ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

           ກອງປະຊຸມສະໄຫມສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ໄດ້ອັດລົງດ້ວຍຜົນສຳເລັດອັນຈົບງາມ ໃນວັນທີ 27- 29 ກໍລະກົດ 2022 ພາຍຫຼັງທີ່ ດໍາເນີນມາເປັນເວລາ 3 ວັນເຕັມ. ພາຍໃຕ້ການເປັນປະທານຂອງທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນ ແຂວງຫົວພັນ. ເປັນກຽດເຂົ້າຮ່ວມມີ ທ່ານວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງ, ເຈົ້າແຂວງຫົວພັນ, ບັນດາທ່ານການນຳຂອງແຂວງ, ສະມາຊິກສະພາແຫ່ງຊາດ (ສສຊ) ປະຈຳເຂດເລືອກຕັ້ງທີ 8, ສະມາຊິກສະພາປະຊາຊົນແຂວງ (ສສຂ), ຜູ້ຕາງໜ້າອົງການຈັດຕັ້ງແນວລາວສ້າງຊາດ, ອົງການຈັດຕັ້ງມະຫາຊົນ, ພະແນກການ, ອົງການທຽບເທົ່າ, ສອງກອງບັນຊາການແລະພາກສ່ວນທຸລະກິດຕ່າງໆເຂົ້າຮ່ວມນຳ. ເຊິ່ງກອງປະຊຸມໄດ້ເສີມຂະຫຍາຍສິດປະຊາທິປະໄຕຂອງບັນດາທ່ານສະມາຊິກສະພາປະຊາຊົນແຂວງໃນການພິຈາລະນາແລະຮັບຮອງເອົາບັນດາເນື້ອໃນສໍາຄັນທີ່ໄດ້ມາພິຈາລະນາໃນກອງປະຊຸມ ມີດັ່ງນີ້:
1) ກອງປະຊຸມໄດ້ພິຈາລະນາແລະຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດປະຈຳ 6 ເດືອນຕົ້ນປີແລະທິດທາງແຜນການ 6 ເດືອນທ້າຍປີ 2022;
2) ກອງປະຊຸມໄດ້ພິຈາລະນາແລະຮັບຮອງເອົາບົດລາຍງານຂອງອົງການປົກຄອງແຂວງກ່ຽວກັບຄວາມຄືບໜ້າໃນການຈັດຕັ້ງປະຕິບັດສອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນແລະການແກ້ໄຂບັນຫາຢາເສບຕິດ;
3) ກອງປະຊຸມໄດ້ຮັບຟັງບົດລາຍງານກ່ຽວກັບການຄຸ້ມຄອງສໍາຫຼວດ, ຂຸດຄົ້ນ ແລະ ຂົນສົ່ງແຮ່ທາດແລະບົດລາຍງານກ່ຽວກັບການຄຸ້ມຄອງການສົ່ງເສີມລົງ SME ຢູ່ແຂວງຫົວພັນ;
4) ກອງປະຊຸມພິຈາລະນາ ແລະ ຮັບຮອງເອົາຂໍ້ຕົກລົງຂອງເຈົ້າແຂວງວ່າດ້ວຍການປະເມີນລາຄາທີ່ດິນ ແລະ ຂໍ້ຕົກລົງຂອງເຈົ້າແຂວງວ່າດ້ວຍນະໂຍບາຍສົ່ງເສີມການລົງທຶນສະເພາະກິດຈະການການປູກ – ລ້ຽງເປັນສິນຄ້າ ຢູ່ແຂວງຫົວພັນ;
5) ກອງປະຊຸມຮັບຟັງບົດລາຍງານຂອງອົງການໄອຍະການປະຊາຊົນແຂວງກ່ຽວກັບການຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຕາມມະຕິຂອງສະພາແຫ່ງຊາດສະບັບເລກທີ04/ສພຊ, ລົງວັນທີ 10 ສິງຫາ2021ຕິດພັນກັບການຕິດຕາມກວດກາການນໍາໃຊ້ 7 ມາດຕາການສະກັດຂອງອົງການສືບສວນ-ສອບສວນຕາມທີໄດ້ກໍານົດໄວ້ໃນມາດຕາ 136 ຂອງກົດໝາຍວ່າດ້ວຍການດໍາເນີນຄະດີອາຍາໂດຍສະເພາະການແກ້ໄຂການລະເມີດກົດໝາຍໃນການພາຕົວ, ກັກຕົວ, ຈັບຕົວແລະການກັກຂັງພາງທີ່ບໍ່ຖືກຕ້ອງຕາມກົດໝາຍ;
6) ຮັບຟັງການລາຍງານກ່ຽວກັບການສ້າງຜູ້ພິພາກສາທີີ່ດີແລະເກັ່ງໃນຂົງເຂດສານປະຊາຊົນແຂວງແລະເຂດເຊິ່ງອົງການທີ່ກ່ຽວຂ້ອງ ໄດ້ເອົາໃຈໃສ່ຈັດຕັ້ງປະຕິບັດແຜນການສ້າງຜູ້ພິພາກສາຖືກຕ້ອງຕາມກົດໝາຍຄັດເລືອກເອົາຜູ້ພິພາກສາທີ່ດີ – ເກັ່ງເຂົ້າໃນການຈັດຕັ້ງປະຕິບັດວຽກງານຢູ່ໃນສານປະຊາຊົນແຂວງ ແລະ ເຂດ;
7) ກອງປະຊຸມໄດ້ພິຈາລະນາແລະຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາ 6 ເດືອນຕົ້ນປີແລະແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງ.
ນອກຈາກນີ້ ກອງປະຊຸມຍັງໄດ້ຮັບຟັງການຊີ້ແຈງຕໍ່ຄໍາເຫັນ, ຄໍາຊັກຖາມ ຂອງສະມາຊິກສະພາກແຫ່ງຊາດ ແລະ ສະມາຊິກສະພາປະຊາຊົນແຂວງ ກໍຄືຄໍາຄິດ, ຄໍາເຫັນ ຂອງສັງຄົມ ກໍ່ຄືປະຊາຊົນບັນດາເຜົ່າໃນທົ່ວແຂວງມີຄວາມສົນໃຈ ຈາກທ່ານເຈົ້າແຂວງ, ບັນດາພະແນກການກ່ຽວ ຂ້ອງ ຂອງແຂວງ ແລະ ຫົວໜ້າອົງການໄອຍະການປະຊາຊົນແຂວງ
ກອງປະຊຸມ ສະໄໝສາມັນ ເທື່ອທີ 3 ຂອງສະພາປະຊາຊົນແຂວງ ຊຸດທີ II ໄດ້ຮັບຜົນສໍາເລັດຢ່າງຈົບງາມ ກໍ່ຍ້ອນການຊີ້ນໍາຢ່າງໃກ້ສິດ ຂອງຄະນະປະຈໍາພັກແຂວງ ແລະ ຄວາມຮັບຜິດຊອບ ຂອງອົງການປົກຄອງແຂວງ, ອົງການໄອຍະການປະຊາຊົນແຂວງ, ສານປະຊາຊົນແຂວງ, ແລະ ພາກສ່ວນທີ່ກ່ຽວຂ້ອງ. ທີ່ໄດ້ສະໜອງຂໍ້ມູນ, ເອກະສານ ບົດລາຍງານທີ່ມີເນື້ອໃນສຳຄັນ ໃຫ້ແກ່ສະພາປະຊາຊົນແຂວງໄດ້ຄົ້ນຄວ້າ ແລະ ປະກອບຄວາມເຫັນຢ່າງເລິກເຊິ່ງ ແລະ ກ້າວໄປເຖີງການພິຈາລະນາຮັບຮອງເອົາ.
ກອງປະຊຸມໄດ້ສະແດງຄວາມຂອບໃຈຢ່າງສູງມາຍັງບັນດາທ່ານ ການນຳຂອງແຂວງ, ບັນດາທ່ານແຂກທີ່ມີກຽດ ທີ່ໄດ້ໃຫ້ການຕິດຕາມຢ່າງໃກ້ສິດ ແລະ ເຂົ້າຮ່ວມກອງປະຊຸມໃນຄັ້ງນີ້, ສະແດງຄວາມຂອບໃຈ ພໍ່ແມ່ປະຊາຊົນບັນດາເຜົ່າທົ່ວແຂວງຫົວພັນ ທີ່ໄດ້ເອົາໃຈໃສ່ຕິດຕາມ ແລະ ສົ່ງຄວາມຄິດເຫັນທີ່ເປັນປະໂຫຍດໂດຍຜ່ານໂທລະສັບສາຍດ່ວນ ແລະ ຈາກສື່ຕ່າງໆມາຍັງກອງປະຊຸມ ເຊິ່ງຄວາມຄິດ, ຄວາມເຫັນດັ່ງກ່າວ, ຄະນະປະຈຳສະພາປະຊາຊົນແຂວງ ຈະສືບຕໍ່ປະສານສົມທົບກັບອົງການປົກຄອງແຂວງ ພາກສ່ວນທີ່ກ່ຽວຂ້ອງ ຄົ້ນຄວ້າ, ພິຈາລະນາແກ້ໄຂຕາມຄວາມເໝາະສົມ, ຂໍສະແດງຄວາມຂອບໃຈກຳລັງປ້ອງກັນຊາດ, ປ້ອງກັນຄວາມສະຫງົບ, ສື່ມວນຊົນ, ແພດໝໍ ແລະ ພາກສ່ວນກ່ຽວຂ້ອງ ໄດ້ພ້ອມກັນປະຕິບັດໜ້າທີ່ ຂອງຕົນດ້ວຍຄວາມຮັບຜິດຊອບສູງ ປະກອບສ່ວນເຮັດໃຫ້ກອງປະຊຸມຄັ້ງນີ້ມີຄວາມສະຫງົບປອດໄພ ແລະ ຜົນສຳເລັດຢ່າງຈົບງາມ.
ຜົນສຳເລັດຂອງກອງປະຊຸມຄັ້ງນີ້ ຖືເປັນໝາກຜົນແຫ່ງການເສີມຂະຫຍາຍສະຕິປັນຍາລວມໝູ່ໃນອົງການອຳນາດລັດຂັ້ນແຂວງພວກເຮົາກໍ່ຄືການຍົກສູງຄວາມຮັບຜິດຊອບຄວາມເປັນເຈົ້າການຂອງບັນດາທ່ານສະມາຊິກສະພາປະຊາຊົນແຂວງເຂົ້າໃນການຄົ້ນຄວ້າແລະພິຈາລະນາຮັບຮອງເອົາແຕ່ລະເນື້ອໃນສຳຄັນທີ່ນຳມາພິຈາລະນາໃນກອງປະຊຸມຄັ້ງນີ້ບົນພື້ນຖານຍຶດໝັ້ນຕໍ່ສິດແລະຜົນປະໂຫຍດລວມຂອງແຂວງແລະຂອງປະຊາຊົນບັນດາເຜົ່າໃນທົ່ວ ແຂວງຫົວພັນ.
ພາບ ແລະ ຂ່າວ: ສພຂ