ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR


(ສພຊ) ໃນວັນທີ 21 ມັງກອນ 2022 ທີ່ຫ້ອງປະຊຸມຫ້ອງວ່າການສູນກາງພັກ ຕຶກເກົ່າ (ຫລັກ 6) ກອງປະຊຸມໃຫຍ່ຜູ້ແທນຄັ້ງທີ IV ຂອງອົງຄະນະພັກສະພາແຫ່ງຊາດ ໄດ້ໄຂຂຶ້ນຢ່າງເປັນທາງການ ພາຍໃຕ້ການເປັນປະທານຂອງ ສະຫາຍ ໄຊສົມພອນພົມວິຫານ ກໍາມະການກົມການເມືອງສູນກາງພັກ, ເລຂາຄະນະພັກສະພາແຫ່ງຊາດ, ປະທານສະພາແຫ່ງຊາດ; ໂດຍການເຂົ້າຮ່ວມຂອງສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ, ປະທານ ປະເທດແຫ່ງ ສປປລາວ, ມີບັນດາສະຫາຍຄະນະພັກສະພາແຫ່ງຊາດ ຊຸດທີ III, ຜູ້ແທນສົມບູນ, ສະມາຊິກພັກອາວຸໂສບໍານານ, ກໍາມະການກົມການເມືອງສູນກາງພັກ ແລະ ບັນດາສະຫາຍຕາງໜ້າຈາກຄະນະພັກຫ້ອງວ່າການສູນກາງພັກ, ຄະນະຈັດຕັ້ງສູນກາງພັກ, ຄະນະກວດກາສູນກາງພັກ, ຫ້ອງວ່າການສໍານັກງານປະທານປະເທດ, ຫ້ອງວ່າການສໍານັກງານນາຍົກ ລັດຖະມົນຕີ, ສານປະຊາຊົນສູງສຸດ, ອົງການໄອຍະການປະຊາຊົນສູງສຸດ, ກະຊວງຍຸຕິທໍາ, ອົງການກວດສອບແຫ່ງລັດ ພ້ອມດ້ວຍສະມາຊິກພັກອາວຸໂສເຂົ້າຮ່ວມ.

ກອງປະຊຸມ, ໄດ້ສຸມໃສ່ພິຈາລະນາ ແລະ ຮັບຮອງເອົາບົດລາຍງານການເມືອງ, ແຜນການພັດທະນາ ໃນໄລຍະ 5 ປີຕໍ່ໜ້າ(2021-2025), ບົດສໍາຫລວດການຊີ້ນໍາ-ນໍາພາລວມ ຂອງຄະນະພັກສະພາແຫ່ງຊາດຊຸດເກົ່າ. ນອກຈາກນັ້ນ, ຍັງມີການປະກອບຄໍາເຫັນຂອງຮາກຖານພັກ ແລະ ຕາງໜ້າອົງການຈັດຕັ້ງມະຫາຊົນ ພາຍໃຕ້ຫົວຂໍ້ “ການກໍ່ສ້າງພັກ ປອດໃສ, ເຂັ້ມແຂງ, ໜັກ ແໜ້ນ”, “ການເປັນເສນາທິການໃນວຽກບໍລິຫານ-ບໍລິຫານປິ່ນອ້ອມ”, “ຍົກສູງບົດບາດການນໍາພາຂອງພັກ ຕໍ່ກັບອົງການຈັດຕັ້ງມະຫາຊົນ”; ຜູ້ແທນກອງປະຊຸມໃຫຍ່ ໄດ້ພ້ອມກັນສຸມສະຕິປັນຍາ, ໃຊ້ສິດປະຊາທິປະໄຕ ແລະ ຍົກສູງຄວາມຮັບຜິດຊອບ ເຂົ້າໃນການຄົ້ນຄວ້າພິຈາລະນາບັນດາບັນຫາຕ່າງໆ ຕາມສິດ ແລະ ໜ້າທີ່ ທີ່ກຳນົດໄວ້ໃນກົດລະບຽບຂອງພັກ.

ກອງປະຊຸມຄັ້ງນີ້, ຜູ້ແທນສົມບູນຍັງໄດ້ໃຊ້ສິດປະຊາທິປະໄຕຂອງຕົນ ປ່ອນບັດຄັດເລືອກເອົາຄະນະພັກສະພາແຫ່ງຊາດ ຊຸດໃໝ່ ບົນພື້ນຖານຫລັກການລວມສູນປະຊາທິປະໄຕ ທັງຖືກຕ້ອງສອດຄ່ອງກັບມາດຖານເງື່ອນໄຂທີ່ກໍານົດໄວ້ ເຊິ່ງມີຜູ້ອອກຮັບສະໝັກເລືອກຕັ້ງທັງໝົດ 23 ສະຫາຍ ຍິງ 3 ສະຫາຍ ແລະ ໄດ້ເລືອກເອົາ 19 ສະຫາຍ ຍິງ 3 ສະຫາຍ; ຈາກນັ້ນ, ໄດ້ເປີດກອງປະຊຸມຄັ້ງປະຖົມມະລືກ ເຊິ່ງກອງປະຊຸມໄດ້ເລືອກເອົາສະຫາຍ ໄຊສົມພອນ ພົມວິຫານ ເປັນເລຂາຄະນະບໍລິຫານງານພັກສະພາແຫ່ງຊາດ, ສະຫາຍ ນາງ ສູນທອນ ໄຊຍະຈັກ ເປັນຮອງເລຂາຄະນະບໍລິຫານງານພັກສະພາແຫ່ງຊາດ, ສະຫາຍ ຄຳໃບ ດຳລັດ ເປັນປະທານກວດກາພັກ; ສະຫາຍ ສຸບັນ ສະວະບຸດ, ສະຫາຍ ນາງ ທຸມມາລີ ວົງພະຈັນ ແລະ ສະຫາຍ ນາງ ປານຄຳ ຂະຫຍອງເອກ ເປັນຮອງປະທານກວດກາ.

ພ້ອມນັ້ນ, ຍັງໄດ້ຮັບຟັງການໂອ້ລົມໃຫ້ທິດເຍືອງທາງໃຫ້ແກ່ການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ IV ຂອງອົງຄະນະພັກສະພາແຫ່ງຊາດ ຈາກສະຫາຍ ທອງລຸນ ສີສຸລິດ ເລຂາທິ ການໃຫຍ່ຄະນະບໍລິຫານງານພັກປະຊາຊົນປະຕິວັດລາວ ເຊິ່ງທ່ານໄດ້ເນັ້້ນໜັກໃຫ້ຄະນະບໍລິຫານງານພັກຊຸດໃໝ່ ປັບປຸງອົງຄະນະພັກຄະນະນໍາສະພາແຫ່ງຊາດ ໃຫ້ມີຄວາມປອດໃສເຂັ້ມແຂງ, ໜັກ ແໜ້ນ ແລະ ນໍາພາສະພາແຫ່ງຊາດ ໃຫ້ການຫັນປ່ຽນໃໝ່ຢ່າງເລິກເຊິ່ງ ປະຕິບັດຖືກຕ້ອງສອດ ຄອ່ງກັບລັດຖະທໍາມະນູນ ແລະ ກົດໝາຍ.

(ພາບ ແລະ ຂ່າວ: ສອນສັກ ວັນວິໄຊ)