ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນລະຫວ່າງວັນທີ 2-4 ສິງຫາ 2022 ຢູ່ຫ້ອງປະຊຸມໃຫຍ່ຫ້ອງວ່າການແຂວງ ໄດ້ເປີດກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວວງ ຊຽງຂວາງ ຊຸດທີ II ໂດຍການເປັນປະທານ ຂອງທ່ານ ບຸນໂຮມ ເທດທານີ ຮອງເລຂາພັກແຂວງ ປະທານສະພາປະຊາຊົນແຂວງ, ໂດຍການໃຫ້ກຽດເຂົ້າຮ່ວມຂອງທ່ານ ບຸນຈັນ ສີວົງພັນ ກໍາມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ, ມີບັນດາທ່ານການນຳ, ອະ​ດີດ​ການ​ນຳພັກ-ລັດ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 9, ສະມາຊິກສະພາປະຊາຊົນແຂວງ, ຄະນະ​ປະ​ຈໍາ​ພັກ​ແຂວງ,ຫົວໜ້າພະ​ແນ​ກ, ອົງການ​ລັດທຽບ​ເທົ່າ​ພະ​ແນ​ກ, ​ແນວ​ລາວ​ສ້າງ​ຊາດ, ອົງການ​ຈັດ​ຕັ້ງ​ຕັ້ງ​ມະຫາຊົນ, ສະຫະພັນ​ນັກຮົບ​​ເກົ່າ, ​ກອງ​ບັນຊາ​ການ​ທະຫານ​ແຂວງ, ກອງ​ບັນຊາ​ການປ້ອງ​ກັນ​ຄວາມ​ສະຫງົບ​ແຂວງ, ສະ​ຖາ​ບັນ​ການ​ສຶກສາ, ລັດ​ວິ​ສາ​ຫະກິດ​ພາຍ​ໃນ​ແຂວງ ​ແລະ ນັກ​ທຸລະ​ກິດ​ຂອງ​ແຂວງ ເຂົ້າຮ່ວມ.

ກອງ​ປະ​ຊຸມ​ສະ​ໄໝ​ສາ​ມັນ ເທື່ອ​ທີ 3 ຂອງ​ສະ​ພາ​ປະ​ຊາ​ຊົນ​ແຂວງຊຸດ​ທີII ຄັ້ງ​ນີ້; ​ໄດ້​ຮັບ​ຟັງ: ບົດ​ລາຍ​ງານ​ໂດຍ​ສັງ​ເຂບຂອງ​ທ່ານ​ເຈົ້າ​ແຂວງກ່ຽວ​ກັບ​ສະ​ພາບ​ພົ້ນ​ເດັ່ນ​ໃນ​ການ​ຈັດ​ຕັ້ງ​ປະ​ຕິ​ບັດ​ແຜນ​ພັດ​ທະ​ນາ​ເສດ​ຖະ​ກິດ​-ສັງ​ຄົມ, ແຜນ​ງົບ​ປະ​ມານ 6 ເດືອນ​ຕົ້ນ​ປີ ແລະ​ ທິດ​ທາງແຜນ​ການ 6 ເດືອນ​ທ້າຍ​ປີ 2022, ບົດ​ລາຍ​ງານກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດແຜນ​ການ​ລົງ​ທຶນແຫ່ງ​ລັດ 6 ເດືອນ​ຕົ້ນ​ປີ ແລະ​ ທິດ​ທາງແຜນ​ການ 6 ເດືອນ​ທ້າຍ​ປີ 2022, ບົດ​ລາຍ​ງານກ່ຽວ​ກັບ​ການ​ຈັດ​ຕັ້ງ​ປະ​ຕິ​ບັດແຜນ​ງົບ​ປະ​ມານ​ແຫ່ງ​ລັດ​ຂັ້ນ​ແຂວງ 6 ເດືອນ​ຕົ້ນ​ປີ ແລະ ​ທິດ​ທາງແຜນ​ການ 6 ເດືອນ​ທ້າຍ​ປີ 2022, ບົດ​ລາຍ​ງານ​ ການ​ຈັດ​ຕັ້ງ​ປະ​ຕິ​ບັດເປົ້າ​ໝາຍການ​ພັດ​ທະ​ນາ​ແບບ​ຍຶນ​ຍົງ(SDGs) ຂອງ​ພະ​ແນກ​ສຶກ​ສາ​ທິ​ການແລະກິ​ລາ,ບົດ​ລາຍ​ງານ​ ການ​ຈັດ​ຕັ້ງ​ປະ​ຕິ​ບັດເປົ້າ​ໝາຍການ​ພັດ​ທະ​ນາ​ແບບ​ຍຶນ​ຍົງ(SDGs) ຂອງ​ພະ​ແນກ​ສາ​ທາ​ລະ​ນະ​ສຸກ​, ບົດ​ລາຍ​ງານ​ ການ​ຈັດ​ຕັ້ງ​ປະ​ຕິ​ບັດແຜນ​ການ​ທ່ອງ​ທ່ຽວຕິດ​ພັນ​ກັບ​ການ​ປ້ອງ​ກັນແລະຄວບ​ຄຸມ, ສະ​ກັດ​ກັ້ນການ​ແຜ່​ລະ​ບາດຂອງ​ພະ​ຍາດ​ໂຄວິດ19,

ບົດ​ລາຍ​ງານຄວາມ​ຄືບ​ໜ້າໃນ​ການ​ຈັດ​ຕັ້ງ​ປະ​ຕິ​ບັດ​ວາ​ລະ​ແຫ່ງ​ຊາດວ່າ​ດ້ວຍການ​ແກ້​ໄຂ​ຄວາມ​  ຫ​ຍຸ້ງ​ຍາກ​ທາງ​ດ້ານ​ເສດ​ຖະ​ກິດ-ການ​ເງິນ, ບົດ​ລາຍ​ງານຄວາມ​ຄືບ​ໜ້າໃນ​ການ​ຈັດ​ຕັ້ງ​ປະ​ຕິ​ບັດ​ວາ​ລະ​ແຫ່ງ​ຊາດວ່າ​ດ້ວຍການ​ແກ້​ໄຂບັນ​ຫາ​ຢາ​ເສບ​ຕິດ, ບົດ​ລາຍ​ງານວຽກ​ງານ​ການ​ປັບ​ປຸງ​ກົງ​ຈັກ​ການ​ຈັດ​ຕັ້ງຂອງ​ອົງ​ການ​ປົກ​ຄອງ​ແຂວງ​, ບົດ​ລາຍ​ງານການ​ກະ​ກຽມ​ຄວາມ​ພ້ອມເປັນ​ເຈົ້າ​ພາບງານ​ມະ​ຫາ​ກຳ​ກິ​ລາ​ແຫ່ງ​ຊາດຄັ້ງ​ທີ XI, ບົດ​ລາຍ​ງານຂອງ​ຄະ​ນະ​ປະ​ຈຳ​ສະ​ພາ​ປະ​ຊາ​ຊົນ​ແຂວງກ່ຽວ​ກັບ​ການ​ເຄື່ອນ​ໄຫວ​ວຽກ​ງານໃນ​ໄລ​ຍະ​ແຕ່ກອງ​ປະ​ຊຸມ​ສະ​ໄໝ​ສາ​ມັນ ເທື່ອ​ທີ 2 ຫາກອງ​ປະ​ຊຸມ​ສະ​ໄໝ​ສາ​ມັນເທື່ອ​ທີ 3 ແລະ ທິດ​ທາງ​ແຜນ​ການ​ ຮອດກອງ​ປະ​ຊຸມ​ສະ​ໄໝ​ສາ​ມັນ ເທື່ອ​ທີ 4 ຂອງ​ສະ​ພາ​ປະ​ຊາ​ຊົນ​ແຂວງຊຸດ​ທີ II ​ໃນ​ທ້າຍ​ປີ 2022, ນອກ​ຈາກ​ນີ້ຍັງ​ຈະ​ໄດ້​ພິ​ຈາ​ລະ​ນາ​ ແລະຮັບ​ຮອງເອົານິ​ຕິ​ກຳ​ໃ​ຕ້​ກົດ​ໝາຍ 1 ສະ​ບັບ​ຄື: ຂໍ້​ຕົກ​ລົງ​ວ່າ​ດ້ວຍການ​ສົ່ງ​ເສີມ, ຄຸ້ມ​ຄອງ​ການ​ລົງ​ທຶນພາຍ​ໃນແລະຕ່າງ​ປະເທດ; ໃນວາລະດໍາເນີນກອງປະຊຸມບັນດາຄະນະປະຈໍາສະພາປະຊາຊົນແຂວບັງໄດ້ປະກອບຄໍາເຫັນໃສ່ບົດລາຍງານການເຄື່ອນໄຫວວຽກງານຂອງແຕ່ລະພາກສ່ວນ. ຕະຫຼອດ​ໄລຍະ​ການ​ດຳ​ເນີນ​ກອງ​ປະຊຸມ ​ເຫັນ​ວ່າ​ບັນດາ​ທ່ານ​ສະມາຊິກ​ສະພາ​ແຫ່ງ​ຊາດ​ ປະຈຳ​ເຂດ​ເລືອກ​ຕັ້ງທີ 9 ​ແລະ ສະມາຊິກ​ສະພາ​ປະຊາຊົ​ນ​ແຂວງ ​ໄດ້​ຍົກ​ສູງ​ຄວາມ​ຮັບຜິດຊອບ​ຕໍ່ໜ້າ​ທີ່​ການ​ເມືອງ​ຂອງ​ຕົນ, ສຸມ​ສະຕິ​ປັນຍາ​ຄົ້ນ​ຄ້ວາ, ປະກອບຄຳ​ຄິດ​ເຫັນ ​ແລະຕັ້ງ​ຄຳ​ຊັກ​ຖາມ​ຢ່າງ​ກົງ​ໄປ​ກົງ​ມາ, ຖືກ​ຕ້ອງ, ສອດຄ່ອງ​ກັບ​ສະພາບ​ຕົວ​ຈິງ

ໃນຕອນທ້າຍຂອງກອງປະຊຸມ ທ່ານ ບຸນໂຮມ ເທດທານີ ໄດ້ມີຄໍາເຫັນໂອ້ລົມຕໍ່ທີ່ປະຊຸມ ​ເຊິ່ງທ່ານໄດ້ຮຽກຮ້ອງ​ມາ​ຍັງ​ອົງການ​ປົກຄອງ​ແຂວງ ​ເອົາ​ໃຈ​ໃສ່​ຊີ້​ນຳ​ທຸກ​ຂົງ​ເຂດ​ວຽກ​ງານ, ພ້ອມ​ກັນ​ຈັດ​ຕັ້ງ​ປະຕິບັດບັນດາ​ມະຕິແລະບັນດາ​ຄາດໝາຍ​ຕ່າງໆທີ່​ວາງ​ໄວ້​ໃຫ້​ສຳ​ເລັດ. ຄຽງ​ຄູ່​ກັນ​ນັ້ນ, ຄະນະ​ປະຈຳ​ສະພາ​ປະຊາຊົນ​ແຂວງ, ສະມາຊິກ​ສະພາ​ແຫ່ງ​ຊາດ​ປະຈຳ​ເຂດ​ເລືອກ​ຕັ້ງ, ສະມາຊິກ​ສະພາ​ປະຊາຊົນ​ແຂວງຕ້ອງ​ສືບ​ຕໍ່​ຊຸກ​ຍູ້, ຕິດຕາມ​ກວດກາທຸກ​ຂົງ​ເຂດ​ວຽກ​ງານ ​ເພື່ອ​ໃຫ້​ບັນລຸ​ຕາມ​ຄາດໝາຍ​ທີ່​ວາງ​ໄວ້, ຍັງ​ຮຽກຮ້ອງ​ມາ​ຍັງ​ບັນດາ​ທ່ານຜູ້​ແທນ​ກອງ​ປະຊຸມຈົ່ງ​ພ້ອມ​ກັນ​ຈັດ​ຕັ້ງ​ປະຕິບັດ​ພາລະ​ບົດບາດ, ສິດ-ໜ້າ​ທີ່ ​ແລະ​ພັນທະ​ຂອງ​ຕົນ​ດ້ວຍ​ຄວາມ​ຮັບຜິດຊອບ​ສູງ, ​ເພື່ອ​ຮັບປະກັນ​ໃຫ້​ແຂວງສືບ​ຕໍ່​ມີ​ສະຖຽນ​ລະ​ພາບ​ທາງ​ດ້ານ​ການ​ເມືອງ, ສັງຄົມ​ມີ​ຄວາມ​ສະຫງົບ​​ເປັນ​ລະບຽບ​ຮຽບຮ້ອຍ​ເສດຖະກິດ​ຂະຫຍາຍຕົວ​ຢ່າງ​ຕໍ່​ເນື່ອງ.

ສະພາປະຊາຊົນແຂວງຊຽງຂວາງ

ຂ່າວ​​ໂດຍ: ນາງສຸກສະຫວັນ ອິນທະແສງ