ເພື່ອເຮັດໃຫ້ການດໍາເນີນກອງປະຊຸມ ສະໄໝສາມັນ ເທື່ອທີ 04 ຂອງສະພາແຫ່ງຊາດ ແລະ ສະພາປະຊາຊົນແຂວງ ຊຸດທີ II ທີ່ຈະຈັດຂຶ້ນໃນມໍ່ໆນີ້ ດຳເນີນໄປໃຫ້ຖືກຕ້ອງຕາມວາລະ ແລະ ມີເນື້ອໃນຄົບຖ້ວນ, ດັ່ງນັ້ນໃນຕອນເຊົ້າວັນທີ 30 ພະຈິກ 2022 ທີ່ຜ່ານມາ ອົງການປົກຄອງແຂວງ ສະຫວັນນະເຂດ ຮ່ວມກັບສະພາປະຊາຊົນແຂວງ ແລະ ບັນດາພະແນກການຕ່າງໆອ້ອມຂ້າງແຂວງໄດ້ຈັດກອງປະຊຸມເພື່ອ ປຶກສາຫາລື ແລະ ກະກຽມເນື້ອໃນຕ່າງໆ ທີ່ຈະນໍາເຂົ້າລາຍງານຕໍ່ກອງປະຊຸມສະໄໝສາມັນຂອງສະພາແຫ່ງຊາດ ແລະ ສະພາປະຊາຊົນແຂວງ ຊຸດທີ II. ໂດຍການເປັນປະທານຮ່ວມກັນຂອງທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາພັກແຂວງ ເຈົ້າແຂວງ ສ.ຂ ແລະ ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ມີທ່ານ ກໍາມະການປະຈໍາພັກແຂວງ, ຮອງປະທານສະພາປະຊາຊົນແຂວງ, ບັນດາທ່ານປະທານ, ຮອງປະທານຄະນະກໍາມະການ, ຫົວໜ້າ,ຄະນະພະແນກການ-ກົມກອງອ້ອມຂ້າງແຂວງ ແລະ ວິຊາການທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.
ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ, ໄດ້ກ່າວຈຸດປະສົງຂອງກອງປະຊຸມໃນຄັ້ງນີ້, ພ້ອມທັງໄດ້ມີຄໍາຖາມເຈາະຈິ້ມເພື່ອແນະນໍາໃຫ້ບັນດາພະແນກການ,ອົງການທີກ່ຽວຂ້ອງໄດ້ກະກຽມບັນດາເນື້ອໃນທີ່ຈະນໍາເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 04 ຂອງສະພາປະຊາຊົນແຂວງສະຫວັນນະເຂດ ຊຸດທີ II ພ້ອມທັງປຶກສາຫາລືແລກປ່ຽນ ປະກອບຄໍາຄິດ, ຄໍາເຫັນເພື່ອເອກະພາບດ້ານເນື້ອໃນລະອຽດດັ່ງນີ້:
- ວຽກອົງການປົກຄອງແຂວງ ( ມີ 3 ເນື້ອໃນ )
1.1. ພິຈາລະນາ ແລະ ຮັບຮອງເອົາ ບົດລາຍງານທ່ານເຈົ້າແຂວງໆສະຫວັນນະເຂດ ກ່ຽວກັບ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ ປະຈຳປີ 2022 ແລະ ທິດທາງແຜນການ ປະຈໍາປີ 2023;
1.2. ຮັບຟັງການລາຍງານ ຈາກຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບ ການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມຂອງແຂວງ ປະຈຳປີ 2022 ແລະ ທິດທາງແຜນການ ປະຈໍາປີ 2023;
1.3. ຮັບຟັງການລາຍງານ ຈາກຫົວໜ້າພະແນກການເງິນແຂວງ ກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດ ປະຈຳປີ 2022, ທິດທາງແຜນການ ປະຈໍາປີ 2023 ແລະ ການຄຸ້ມຄອງຊັບສິນລັດ ພາຍໃນແຂວງສະຫວັນນະເຂດ.
- ວຽກອົງການກວດສອບ ປະຈໍາພາກກາງ ແລະ ອົງການກວດກາລັດແຂວງ ( ມີ 2 ເນື້ອໃນ )
2.1. ພິຈາລະນາ ແລະ ຮັບຮອງເອົາບົດລາຍງານ ຂອງອົງການກວດສອບ ປະຈໍາພາກກາງ ກ່ຽວກັບ ຜົນຂອງການກວດສອບຄືນ ແລະ ການສະຫຼຸບງົບປະມານຂາດຕົວ ປະຈໍາປີ 2021, ບົດສະຫຼຸບການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
2.2. ພິຈາລະນາ ແລະ ຮັບຮອງເອົາບົດລາຍງານ ຂອງອົງການກວດກາລັດແຂວງ ກ່ຽວກັບ ການຕິດຕາມກວດກາແກ້ໄຂຜົນການກວດສອບ ປີ 2021, ບົດສະຫຼຸບການເຄື່ອນໄຫວວຽກງານກວດກາ ປະຈໍາປີ 2022 ແລະ ທິດທາງແຜນການ ປະຈໍາປີ 2023.
- 3. ວຽກການສ້າງ ແລະ ປັບປຸງນິຕິກໍາໃຕ້ກົດໝາຍ ( ມີ 3 ນິຕິກໍາ )
ພິຈາລະນາ, ຮັບຮອງເອົານິຕິກໍາທີ່ສໍາຄັນ ຂອງອົງການປົກຄອງແຂວງ ຄື:
– ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍ ການຄຸ້ມຄອງການຂົນສົ່ງທາງບົກພາຍໃນ ແຂວງສະຫວັນນະເຂດ ( ພະແນກໂຍທາທິການ ແລະ ຂົນສົ່ງແຂວງ );
– ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍ ການຄຸ້ມຄອງຂີ້ເຫຍື້ອພາຍໃນແຂວງ ສະຫວັນນະເຂດ ( ພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ );
– ຮ່າງຂໍ້ຕົກລົງຂອງທ່ານເຈົ້າແຂວງສະຫວັນນະເຂດ ວ່າດ້ວຍ ການຕ້ານ ແລະ ສະກັດກັ້ນອັກຄີໄພພາຍໃນ ແຂວງສະຫວັນນະເຂດ ( ກອງບັນຊາການ ປກສ ແຂວງ ).
- 4. ວຽກອົງການໄອຍະການປະຊາຊົນແຂວງ ແລະ ສານປະຊາຊົນແຂວງ ( ມີ 2 ເນື້ອໃນ )
4.1. ພິຈາລະນາ ແລະ ຮັບຮອງເອົາບົດລາຍງານ ຂອງອົງການໄອຍະການປະຊາຊົນແຂວງ ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
4.2. ພິຈາລະນາ ແລະ ຮັບຮອງເອົາບົດລາຍງານ ຂອງສານປະຊາຊົນແຂວງ ກ່ຽວກັບ ການຈັດຕັ້ງປະຕິບັດການ ເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023.
- 5. ວຽກງານຂອງສະພາປະຊາຊົນແຂວງ ( ມີ 2 ເນື້ອໃນ )
5.1. ພິຈາລະນາ ແລະ ຮັບຮອງເອົາການບົດລາຍງານ ຂອງສະພາປະຊາຊົນແຂວງ ຊຸດທີ II ກ່ຽວກັບ ການຈັດຕັ້ງປະຕິບັດການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການ ປະຈໍາປີ 2023;
5.2. ຮັບຟັງບົດປະກອບຄໍາເຫັນ ຂອງອົງການແນວລາວສ້າງຊາດແຂວງ ກ່ຽວກັບ ການປະຕິບັດໜ້າທີ່ຂອງສະພາປະຊາຊົນແຂວງ.
- 6. ວຽກບຸກຄະລາກອນ
ພິຈາລະນາ, ຮັບຮອງບຸກຄະລາກອນຂອງອົງການໄອຍະການປະຊາຊົນແຂວງ.
ຫຼັງຈາກນັ້ນ ທ່ານປະທານກອງປະຊຸມກໍ່ໄດ້ສະຫຼຸບ, ຕີລາຄາ ແລະ ມີທິດຊີ້ນໍາ ພ້ອມທັງກໍານົດເອົາ ວັນທີ 24 ຫາ 27 ມັງກອນ 2023 ດໍາເນີນກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ທີ່ຫໍວັດທະນະທໍາ ໄກສອນພົມວິຫານ (ຄາດຄະເນ 4 ວັນ ຖ້ານິຕິກໍາທັງ 3 ສະບັບ ນໍາເຂົ້າພິຈາລະນາທັນຕາມກໍານົດເວລາ);
