ກອງປະຊຸມໃຫຍ່ສະຫະພັນລັດຖະສະພາສາກົນຄັ້ງທີ 137 ຫລື IPU ໄດ້ເປີດຂື້ນຢ່າງເປັນທາງການ ໃນຕອນຄໍ່າຂອງວັນທີ 14 ຕຸລາ 2017, ທີ່ ຫໍວາງສະແດງສາກົນ ນະຄອນ ເຊັນປີເຕີສະເບີກ, ສະຫະພັນລັດເຊຍ. ໃນພິທີເປີດກອງປະຊຸມຄັ້ງສໍຄັນນີ້, ທ່ານ ວະລາ ດີເມຍ ປູຕີນ ປະທານາທິບໍດີ ແຫ່ງສະຫະພັນລັດເຊຍ ໄດ້ໃຫ້ກຽດເຂົ້າຮ່ວມ ແລະກ່າວສູນທອນພົດ ເປີດກອງປະຊຸມຕໍ່ຜູ້ນຳ ແລະຕົວແທນລັດຖະສະພາ ທີ່ມາຈາກ 173 ປະເທດ ທົ່ວໂລກ ຊຶ່ງມີຜູ້ເຂົ້າຮ່ວມ 2400 ຄົນ, ນັບວ່າມີຈຳນວນຜູ້ເຂົ້າຮ່ວມ ຫລາຍ ທີ່ສຸດໃນປະຫວັດສາດ ຂອງການຈັດກອງປະຊຸມໄອພີຢູນັບແຕ່ໄດ້ສ້າງຕັ້ງມາໃນ 1889. ໃນນີ້ ລະດັບປະທານລັດຖະສະພາ ມີ 96 ປະເທດ, ຊຶ່ງໃນນັ້ນ ຄະນະຜູ້ແທນຈາກສະພາແຫ່ງຊາດລາວ ນໍາໂດຍ ທ່ານ ປຸນປອນ ບຸດຕະນະວົງ, ກຳມະການສູນກາງພັກ, ຮອງປະທານສະພາແຫ່ງຊາດ ກໍໄດ້ເຂົ້າຮ່ວມ.
ກອງປະຊຸມໃຫຍ່ໄອພີຢູຄັ້ງທີ 137ນີ້, ຈະໄດ້ດໍາເນີນໄປຈົນຮອດວັນທີ 18 ຕຸລາ 2017 ໂດຍຈະໄດ້ຄົ້ນຄວ້າພິຈາລະນາຫລາຍບັນຫາທີ່ສຳຄັນຂອງໂລກ ແລະພາກພື້ນ. ໃນການເຂົ້າຮ່ວມກອງປະຊຸມຄັ້ງນີ້, ທ່ານ ບຸນປອນ ບຸດຕະນະວົງ ຫົວໜ້າຄະນະຜູ້ແທນລາວ ຈະໄດ້ກ່າວຄຳປາໃສ ໃນຫົວຂໍ້: “ ສົ່ງເສີມສັນຕິພາບ ແລະຄວາມຫຼາກຫຼາຍທາງດ້ານວັດທະນະທຳ ໂດຍຜ່ານການປຶກສາຫາລືກັນ ລະຫວ່າງເຜົ່າພັນ ແລະ ສາສະໜາຕ່າງໆ ” (Promoting cultural pluralism and peace through inter-faith and inter-ethnic dialogue), ຊຶ່ງຖືວ່າເປັນຫົວຂໍ້ ທີ່ມີຄວາມ ໝາຍສໍາຄັນຍິ່ງ ຕໍ່ສັນຕິພາບ ແລະ ຄວາມໝັ້ນຄົງຂອງພາກພື້ນ ແລະ ສາກົນ.
ພ້ອມກັນນີ້, ຄະນະຜູ້ແທນລາວຍັງຈະໄດ້ ເຂົ້າຮ່ວມກອງປະຊຸມຄະນະກຳມະການປະຈຳຕ່າງໆ ຂອງ ໄອພີຢູ ເຊັ່ນ: ກຳມາທິການປະຈໍາກ່ຽວກັບບັນຫາສັນຕິພາບ ແລະຄວາມໝັ້ນຄົງຂອງໂລກ, ກຳມາທິການປະຈໍາກ່ຽວກັບການພັດທະນາແບບຍືນຍົງ ການເງິນ ແລະການຄ້າ, ກຳມາທິການກ່ຽວກັບບັນຫາປະຊາທິປະໄຕ ແລະສິດທິມະນຸດ, ກໍາມາທິການປະຈໍາກ່ຽວກັບກິດຈະການຂອງອົງການສະຫະປະຊາຊາດ, ເວທີປຶກສາຫາລືຂອງສະມາຊິກລັດຖະສະພາເພດຍິງ, ເວທີປຶກສາຫາລືຂອງສະມາຊິກລັດຖະສະພາໜຸ່ມ ແລະເຂົ້າຮ່ວມກອງປະຊຸມຂອງກຸ່ມລັດຖະສະພາຈາກບັນດາປະເທດອາຊຽນບວກ 3 ແລະກອງປະຊຸມກຸ່ມລັດຖະສະພາພາກພື້ນອາຊີ ແລະປາຊີຟິກ.
ໃນກອງປະຊຸມໄອພີຢູຄັ້ງນີ້, ຄະນະຜູ້ແທນລາວ ຈະໄດ້ຮ່ວມພິຈາລະນາ ແລະໃຊ້ສິດລົງຄະນະຮັບຮອງເອົາຍັດຕິກ່ຽວກັບບັນຫາຮີບດ່ວນຂອງໂລກ ແລະພາກພື້ນ ທີ່ສະເໜີໂດຍປະເທດສະມາຊິກ ເປັນຕົ້ນ: ຍັດຕິກ່ຽວກັບການຍົກສູງບົດບາດການມີສ່ວນຮ່ວມ ແລະຄວາມມຸ້ງໝັ້ນຂອງລັດຖະສະພາໃນການປົກປັກຮັກສາສັນຕິພາບ ແລະຄວາມໝັ້ນຄົງຂອງໂລກ, ຍັດຕິກ່ຽວກັບບົດບາດຂອງໄອພີຢູໃນການແກ້ໄຂບັນຫາທາງການເມືອງໃນປະເທດສະມາຊິກ ເຊັ່ນ: ບັນຫາການ ເມືອງໃນປະເທດເວເນຊູເອລາ, ບັນຫາດ້ານມະນຸດສະທໍາຂອງຊາວໂຣຮິນຢາໃນປະເທດມຽນມາ, ບັນຫາຄວາມປອດໄພ ແລະການຄຸ້ມຄອງຊາວອົບພະຍົບ, ຕ້ານການກໍ່ການຮ້າຍ ແລະບັນຫາໄພຂົ່ມຂູ່ຈາກການທົດລອງອາວຸດນີວເຄຼີຍໃນແຫລມເກົາຫຼີ ແລະອື່ນໆ. ພ້ອມນີ້, ຄະນະຜູ້ແທນລາວ ຍັງຈະໄດ້ພົບປະສອງຝ່າຍກັບຮອງປະທານສະພາສູງ ແລະສະພາຕໍ່າຂອງສະຫະພັນລັດເຊຍເພື່ອປຶກສາຫາລືກ່ຽວກັບການຮ່ວມມືລະຫວ່າງອົງການນິຕິບັນຍັດຂອງສອງປະເທດລາວ-ລັດເຊຍ.
ນອກຈາກນີ້, ຄະນະຜູ້ແທນລາວ ຍັງຈະໄດ້ໃຊ້ສິດລົງຄະນະເລືອກຕັ້ງເອົາປະທານສະຫະພັນລັດຖະສະພາສາຄົນໃໝ່ເພື່ອປ່ຽນແທນທ່ານ ຊາເບີ ໂຊດາຣີ ຊາວບັງກາລາເດັດ ຊຶ່ງທ່ານ ໄດ້ຮັບການເລືອກຕັ້ງໃຫ້ດໍາລົງຕໍາແໜ່ງເປັນປະທານໄອພີຢູໃນກອງປະຊຸມໃຫຍ່ໄອພີຢູຄັ້ງທີ 131 ໃນວັນທີ 16 ຕຸລາ 2014 ໃນກຳນົດເວລາ 3 ປີ ແລະຈະໝົດວາລະລົງໃນກອງປະຊຸມໄອພີຢູຄັ້ງທີ 137 ນີ້. ໃນການເລືອກຕັ້ງປະທານໄອພີຢູ ຄັ້ງນີ້ ມີຜູ້ສະມັກເປັນ 2 ທ່ານ ທີ່ເປັນເພດຍິງ ຊຶ່ງມາຈາກປະເທດເມັກຊິກໂກ ແລະປະເທດອູຣາກວາຍ ຊຶ່ງທັງສອງທ່ານດັ່ງກ່າວ ກຳລັງຂຸ້ນຂ້ຽວຫາສຽງສະໜັບສະໜູນຈາກປະເທດສະມັກຊິກຢ່າງຄຶກຄື້ນ ແລະຈະມີການລົງຄະແນນສຽງປ່ອນບັດເອົາໃນວັນທີ 16 ຕຸລາ 2017 ນີ້./.