ໃນຕອນເຊົ້າວັນທີ 4 ເມສາ 2023, ສະພາທິດສະດີສູນກາງພັກປະຊາຊົນປະຕິວັດລາວ ໄດ້ຈັດກອງປະຊຸມສໍາມະນາທິດສະດີ ສອງພັກລາວ-ຈີນ ຄັ້ງທີ X ໂດຍຜ່ານວີດີໂອທາງໄກ; ພາຍໃຕ້ຫົວຂໍ້ “ບົດຮຽນໃນການຄຸ້ມຄອງສັງຄົມແບບປະດິດສ້າງໃໝ່ ໃນຍຸກສະໄໝແຫ່ງຂໍ້ມູນຂ່າວສານ” ທີ່ຫ້ອງປະຊຸມໂຮງແຮມດອນຈັນພາເລດ, ນະຄອນຫຼວງວຽງຈັນ, ສປປລາວ ໂດຍການເປັນປະທານຮ່ວມເປີດກອງປະຊຸມຂອງສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ; ສະຫາຍ ປອ. ຄຳພັນ ເຜີຍຍະວົງ ເລຂາທິການສູນກາງພັກ, ຫົວໜ້າຄະນະໂຄສະນາອົບຮົມສູນກາງພັກ, ປະທານສະພາທິດສະດີສູນກາງພັກປະຊາຊົນປະຕິວັດລາວ ແລະ ສະຫາຍ ສົມພອນ ສີຈະເລີນ ຮອງຫົວໜ້າຄະນະພົວພັນຕ່າງປະເທດສູນກາງພັກ; ເຂົ້າຮ່ວມກອງປະຊຸມໃນຄັ້ງນີ້ ຍັງມີບັນດາສະຫາຍພະນັກງານການນຳຂັ້ນສູງ, ທີ່ປຶກສາສະພາທິດສະດີສູນກາງພັກປະຊາຊົນປະຕິວັດລາວ, ບັນດາສະຫາຍຄະນະປະຈຳສະພາທິດສະດີສູນກາງພັກ, ສະມາຊິກສະພາທິດສະດີສູນກາງພັກ, ບັນດານັກວິທະຍາສາດ, ນັກທິດສະດີ, ບັນດາຜູ້ຕາງໜ້າຈາກຄະນະພັກກະຊວງ-ອົງການ ແລະ ພະນັກງານຫຼັກແຫຼ່ງອ້ອມຂ້າງສູນກາງ ເຂົ້າຮ່ວມ 150 ສະຫາຍ.

ໃນວາລະເປີດກອງປະຊຸມ; ສະຫາຍ ໂກ່ວ ເຢ້ໂຈ່ວ ຮອງຫົວໜ້າຄະນະພົວພັນຕ່າງປະເທດສູນກາງພັກກອມມູນິດຈີນ ໄດ້ກ່າວເປີດກອງປະຊຸມ ໂດຍຜ່ານວີດີໂອທາງໄກຈາກ ສປຈີນ; ສະຫາຍ ຫລື ຊູເຫຼີຍ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະໂຄສະນາສູນກາງພັກກອມມູນິດຈີນ ໄດ້ຂຶ້ນກ່າວຄໍາເຫັນຫຼັກ ຝ່າຍຈີນ.

ຈາກນັ້ນ, ສະຫາຍ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ, ເລຂາທິການສູນກາງພັກ, ຫົວໜ້າຄະນະຈັດຕັ້ງສູນກາງພັກ ກ່າວຄຳເຫັນຫຼັກ ຂອງຝ່າຍລາວ ໃນຫົວຂໍ້ “ພັກປະຊາຊົນປະຕິວັດລາວ ນໍາພາການຄຸ້ມຄອງສັງຄົມແບບປະດິດສ້າງໃໝ່ ໃນຍຸກສະໄໝຂໍ້ມູນ-ຂ່າວສານ” ເຊິ່ງໄດ້ຍົກໃຫ້ເຫັນຄວາມໝາຍສໍາຄັນ ໂດຍສະເພາະເນື່ອງໃນໂອກາດຄົບຮອບ 10 ປີ ແຫ່ງການພົວພັນຮ່ວມມືໃນການຄົ້ນຄວ້າທິດສະດີ ແລະ ພຶດຕິກໍາລະຫວ່າງ ພັກປະຊາຊົນປະຕິວັດລາວ ແລະ ພັກກອມມູນິດຈີນ, ການສໍາມະນາທິດສະດີຮ່ວມກັນຜ່ານມາ ແມ່ນມີຫຼາຍເນື້ອໃນທີ່ອຸດົມສົມບູນ, ປະກອບສ່ວນໃຫ້ຄໍາປຶກສາແກ່ສູນກາງພັກ ໃນການວາງແນວທາງ, ແຜນນະໂຍບາຍຂອງພັກ-ລັດ. ສະນັ້ນ, ກອງປະຊຸມສຳມະນາທິດສະດີ ສອງພັກລາວ-ຈີນ ໃນຄັ້ງນີ້ ໄດ້ດຳເນີນພາຍໃຕ້ຫົວຂໍ້: “ບົດຮຽນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານ” ເຊິ່ງເປັນໄລຍະທີ່ທົ່ວພັກ, ທົ່ວກອງທັບ, ທົ່ວປວງຊົນລາວທັງຊາດ ພວມພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ XI ຂອງພັກປະຊາຊົນປະຕິວັດລາວ ໃນໄລຍະເຄິ່ງສະໄໝຢ່າງມີຜົນສຳເລັດ; ໃນໄລຍະນີ້ ພໍດີກັບໄລຍະເວລາທີ່ພັກກອມມູນິດຈີນ ກໍຄືປະຊາຊົນຈີນ ກຳລັງຊົມເຊີຍຜົນສຳເລັດ ກອງປະຊຸມຄັ້ງທີ XX ຂອງພັກ ແລະ ໄດ້ສຳເລັດກອງປະຊຸມສະພາຜູ້ແທນປະຊາຊົນແຫ່ງຊາດຈີນ ຄັ້ງທີ XIV ທີ່ໄດ້ຮັບຮອງເອົາຄະນະນໍາ ແລະ ຄະນະລັດຖະບານ ສປຈີນ ຊຸດໃໝ່ ຢ່າງມີຜົນສຳເລັດ ແລະ ມີຄວາມໝາຍທາງປະຫວັດສາດໃນການສືບຕໍ່ຊູຄັນທຸງອັນຍິ່ງໃຫຍ່ແຫ່ງສັງຄົມນິຍົມທີ່ມີສີສັນພິເສດຂອງຈີນ ເພື່ອສ້າງສາປະເທດສັງຄົມນິຍົມທັນສະໄໝຢ່າງຮອບດ້ານ.

ກອງປະຊຸມຄັ້ງນີ້, ບັນດານັກວິທະຍາສາດ, ນັກທິດສະດີ ຂອງທັງສອງຝ່າຍ ໄດ້ຜັດປ່ຽນກັນຂຶ້ນສະເໜີບົດຄໍາເຫັນໃນຫົວຂໍ້ຍ່ອຍທີ່ປິ່ນອ້ອມບັນດາບົດຮຽນໃນການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານ ຂອງ ສປປລາວ ແລະ ສປຈີນ ເຊິ່ງຝ່າຍລາວປະກອບມີ 3 ບົດຄື: 1). ການປະຕິບັດບົດບາດ ຂອງລັດໃນການຄຸ້ມຄອງສັງຄົມ ຢູ່ ສປປລາວ; 2). ການຄຸ້ມຄອງສັງຄົມໃນເງື່ອນໄຂການປະຕິວັດອຸດສາຫະກຳ ຄັ້ງທີ 4 ຢູ່ ສປປລາວ; 3). ການຫັນເປັນທັນສະໄໝໃນການຄຸ້ມຄອງພົນລະເມືອງ ຢູ່ ສປປລາວ; ຝ່າຍ ສປຈີນ ປະກອບມີ 5 ບົດຄື: 1). ແນວຄວາມຄິດພື້ນຖານ ແລະ ການປະຕິບັດຕົ້ນຕໍໃນການປັບປຸງລະບົບການຄຸ້ມຄອງສັງຄົມໃນຍຸກສະໄໝແຫ່ງຂໍ້ມູນ-ຂ່າວສານ; 2). ໜ້າທີ່ສຳຄັນ ແລະ ທິດທາງລວມອັນປະດິດສ້າງໃໝ່ ຂອງການຄຸ້ມຄອງສັງຄົມໃນຍຸກສະໄໝຂໍ້ມູນ-ຂ່າວສານ, 3). ຍົກສູງລະດັບການຄຸ້ມຄອງດ້ວຍກົດໝາຍໃນການຄຸ້ມຄອງສັງຄົມໃນຍຸກສະໄໝຂໍ້ມູນ-ຂ່າວສານ; 4). ການຄຸ້ມຄອງສັງຄົມໃນຍຸກແຫ່ງຂໍ້ມູນ-ຂ່າວສານ ແລະ ການປະດິດສ້າງໃໝ່ ຂອງລະບົບສັງຄົມ; 5). ການລິເລີ່ມ ແລະ ພຶດຕິກໍາ ຂອງວຽກງານມະຫາຊົນ ໃນຍຸກສະໄໝໃໝ່. ພ້ອມດຽວກັນນັ້ນ, ຄະນະຜູ້ແທນ ຂອງທັງສອງຝ່າຍ ຍັງໄດ້ຜັດປ່ຽນກັນໃນການແລກປ່ຽນ ແລະ ຖອດຖອນບົດຮຽນບັນຫາຕ່າງໆທີ່ທັງສອງຝ່າຍໃຫ້ຄວາມສົນໃຈ.

ກອງປະຊຸມໄດ້ມີຄວາມເປັນເອກະພາບສູງຊີ້ໃຫ້ເຫັນວ່າ: ໃນການຄຸ້ມຄອງສັງຄົມແບບປະດິດສ້າງໃໝ່ ໃນຍຸກສະໄໝແຫ່ງຂໍ້ມູນ-ຂ່າວສານ ໂດຍພາຍໃຕ້ການນຳພາອັນເຂັ້ມແຂງຂອງພັກ, ພັກຍັງມີບົດບາດຕັດສິນຊີ້ຂາດໃຫ້ແກ່ໄຊຊະນະຂອງການປະຕິວັດສັງຄົມນິຍົມ, ພັກກອມມູນິດກັບສັງຄົມນິຍົມ ແມ່ນອົງປະກອບເອກະພາບທີ່ບໍ່ສາມາດຕັດແຍກອອກຈາກກັນໄດ້, ພັກນຳພາເຕົ້າໂຮມກຳລັງເພື່ອພາລະກິດອັນຍິ່ງໃຫຍ່, ນໍາພາປະຊາຊົນເດີນຕາມເສັ້ນທາງແຫ່ງຄວາມຜາສຸກ. ພັກເປັນປັດໄຈສຳຄັນຕັດສິນໄຊຊະນະຂອງການສ້າງ ແລະ ບູລະນະລະບອບປະຊາທິປະໄຕປະຊາຊົນກ້າວຂຶ້ນສູ່ສັງຄົມນິຍົມເທື່ອລະກ້າວຢູ່ລາວ ແລະ ການສ້າງສັງຄົມນິຍົມທີ່ທັນສະໄໝຢູ່ຈີນ. ໃນນີ້ ໄດ້ເອກະພາບສູງຕໍ່ຂັ້ນຕອນ, ບາດກ້າວເດີນ, ວິທີການໃນການສ້າງສັງຄົມນິຍົມ ຂອງແຕ່ລະປະເທດ ໂດຍເລີ່ມຈາກຈຸດພິເສດ ແລະ ເງື່ອນໄຂ ຂອງແຕ່ລະປະເທດ ແຕ່ຕ້ອງຢຶດໝັ້ນໃນລັກສະນະພັກ, ລັກສະນະປະດິດສ້າງ ແລະ ລັກສະນະສາກົນ. ບົນພື້ນຖານດ້ານທິດສະດີວິທະຍາສາດອັນນີ້ ພັກກອມມູນິດຈີນ ຈຶ່ງຢັ້ງຢືນວ່າ ການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານ ແມ່ນການບູລະນະ ແລະ ພັດທະນາລະບອບສັງຄົມນິຍົມໃຫ້ດີຍິ່ງໆຂຶ້ນ. ໃນການດໍາເນີນພາລະກິດປ່ຽນແປງໃໝ່ຮອບດ້ານ ແລະ ມີຫຼັກການ ຂອງພັກປະຊາຊົນປະຕິວັດລາວ ກໍແມ່ນເສັ້ນທາງກ້າວຂຶ້ນສັງຄົມນິຍົມ ບົນພື້ນຖານຢຶດໝັ້ນ 6 ຫຼັກການປ່ຽນແປງໃໝ່, 9 ປະຖົມປັດໄຈ ແລະ ການຄຸ້ມຄອງສັງຄົມແບບປະດິດສ້າງໃໝ່ໃນຍຸກສະໄໝແຫ່ງຂໍ້ມູນ-ຂ່າວສານ ແມ່ນສອດຄ່ອງກັບຈຸດພິເສດ ແລະ ເງື່ອນໄຂຂອງປະເທດ.

(ແຫຼ່ງຂ່າວ: ພະແນກຄຸ້ມຄອງວິຊາການ ແລະ ການຄົ້ນຄວ້າ, ຫ້ອງການສະພາທິດສະດີສູນກາງພັກ)