ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມໃຫຍ່ຄັ້ງທີII ຂອງໜ່ວຍຊາວໜຸ່ມຮາກຖານ ສະພາປະຊາຊົນແຂວງ ຫລວງນ້ຳທາ ໄດ້ໄຂຂຶ້ນຢ່າງເປັນທາງການ ໃນວັນທີ 29 ເມສາ 2022 ຢູ່ທີ່ຫ້ອງປະຊຸມສະພາປະຊາຊົນແຂວງ ພາຍໃຕ້ການເປັນປະທານຂອງສະຫາຍ ວຽງໄຊ ສັກລຳດວນ ຄະນະບໍລິຫານງານຊາວໜຸ່ມແຂວງ ເລຂາໜ່ວຍຊາວໜຸ່ມຮາກຖານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງສະຫາຍ ນາງ ອຸ່ນຫລ້າ ອ້ຽງລໍລາດ ກຳມະການພັກແຂວງ ເລຂາໜ່ວຍພັກສະພາປະຊາຊົນແຂວງ ຮອງປະທານສະພາປະຊາຊົນແຂວງ ແລະ ສະຫາຍ ວົງມະນີ ເພື່ອປະຊາ ກຳມະການພັກແຂວງ ຄະນະບໍລິຫານງານສູນກາງ ຊປປ ລາວ ເລຂາຄະນະບໍລິຫານງານຊາວໜຸ່ມແຂວງ, ຕາງໜ້າໜ່ວຍຊາວໜຸ່ມອ້ອມຂ້າງທີ່ກ່ຽວຂ້ອງ, ອົງການຈັດຕັ້ງມະຫາຊົນ ພ້ອມດ້ວຍສະມາຊິກຊາວໜຸ່ມພາຍໃນສະພາປະຊາຊົນແຂວງ ເຂົ້າຮ່ວມຢ່າງພ້ອມພຽງ.

 

​ກອງປະຊຸມໄດ້ຮັບຟັງຜ່ານຂໍ້ຕົກລົງ ຂອງຄະນະບໍລິຫານງານຊາວໜຸ່ມແຂວງ ເລກທີ ເລກທີ 554/ຄຊປປລ.ຂ ວ່າດ້ວຍການອານຸມັດໄຂກອງປະຊຸມ; ຂ້ໍຕົກລົງເລກທີ 12/ໜຊໜ.ສພຂ ວ່າດ້ວຍ ການແຕ່ງຕັ້ງກອງເລຂາກອງປະຊຸມໃຫຍ່ຄັ້ງທີII ຂອງໜ່ວຍຊາວໜຸ່ມຮາກຖານ ສະພາປະຊາຊົນແຂວງ; ຂໍ້ຕົກລົງເລກທີ 16/ໜຊໜ.ສພຂ ວ່າດ້ວຍການແຕ່ງຕັ້ງຄະນະຄວບຄຸມການປ່ອນບັດເລືອກຕັ້ງ; ຂໍ້ຕົກລົງ ວ່າດ້ວຍການສິ້ນສຸດຂອງການເປັນຊາວໜຸມປະຊາຊົນປະຕິວັດລາວ ແລະ ໄດ້ຮັບຟັງຮ່າງບົດລາຍງານການເມືອງຕໍ່ກອງປະຊຸມໃຫຍ່ຄັ້ງທີ II ຂອງໜ່ວຍຊາວໜຸ່ມຮາກຖານ ສະພາປະຊາຊົນແຂວງ ໃນຕະຫລອດໄລຍະ 5 ປີຜ່ານມາ ຄະນະໜ່ວຍຊາວໜຸ່ມຮາກຖານ ໄດ້ເອົາໃຈໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ຂອງຜູ້ແທນຊາວໜຸ່ມທົ່ວແຂວງຫລວງນ້ຳທາ ຄັ້ງທີ VIII ຕິດພັນກັບການຈັດຕັ້ງປະຕິບັດຂໍ້ແຂ່ງຂັນ 4 ບຸກ ແລະ ວຽກງານສຶກສາອົບຮົມການເມືອງແນວຄິດ, ວຽກງານວິຊາສະເພາະຂອງຕົນຢ່າງແຂງແຮງ ແລະ ມີຜົນສຳເລັດເປັນກ້າວໆ ໂດຍພາຍໃຕ້ການຊີ້ນຳ-ນາພາຂອງຄະນະໜ່ວຍພັກ ສະພາປະຊາຊົນແຂວງ, ຄະນະບໍລິຫານງານຊາວໜຸ່ມແຂວງ ຊຶ່ງໜ່ວຍຊາວໜຸ່ມປະກອບມີ 3 ສະຫາຍ, ຍິງ 1 ສະຫາຍ, ມີສະມາຊິກຊາວໜຸ່ມທັງໝົດ 27 ສະຫາຍ, ຍິງ 16 ສະຫາຍ, ຜ່ານມາສະມາຊິກຊາວໜຸ່ມ ໄດ້ຈັດຕັ້ງປະຕິບັດກົດໝາຍວ່າດ້ວຍຊາວໜຸ່ມປະຊາຊົນປະຕິວັດລາວ, ນິຕິກຳທີ່ກ່ຽວຂ້ອງຢ່າງເຂັ້ມງວດ ແລະ ຜ່ານການຈັດຕັ້ງປະຕິບັດຂໍ້ແຂ່ງຂັນ 4 ບຸກ ໃນ 5 ປີຜ່ານມາ ສາມາດຍາດໄດ້ໃບຢັ້ງຢືນ 4 ບຸກ ຈຳນວນ 5 ໃບ ໄດ້ຮັບທຸງໄຊນຳໜ້າ ໃນການຈັດຕັ້ງປະຕິບັດ 4 ບຸກ ແລະ ສາມາຊິກຊາວໜຸ່ມພາຍໃນໜ່ວຍທຸກສະຫາຍໄດ້ຮັບການຍ້ອງຍໍຈາກຄະນະບໍລິຫານງານຊາວໜຸ່ມຂັ້ນສູນກາງ ແລະ ທ້ອງຖິ່ນຢ່າງຕໍ່ເນື່ອງ ແລະ  ຜູ້ແທນກອງປະຊຸມ ຍັງໄດ້ແລກປ່ຽນປະກອບຄຳຄິດເຫັນຕໍ່ກັບຮ່າງບົດລາຍງານດັ່ງກ່າວຢ່າງມີຈຸດສຸມ ເພື່ອເຮັດໃຫ້ບົດລາຍງານມີເນື້ອໃນຮັດກຸມ, ຖຶກຕ້ອງສົມບຸນກວ່າເກົ່າ, ພ້ອມດຽວກັນ ຄະນະໜ່ວຍຊາວໜຸ່ມ ຊຸດເກົ່າໄດ້ຂຶ້ນຜ່ານບົດສຳຫລວດການນຳພາ ພ້ອມທັງອຳລາໜ້າທີ່ ແລະ ໄດ້ມີພິທີມອບຂອງຂວັນໃຫ້ຄະນະໜ່ວຍຊາວໜຸ່ມຊຸດເກົ່າ, ມອບໃບຍ້ອງຍໍໃຫ້ສະມາຊິກຊາວໜຸ່ມຜູ້ດີເດັ່ນ ພາຍໃນສະພາປະຊາຊາຊົນແຂວງ ຈຳນວນ 27 ສະຫາຍ, ຍິງ 16 ສະຫາຍ ໂດຍໃຫ້ກຽດມອບຂອງສະຫາຍ ວົງມະນີ ເພື່ອປະຊາ ເລຂາຄະນະບໍລິຫານງານຊາວໜຸ່ມແຂວງ, ນອກນັ້ນ ໜ່ວຍຊາວໜຸ່ມຮາກຖານສະພາປະຊາຊົນແຂວງ ຍັງໄດ້ມອບອຸປະກອນການຮຽນໃຫ້ນ້ອງນ້ອຍນັກຮຽນຜູ້ທີ່ທຸກຍາກຈາກໂຮງຮຽນຊົນເຜົ່າ ເມືອງຫລວງນ້ຳທາ ແລະ ໄດ້ຜ່ານມາດຖານເງື່ອນໄຂຜູ້ທີ່ຈະສະໝັກເປັນຄະນະໜ່ວຍຊາວໜຸ່ມຊຸດໃໝ່ ແລະ ສະມາຊິກຊາວໜຸ່ມໄດ້ພ້ອມກັບປ່ອນບັດເລືອກຕັ້ງເອົາຄະນະໜ່ວຍຊາວໜຸ່ມຮາກຖານຊຸດໃໝ່ ທັງໝົດ 5 ສະຫາຍ, ເລືອກເອົາ 3 ສະຫາຍ ແລະ ຄະນະໜ່ວຍຊາວໜຸ່ມຊຸດໃໝ່ໄດ້ຂຶ້ນຮັບໜ້າທີ.

​ໂອກາດນີ້ ເພື່ອຂໍ່ານັບຮັບຕ້ອນ ແລະ ຊົມເຊີຍກອງປະຊຸມໃຫຍ່ຄັ້ງທີII ຂອງໜ່ວຍຊາວໜຸ່ມຮາກຖານ ສະພາປະຊາຊົນແຂວງ ໄດ້ຈັດຂະບວນການແຂ່ງຂັນກິລາເປຕັງຊາຍ ຊີງຂັນ ເລຂາໜ່ວຍຊາວໜຸ່ມຮາກຖານ ສະພາປະຊາຊົນແຂວງ  ຂຶ້ນຢູ່ທີເດີນກິລາ ສະພາປະຊາຊົນແຂວງ ຢ່າງເປັນຂະບວນຟົດຟື້ນທີ່ເຕັມໄປດ້ວຍຄວາມໝາຍສຳຄັນ ແລະ ບັນຍາກາດມ່ວນຊື່ນ.

ຂ່າວ ແລະ ພາບ ນາງ ວັນນີ ແຝງບົວວັນ