ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າວັນທີ 26 ພຶດສະພາ 2022 ນີ້ ທີ່ສະໂມສອນແຂວງ   ໄດ້ເປີດກອງປະຊຸມຮ່ວມລະຫວ່າງ ສະພາປະຊາຊົນແຂວງ ກັບ ແນວລາວສ້າງຊາດ ແລະ ອົງການຈັດຕັ້ງມະຫາຊົນ ແຂວງສາລະວັນ  ໂດຍການເປັນປະທານຮ່ວມຂອງທ່ານສີເຮັງ ຫອມສົມບັດ ຮອງເລຂາພັກແຂວງ ປະທານສະພາປະຊາຊົນ ແຂວງ, ທ່ານ ຄໍາຕາ ໂຮ່ຊົງເລືອງ ຄະນະປະຈໍາພັກແຂວງ ກໍາມະການສູນກາງແນວລາວສ້າງຊາດ ປະທານອົງການແນວລາວສ້າງຊາດແຂວງ ຜູ້ຊີ້ນໍາວຽກງານອົງການຈັດຕັ້ງມະຫາຊົນ, ມີຄະນະປະຈໍາ, ຄະນະກໍາມະການ, ຄະນະເລຂາທິການ, ອົງການຈັດຕັ້ງມະຫາຊົນ ແລະ ຂະແໜງ ການທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມຕາງໜ້າຄະນະປະຈໍາສະພາປະຊາຊົນແຂວງ  ໄດ້ລາຍງານການເຄື່ອນໄຫວວຽກງານໃນຜ່ານມາ ພ້ອມທັງຜັດປ່ຽນກັນປະກອບຄໍາຄິດຄໍາເຫັນໄດ້ລົງເລິກໃສ່ບາງບັນຫາທີ່ກ່ຽວຂ້ອງກັບຄວາມຮັບຜິດຊອບຕາມພາລະບົດບາດຂອງສະພາປະຊາຊົນແຂວງ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ ແຂວງສາລະວັນ ເຊິ່ງໄດ້ຮ່ວມກັນແລກປ່ຽນຄໍາຄິດຄໍາເຫັນພ້ອມທັງສະເໜີແນະກ່ຽວກັບບັນຫາພື້ນຖານຂອງທ້ອງຖິ່ນທີ່ປະຊາຊົນໄດ້ສະເໜີຜ່ານສະມາຊິກສະພາປະຊາຊົນແຂວງ, ອົງການແນວລາວສ້າງຊາດ ແລະ ອົງການຈັດຕັ້ງມະຫາຊົນ ເຖິງອົງການປົກຄອງແຂວງໃຫ້ມີການປັບປຸງແກ້ໄຂ ເປັນຕົ້ນ: ການແກ້ໄຂຄວາມທຸກຍາກ, ບັນຫາລາຄາສິນຄ້າ, ລາຄານ້ຳມັນເຊື້ອໄຟ ທີ່ເພີ່ມຂຶ້ນແລະ ບັນຫາອື່ນໆ ທີ່ກ່ຽວພັນກັບການປະຕິບັດກົດໝາຍ ແລະ ແຜນພັດທະນາເສດຖະກິດ-ສັງຄົມ.

ທັງນີ້ເພື່ອເຮັດໃຫ້ການປະຕິບັດມະຕິຂອງພັກ, ແຜນພັດທະນາເສດຖະກິດ-ສັງຄົມຂອງລັດ ເວົ້າສະເພາະແມ່ນການປະຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໃຫ້ໄດ້ຮັບການຈັດຕັ້ງປະຕິບັດຢ່າງຖືກທິດ, ທັງເປັນການສ່ອງແສງ ແລະປຶກສາຫາລືກັນຮ່ວມກັນເພື່ອຊຸກຍູ້ ໃຫ້ພາກສ່ວນກ່ຽວຂ້ອງ ແກ້ໄຂບັນຫາດ້ວຍຄວາມຮັບຜິດຊອບສູງ ຕາມກົດໝາຍກໍານົດໄວ້.

(ຂ່າວ: ນາງຄັດສອນ ຮຸ່ງສະຫວ່າງ; ພາບ: ດີລໍາພົນ ພົມມະຈັນ)