮັບຟັງການຜ່ານບົດລາຍງານການເມືອງ ແລະ ບົດສຳຫຼວດການນຳພາຂອງໜ່ວຍຊາວໜຸ່ມຮາກຖານກຳມາທິການກົດໝາຍ; ຈາກນັ້ນ, ໄດ້ເປັນເອກະພາບພິຈາລະນາ, ຮັບຮອງເອົາບັນດາເນື້ອໃນສຳຄັນຄື: ເຫັນດີ ແລະ ຮັບຮອງເອົາບົດລາຍງານການເມືອງ ທີ່ສະເໜີໂດຍ ສະຫາຍ ກໍຢ່າ ຢົງກາຍ ຮອງເລຂາໜ່ວຍຊາວໜຸ່ມຮາກຖານກໍາມາທິການກົດໝາຍ ເຊິ່ງເນື້ອໃນລາຍງານການເມືອງດັ່ງກ່າວ ໄດ້ຕີລາຄາດ້ານດີ, ດ້ານອ່ອນ, ສາເຫດ ແລະ ບົດຮຽນທີ່ຖອດຖອນໄດ້ ຕະຫຼອດການເຄື່ອນໄຫວວຽກງານຂອງໜ່ວຍຊາວໜຸ່ມຮາກຖານກໍາມາທິການກົດໝາຍ ຄັ້ງທີ I; ພ້ອມກັນນັ້ນ, ກອງປະຊຸມເອກະພາບສູງຮັບຮອງເອົາແຜນການເຄື່ອນໄຫວແຕ່ນີ້ຮອດປີ 2030. ເຫັນດີ ແລະ ເປັນເອກະພາບກັບບົດລາຍງານການເມືອງ, ບົດສໍາຫຼວດການນໍາພາຂອງຄະນະໜ່ວຍຊາວໜຸ່ມ ຊຸດທີ I ຕາມການສະເໜີຂອງສະ ຫາຍເລຂາໜ່ວຍຊາວໜຸ່ມຮາກຖານກໍາມາທິການກົດໝາຍ ທີ່ໄດ້ລາຍງານ ແລະ ຢໍ້າຄືນຜົນສໍາເລັດຂອງການນໍາພາວຽກງານຊາວໜຸ່ມ ທີ່ຕິດພັນກັບວຽກງານວິຊາສະເພາະໃນແຕ່ລະດ້ານ ທັງເປັນການຖອດຖອນບົດຮຽນເພື່ອບ່ອນອີງໃຫ້ແກ່ຄະນະໜ່ວຍຊາວໜຸ່ມຮາກຖານກໍາມາທິການກົດໝາຍ ຄັ້ງທີ II ນໍາໄປຈັດຕັ້ງປະຕິບັດ ແລະ ປັບປຸງແກ້ໄຂບັນດາຂໍ້ ຄົງຄ້າງທີ່ຍັງຕ້ອງສືບຕໍ່ປະຕິບັດ.
ຈາກນັ້ນ, ຜູ້ແທນກອງປະຊຸມໃຫຍ່ຄັ້ງທີ II ໄດ້ພ້ອມກັນໃຊ້ສິດຂອງຕົນໃນການປ່ອນບັດເລືອກຕັ້ງເອົາຄະນະ ໜ່ວຍຊາວໜຸ່ມຮາກຖານກໍາມາທິການກົດໝາຍ ຊຸດທີ II ບົນພື້ນຖານຫຼັກການລວມສູນປະຊາທິປະໄຕ ທັງສອດຄ່ອງກັບມາດຕະຖານຕາມທີ່ໄດ້ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 5 ສະຫາຍ ຍິງ 1 ສະຫາຍ, ເລືອກເອົາ 3 ສະຫາຍ; ກອງປະຊຸມຄັ້ງປະຖົມມະລືກຂອງຄະນະໜ່ວຍຊາວໜຸ່ມຮາກຖານກໍາມາທິການກົດໝາຍ ຄັ້ງທີ II ໄດ້ເປັນເອ ກະພາບເລືອກເອົາສະຫາຍ ບຸນລົ້ນ ສໍລາດຈຳປາ ເປັນເລຂາ, ສະຫາຍ ນາງ ອາພາພອນ ເພັງທາ ເປັນຮອງເລຂາ ທັງເປັນປະທານກວດກາ, ສະຫາຍ ເຕັ້ງວ່າງ ໜາວຮົວ ເປັນກໍາມະການ.
ໃນໂອກາດນີ້, ສະຫາຍ ອຳໄພ ຈິດມານົນ ໄດ້ມີຄຳເຫັນໂອ້ລົມຕໍ່ກອງປະຊຸມ ໂດຍໄດ້ເນັ້ນໃຫ້ຄະນະໜ່ວຍຊາວໜຸ່ມຮາກຖານຊຸດໃໝ່ ພ້ອມສະມາຊິກຊາວໜຸ່ມພາຍໃນໜ່ວຍທັງໝົດ ເອົາໃຈໃສ່ບາງບັນຫາທີ່ສຳຄັນ ເຊັ່ນກອງປະຊຸມໃຫຍ່ຄັ້ງນີ້ ແມ່ນມີຄວາມໝາຍສຳຄັນທີ່ສຸດ, ເປັນການສືບຕໍ່ຮັດແໜ້ນຄວາມສາມັກຄີພາຍໃນສະມາຊິກຊາວໜຸ່ມ ທັງເປັນການ​ເຕົ້າ​ໂຮມ​ກຳລັງ​​ແຮງທາງ​ດ້ານ​ສະຕິ​ປັນຍາ, ກຳລັງ​ກາຍ ​ແລະ ກຳລັງ​ໃຈ​ຂອງ​ຊາວ​ໜຸ່ມ ​ເພື່ອສືບຕໍ່ພາລະກິດປ່ຽນແປງໃໝ່ ນຳເອົາປະເທດຊາດໃຫ້ຫຼຸດພົ້ນອອກຈາກຄວາມດ້ອຍພັດທະນາ ແລະ ກ້າວຂຶ້ນຕາມຈຸດໝາຍສັງຄົມນິຍົມ ທີ່ພັກປະຊາຊົນປະຕິວັດລາວ ໄດ້ກຳນົດເອົາໄວ້ ທັງເປັນການສືບທອດພາລະກິດປົກປັກຮັກສາ ແລະ ສ້າງສາພັດທະນາປະເທດຊາດຢ່າງບໍ່ຢຸດຢັ້ງ.
(ພາບ ແລະ ຂ່າວ: ນາງ ໄຊໂສພາພອນ ມິ່ງມຸງຄຸນ)