ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າຂອງວັນທີ່ 27 ກໍລະກົດ 2022 ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນແຂວງຫົວພັນ ຊຸດທີ II ໄດ້ໄຂຂຶ້ນຢ່າງເປັນທາງການທີ່ຫ້ອງປະຊຸມຂອງສະພາປະຊາຊົນແຂວງຫົວພັນພາຍໃຕ້ການເປັນປະທານຂອງ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນເປັນກຽດເຂົ້າຮ່ວມ ໂດຍ ທ່ານວັນໄຊ ແພງຊຸມມາ ກຳມະການສູນກາງພັກ, ເລຂາພັກແຂວງເຈົ້າແຂວງແຂວງຫົວພັນ; ມີທ່ານຄຳແພງວິລະພັນກຳມະການຄະນະປະຈຳສະພາແຫ່ງຊາດ, ປະທານກຳມາທິການຍຸຕິທຳສະພາແຫ່ງຊາດ; ບັນດາທ່ານຄະນະປະຈຳພັກແຂວງ; ສະມາຊິກສະພາແຫ່ງຊາດປະຈຳ​ເຂດ​ເລືອກ​ຕັ້ງ​ທີ 8 ​ແຂວງ​ຫົວພັນ; ສະມາຊິກສະພາປະຊາຊົນແຂວງ; ເຈົ້າເມືອງເມືອງຊຳເໜືອ; ຜູ້ຕາງໜ້າອົງການແນວລາວສ້າງຊາດ;ອົງການຈັດຕັ້ງມະຫາຊົນ ແລະ ພະແນກການອ້ອມຂ້າງແຂວງ;ອົງການທຽບເທົ່າ; ສອງກອງບັນຊາການ ແລະ ພາກສ່ວນທຸລະກິດເຂົ້າຮ່ວມ 115 ທ່ານ, ຍິງ 10 ທ່ານ.

ວາລະກອງປະຊຸມ ທ່ານ ນາງອຳໄພວອນ ລ້ອມບຸນແພງກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນໃນນາມປະທານກອງປະຊຸມເປັນກຽດກ່າວເປີດກອງປະຊຸມຢ່າງເປັນທາງການ.ຊຶ່ງເນື້ອໃນບົດສູນທອນພົດກ່າວໄຂກອງປະຊຸມ ຂອງທ່ານປະທານບາງຕອນໄດ້ກ່າວວ່າ: ນັບແຕ່ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຫົວພັນ ຊຸດທີ II ມາຮອດປະຈຸບັນກໍເປັນໄລຍະເວລາ 6 ເດືອນທີ່ສະພາປະຊາຊົນແຂວງໄດ້ເອົາໃຈໃສ່ປະຕິບັດພາລະບົດບາດ, ສິດແລະໜ້າທີ່ຂອງຕົນໃນທ່າມກາງສະພາບສາກົນ,  ພາກພື້ນມີການຜັນແປໄປຢ່າງຢ່າງໄວວາແລະສະຫຼັບຊັບຊ້ອນ, ມີທັງກາລະໂອກາດແລະສິ່ງທ້າທາຍທົດສອບນາໆປະການລວມທັງການແຜ່ລະບາດຂອງພະຍາດໂຄວິດ-19ເກີດຂຶ້ນຢ່າງຕໍ່ເນື່ອງແລະຮ້າຍແຮງແຜ່ຂະຫຍາຍອອກເປັນວົງກ້ວາງໃນທົ່ວໂລກແລະພາຍໃນປະເທດກໍ່ຄືແຂວງຫົວພັນຂອງພວກເຮົາກໍ່ໄດ້ຮັບຜົນກະທົບຢ່າງຫຼີກລຽງບໍ່ໄດ້ເຖິງຢ່າງໃດກໍຕາມໃນໄລຍະ 6 ເດືອນທີ່ຜ່ານມາໂດຍພາຍໃນການນຳພາ – ຊີ້ນໍາຂອງຄະນະບໍລິຫານງານພັກແຂວງຊຸດທີX ສະພາປະຊາຊົນແຂວງໄດ້ປະສານສົມທົບກັບອົງການປົກຄອງແຂວງປຶກສາຫາລືວຽກງານສໍາຄັນຕ່າງໆຂອງທ້ອງຖ່ິນເພື່ອຄວາມເປັນເອກະພາບໃນການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ – ການເງິນໂດຍສະເພາະການເພີ່ມຂຶ້ນຂອງລາຄາສິນຄ້າ, ການເໜັງຕີງຂອງອັດຕາແລກປ່ຽນ, ການສະໜອງນໍ້າມັນບໍ່ພຽງພໍຊຶ່ງມີຜົນກະທົບໂດຍກົງຕໍ່ການດໍາລົງຊິວິດຂອງພະນັກງານ – ລັດຖະກອນແລະປະຊາຊົນບັນດາເຜົ່າ, ພ້ອມນັ້ນຍັງໄດ້ສຸມໃສ່ການຈັດຕັ້ງປະຕິບັດວັດ 2 ວາລະແຫ່ງຊາດກ່ຽວການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນແລະການແກ້ໄຂບັນຫາຢາເສບຕິດດ້ວຍຄວາມຮັບຜິດຊອບສູງໄປພ້ອມກັນນີ້ຍັງໄດ້ເປັນເຈົ້າການຈັດຕັ້ງປະຕິບັດບັນດາຄາດໝາຍໃນມະຕິກອງປະຊຸມໃຫຍ່ຄັ້ງທີ X ຂອງອົງຄະນະພັກແຂວງຫົວພັນແລະແຜນພັດທະນາເສດຖະກິດ – ສັງຄົມຄັ້ງທີ IX  ( 2021-2025)​ແລະ ​ແຜນການ​ເຄື່ອນ​ໄຫວ​ວຽກ​ງານປະ​ຈໍາປີ 2022 ຂອງ​ສະພາ​ປະຊາຊ​ົນ​ແຂວງຕາມທ່າແຮງບົ່ມຊ້ອນຕົວຈິງທີ່ມີແລະການສະໜັບສະໜູນ, ການຊ່ວຍເຫຼືອຈາກອົງການຈັດຕັ້ງພັກ​-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງສັງຄົມທຸກຂັ້ນແລະການຊ່ວຍເຫຼືອຈາກບັນດາປະເທດເພື່ອນມິດຍຸດທະສາດໃນໄລຍະ 6 ເດືອນຜ່ານມາເຮັດໃຫ້ແຂວງຫົວພັນສືບຕໍ່ມີສະຖຽນລະພາບທາງດ້ານການເມືອງຢ່າງໜັກແໜ້ນ, ສັງຄົມມີຄວາມສະຫງົບປອດ​ໄພ, ​ເສດຖະກິດ​ຍັງສືບ​ຕໍ່​ມີ​ການ​ຂະຫຍາຍຕົວ, ຊີ​ວິດ​ການ​ເປັນ​ຢູ່​ຂອງ​ປະຊາຊົນ​ບັນດາເຜົ່າໄດ້​ຮັບ​ການ​ພັດທະນາດີ​ຂຶ້ນ​ເປັນ​ກ້າວໆ, ການ​ພົວພັນ​ຮ່ວມ​ມື​ກັບ​ຕ່າງ​ປະ​ເທດໄດ້ຮັບການເສີມຂະຫຍາຍຢ່າງ​ຕໍ່​ເນື່ອງ ​ແລະແໜ້ນແຟ້ນຂຶ້ນກ່ວາເກົ່າ.

ກອງປະຊຸມສະໄໝສາມັນເທື່ອທີ່ 3 ຂອງສະພາປະຊາຊົນແຂວງຫົວພັນຊຸດທີIIຈະໄດ້ຮັບຟັງການລາຍງານແລະພິຈາລະນາຮັບຮອງເອົາບັນຫາສຳຄັນພື້ນຖານຂອງແຂວງດັ່ງນີ້:

  1. ຮັບຟັງການລາຍງານຂອງເຈົ້າແຂວງກ່ຽວກັບວຽກງານພົ້ນເດັ່ນການຈັດຕັ້ງແຜນພັດທະນາເສດຖະກິດ – ສັງຄົມ, ແຜນງົບປະມານແຫ່ງລັດຫົກເດືອນຕົ້ນປີແລະທິດທາງວຽກງານຈຸດສຸມຫົກເດືອນທ້າຍປີ 2022 ຂອງແຂວງຫົວພັນ;
  2. ພິຈາລະນາແລະຮັບຮອງເອົາບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ – ສັງຄົມຫົກເດືອນຕົ້ນປີແລະທິດທາງແຜນການຫົກເດືອນທ້າຍປີ 2022;
  3. ພິຈາລະນາແລະຮັບຮອງເອົາບົດລາຍງານກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດຫົກເດືອນຕົ້ນປີແລະທິດທາງແຜນການຫົກເດືອນທ້າຍປີ 2022;
  4. ຮັບຟັງການລາຍງານການຈັດຕັ້ງປະຕິບັດສອງວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ – ການເງິນແລະການແກ້ໄຂບັນຫາຢາເສບຕິດຢູ່ແຂວງຫົວພັນ;
  5. ຮັບຟັງການລາຍງານການຄຸ້ມຄອງການສຳຫຼວດ, ຂຸດຄົ້ນແລະຂົນສົ່ງແຮ່ທາດຢູ່ແຂວງຫົວພັນ;
  6. ຮັບຟັງການລາຍງານກ່ຽວກັບການຈັດຕັ້ງປະຕິບັດການຄຸ້ມຄອງການສົ່ງເສີມທຸລະກິດຂະໜາດນ້ອຍແລະກາງSME ຢູ່ແຂວງຫົວພັນ;
  7. ພິຈາລະນາແລະຮັບຮອງເອົາຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍການປະເມີນລາຄາທີ່ດິນຢູ່ແຂວງຫົວພັນແລະຮ່າງຂໍ້ຕົກລົງຂອງເຈົ້າແຂວງວ່າດ້ວຍນະໂຍບາຍສົ່ງເສີມການລົງທຶນສະເພາະກິດຈະການການປູກ – ການລ້ຽງເປັນສິນຄ້າຢູ່ແຂວງຫົວພັນ;
  8. ຮັບຟັງການລາຍງານກ່ຽວກັບການຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດ, ຕິດພັນກັບການຕິດຕາມກວດກາການຈັດຕັ້ງປະຕິບັດການນຳໃຊ້ 7 ມາດຕະການສະກັດກັ້ນຂອງອົງການໄອຍະການປະຊາຊົນແຂວງ;
  9. ຮັບຟັງການລາຍງານກ່ຽວກັບການສ້າງຜູ້ພິພາກສາທີ່ດີແລະເກັ່ງໃນຂົງເຂດສານປະຊາຊົນແຂວງແລະສານປະຊາຊົນເຂດ;
  10. ພິຈາລະນາແລະຮັບຮອງເອົາບົດລາຍງານການເຄື່ອນໄຫວວຽກງານຫົກເດືອນຕົ້ນປີແລະທິດທາງແຜນການຫົກເດືອນທ້າຍປີ 2022 ຂອງສະພາປະຊາຊົນແຂວງຫົວພັນ;
  11. ຮັບຟັງການຊັກຖາມຂອງສະມາຊິກສະພາປະຊາຊົນແຂວງແລະການອະທິບາຍຊີ້ແຈງຕອບຄໍາຊັກຖາມຂອງບັນດາພາກສ່ວນທີ່ກ່ຽວຂ້ອງຈໍານວນໜຶ່ງ.

ກອງປະຊຸມສະໄໝສາມັນ ເທື່ອທີ 3ຂອງສະພາປະຊາຊົນແຂວງຫົວພັນຊຸດທີ II ຄັ້ງນີ້ຈະໄດ້ດຳເນີນເປັນເວລາ3 ວັນເຕັມ ນັບແຕ່ວັນທີ່ 27-29 ກໍລະກົດ 2022ຈຶ່ງສຳເລັດ.

ພາບໂດຍ ເວີນທອງ ແກ້ວບຸນມີ

ຂ່າວໂດຍ ນາງ ປຸ້ຍນິຕາ ເພັງມີໄຊ