ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຊ) ໃນຕອນເຊົ້າວັນທີ 23 ກັນຍາ 2022 ທີ່ສະພາແຫ່ງຊາດ ນະຄອນຫຼວງວຽງຈັນ ໄດ້ມີກອງປະຊຸມສາ ມັນຄົບຄະນະ ຂອງຄະນະບໍລິຫານງານສະຫະພັນກຳມະບານສະພາແຫ່ງຊາດ ໂດຍການເປັນປະທານຂອງສະຫາຍ ອຳ ໄພ ຈິດມານົນ ກຳມະການຄະນະພັກສະພາແຫ່ງຊາດ, ປະທານສະຫະພັນກຳມະບານສະພາແຫ່ງຊາດ, ມີບັນດາໜ່ວຍກຳມະບານຮາກຖານພາຍໃນສະພາແຫ່ງຊາດ ແລະ ອົງການຈັດຕັ້ງມະຫາຊົນຈຳນວນ 24 ສະຫາຍ ຍິງ 7 ສະຫາຍເຂົ້າຮ່ວມ.
ກອງປະຊຸມ ໄດ້ມີຄວາມເປັນເອກະພາບຮັບຮອງເອົາເນື້ອໃນສຳຄັນຕົ້ນຕໍ ດັ່ງນີ້: ກອງປະຊຸມສາມັນຄົບຄະນະ ຂອງຄະນະບໍລິຫານງານສະຫະພັນກຳມະບານສະພາແຫ່ງຊາດ, ຄະນະບໍລິການງານສະຫະພັນກຳມະບານສະພາແຫ່ງຊາດ ໄດ້ເປັນເອກະສັນຮັບຮອງເອົາບົດສະຫຼຸບການເຄື່ອນໄຫວວຽກງານຂອງສະຫະພັນກຳມະບານສະພາແຫ່ງຊາດ, ຕີລາຄາຜົນງານການເຄື່ອນໄຫວ ໃນໄລຍະຜ່ານມາ ໂດຍຍົກໃຫ້ເຫັນດ້ານດີທີ່ເປັນມູນເຊື້ອ, ບັນດາຜົນງານທີ່ຈະຕ້ອງເສີມຂະຫຍາຍ ເປັນຕົ້ນ ດ້ານການເມືອງ-ແນວຄິດ; ຄວາມເປັນເອກະພາບໃນການຊີ້ນຳ-ນຳພາ ແລະ ຕິດຕາມຊຸກຍູ້ວຽກງານຢ່າງໃກ້ສິດ ຂອງຄະນະບໍລິຫານງານສະຫະພັນກຳມະບານສະພາແຫ່ງຊາດ; ຄວາມເອົາໃຈໃສ່ເປັນເສນາທິການ ໃຫ້ຄະນະພັກສະພາແຫ່ງຊາດ; ການເຕົ້າໂຮມຄວາມສາມັກຄີ ແລະ ຄວາມເປັນເຈົ້າການປະຕິບັດໜ້າທີ່ຂອງບັນດາສະຫາຍສະມາຊິກກຳມະບານ ເຊິ່ງໄດ້ສະແດງອອກ ໃນຜົນງານຢັ້ງຢືນການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ. ແຕ່ຄຽງຄູ່ກັບຜົນງານທີ່ກ່າວມາຂ້າງເທິງນັ້ນ ເຫັນວ່າ ຍັງມີຂໍ້ຄົງຄ້າງ ທີ່ຈະຕ້ອງໄດ້ຮັບການປັບປຸງແກ້ໄຂ ໂດຍສະເພາະການຕິດຕາມກວດກາ, ຊຸກຍູ້ ຮາກຖານກຳມະບານ ໃນການດຳເນີນຊີວິດການເມືອງ, ຂະບວນການແຂ່ງຂັນ 5 ເປັນເຈົ້າ ຂອງຮາກຖານກຳມະບານ ໃຫ້ແຂງແຮງ ແລະ ຄົ້ນຄວ້າແນວທາງນະໂຍບາຍຂອງພັກ-ລັດ, ບັນດານິຕິກຳ ແລະ ທິດທາງແຜນການ ຂອງສະຫະພັນກຳມະບານສະພາແຫ່ງຊາດ ກໍຄືສູນກາງສະຫະພັນກຳມະບານລາວ ວາງອອກ. ກອງປະຊຸມ ໄດ້ຮັບຮອງເອົາທິດທາງແຜນການເຄື່ອນໄຫວວຽກງານຂອງ ສະຫະພັນກຳມະບານສະພາແຫ່ງຊາດ ໃນຕໍ່ໜ້າ ເຊິ່ງເນັ້ນໃສ່ການຊີ້ນຳ-ນຳພາ ດ້ານການເມືອງ-ແນວຄິດ, ຄຸນທາດການເມືອງ, ການຈັດຕັ້ງປະຕິບັດຂໍ້ແຂ່ງຂັນ 5 ເປັນເຈົ້າ, ລົງເລິກດ້ານເນື້ອໃນທີ່ຄົບຖ້ວນ ເພື່ອຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ເພີ່ມທະວີການປັບປຸງແບບແຜນວຽກລະອຽດຂອງຕົນ, ຍົກຂີດຄວາມສາມາດ ໃນການເຝິກຝົນຫຼໍ່ຫຼອມທາງດ້ານທິດສະດີ-ວິຊາສະເພາະ ໃຫ້ສະມາຊິກກຳມະບານ ເປັນລະບົບຕໍ່ເນື່ອງ; ຊຸກຍູ້, ຕິດຕາມກໍ່ສ້າງສະມາຊິກກຳມະບານ, ສ້າງມະຫາຊົນຜູ້ກ້າວໜ້າເພື່ອເຂົ້າເປັນສະມາຊິກພັກ, ດຳເນີນຊີວິດການເມືອງເປັນປົກກະຕິ. ກອງປະຊຸມ ເລືອກຕັ້ງເອົາສະຫາຍ ໂພສີ ເຕັມເມລາດ ເປັນຮອງປະທານຄະນະບໍລິຫານງານກຳມະບານສະພາແຫ່ງຊາດ.
ໂອກາດດັ່ງກ່າວ ກອງປະຊຸມ ໄດ້ຮັບຟັງການໂອ້ລົມຂອງສະຫາຍ ຮສ. ປອ. ລິນຄຳ ດວງສະຫວັນ ກຳມະການສຳຮອງສູນກາງພັກ, ກຳມະການປະຈຳພັກສະພາແຫ່ງຊາດ ເຊິ່ງໄດ້ຍົກໃຫ້ເຫັນບົດບາດຄວາມສຳຄັນໃນການປະຕິບັດໜ້າທີ່ການເມືອງຂອງ ສະຫະພັນກຳມະບານສະພາແຫ່ງຊາດ ແນໃສ່ຮັບປະກັນການເປັນເສນາທິການ ໃຫ້ແກ່ຄະນະບໍລິຫານງານພັກສະພາແຫ່ງຊາດ. ນອກນັ້ນ, ຍັງໄດ້ຍົກໃຫ້ເຫັນຄວາມສຳຄັນສະຫະພັນກຳມະບານສະພາແຫ່ງຊາດ ທີ່ຈະຕ້ອງໄດ້ປະຕິບັດຂໍ້ແຂ່ງຂັນ 5 ເປັນເຈົ້າ ຢ່ງຫ້າວຫັນຂຶ້ນເລື້ອຍໆ. ບັນດາເນື້ອໃນເຫຼົ່ານີ້ ໄດ້ເປັນເຂັມທິດຊີ້ນຳ, ເຍືອງທາງທີ່ສຳຄັນໃຫ້ແກ່ການເຄື່ອນໄຫວວຽກງານຂອງສະຫະພັນກຳມະບານສະພາແຫ່ງຊາດ ໃນໄລຍະສະພາແຫ່ງຊາດ ຊຸດທີ IX. ເພື່ອຜັນຂະຫຍາຍເນື້ອໃນການໂອ້ລົມຂອງຄະນະພັກຂັ້ນເທິງເຂົ້າສູ່ວຽກງານຕົວຈິງ ແລະ ໃຫ້ເປັນຮູບປະທຳ ສະຫະພັນກຳມະບານສະພາແຫ່ງຊາດ ຈະສູ້ຊົນເຮັດສຳເລັດໜ້າທີ່ ຕາມທີ່ພັກມອບໝາຍໃຫ້ ແລະ ຈະພະຍາຍາມປັບປຸງກໍ່ສ້າງສະຫະພັນກຳມະບານສະພາແຫ່ງຊາດ ໃຫ້ສາມາດຮັກສາໄດ້ຂໍ້ແຂ່ງຂັນ 5 ເປັນເຈົ້າ. ກອງປະຊຸມສາມັນຄົບຄະນະບໍລິຫານງານສະຫະພັນກຳມະບານສະພາແຫ່ງຊາດ, ໄດ້ດຳເນີນໄປດ້ວຍບັນຍາກາດຟົດຟື້ນ ແລະ ໄດ້ຮັບຜົນສຳເລັດອັບຈົບງາມຕາມແຜນການທີ່ວາງໄວ້.