ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ລະຫວ່າງວັ​ນ​ທີ 15-16 ສິງ​ຫາ 2022 ກອງປະຊຸມເຝິກອົບຮົມເພື່ອຍົກສູງຂີດຄວາມສາມາດ ໃຫ້ແກ່ສະມາຊິກສະພາແຫ່ງຊາດ ​ໃນ​ການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນໃຫ້ມີປະສິດທິຜົນ, ເພື່ອເຮັດໃຫ້ສະມາຊິກສະພາແຫ່ງຊາດ ມີຄວາມຮັບຮູ້, ຄວາມເຂົ້າໃຈ ກ່ຽວກັບບາງທັກສະທີ່ມີຄວາມຈຳເປັນ ໃນວຽກງານຕົວຈິງ ທັງເປັນການແລກປ່ຽນ, ສົນທະນາແລກປ່ຽນບົດຮຽນ ລະຫວ່າງວິທະຍາກອນ, ສະມາຊິກສະພາແຫ່ງຊາດ ແລະ ພະນັກງານທີ່ເປັນເສນາທິການດ້ວຍກັນ ແນໃສ່ການຍົກລະດັບຄວາມຮັບຮູ້ ແລະ ຄວາມສາມາດໃນການປະຕິບັດໜ້າທີ່ການເມືອງໃຫ້ມີປະສິດທິຜົນດີ.
ກອງປະຊຸມເຝິກອົບຮົມການຍົກສູງຂີດຄວາມສາມາດດ້ານທັກສະການຊັກຖາມ, ປະກອບຄຳເຫັນ, ການລົງພົບປະຜູ້ມີສິດເລືອກຕັ້ງ ແລະ ການຕິດຕາມກວດກາ​ຂອງ​ສະ​ພາ​ແຫ່ງ​ຊາດ ແລະ ການ​ຕິດ​ຕາມກວດ​ກາ​ການ​ຈັດ​ຕັ້ງປະຕິບັດແຜນ​ພັດ​ທະ​ນາ​ເສດ​ຖະ​ກິ​ດ-ສັງ​ຄົມ ແລະ ​ແຜນ​ງົບ​ປະ​ມານ ໃຫ້ແກ່ສະມາຊິກສະພາແຫ່ງຊາດ ຈາກ 10 ເຂດເລືອກຕັ້ງ ຄື: ຜົ້ງສາລີ, ຫລວງນ້ຳທາ, ອຸດົມໄຊ, ບໍ່ແກ້ວ, ຫລວງພະບາງ, ໄຊຍະບູລີ, ຫົວພັນ, ຊຽງຂວາງ, ສາລະວັນ ແລະ ໄຊສົມບູນ ໄດ້ໄຂຂຶ້ນທີ່ຫ້ອງປະຊຸມສູນການຮ່ວມມືສາກົນ ແລະ ເຝິກອົບຮົມ (ICTC) ໂດຍການເປັນປະທານຂອງທ່ານ ປອ. ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ, ຜູ້ຊີ້ນຳສະຖາບັນຄົ້ນຄວ້ານິຕິກຳສະພາແຫ່ງຊາດ ທັງເປັນຫົວໜ້າຄະນະຊີ້ນຳການຍົກສູງຂີດຄວາມສາມາດ; ເຂົ້າຮ່ວມມີທ່ານ ນາງ ປິ່ງຄຳ ລາຊະສິມມາ ເລຂາທິການສະພາແຫ່ງຊາດ, ບັນດາປະທານ-ຮອງ​ປະ​ທານກຳມາທິການ​ສະ​ພາ​ແຫ່ງ​ຊາດ, ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ, ບັນດາທ່ານສະມາຊິກສະພາແຫ່ງຊາດ, ຄະນະກົມ, ຄະນະພະແນກ ແລະ ວິຊາການກ່ຽວຂ້ອງຂອງສະພາແຫ່ງຊາດ ແລະ 10 ເຂດເລືອກຕັ້ງດັ່ງກ່າວ ເຂົ້າຮ່ວມຢ່າງພ້ອມພຽງ.
ກອງປະຊຸມຈະໄດ້ດຳເນີນໄປຈົນເຖິງວັນທີ 16 ສິງຫາ 2022 ຈຶ່ງຈະສຳເລັດ ເຊິ່ງບັນດາທ່ານທີ່ເຂົ້າຮ່ວມຈະໄດ້​ຮັບ​ຟັງ​ບັນດາທ່ານວິທະຍາກອນ ທີ່​ມີ​ປະ​ສົບ​ການໃນການນຳພາ ຊີ້ນຳ​ການຈັດຕັ້ງປະຕິບັດວຽກງານຕົວ​ຈິງ ຈາກສະພາແຫ່ງຊາດ ​ໃນ 4 ຫົວຂໍ້​​ຂ້າງ​ເທິງ.
(ພາບ ແລະ ຂ່າວ: ນາງ ປາກາລັກ ພົມມີໄຊ)