ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມສະໄໝສາມັນ ເທື່ອທີ 3 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II​ ໄດ້ດຳເນີນຂຶ້ນໃນຢ່າງເປັນທາງການໃນລະຫວ່າງວັນທີ 21-26 ກໍລະກົດ 2022 ທີ່ຫ້ອງປະຊຸມສຳນັກງານອົງການປົກຄອງ ນະຄອນຫຼວງວຽງຈັນ ໂດຍການເປັນປະທານຂອງທ່ານ ອານຸພາບ ຕຸນາລົມ ຄະນະເລຂາທິການສຸນກາງພັກ, ເລຂາຄະນະພັກ ນວ, ປະທານ ສະພາປະຊາຊົນ ນະຄອນຫຼວງວຽງຈັນ ເຂົ້າຮ່ວມໂດຍ ທ່ານ ປອ. ອາດສະພັງທອງ ສີພັນດອນ ເຈົ້າຄອງນະຄອນຫຼວງ, ມີບັນດາທ່ານສະມາຊິກ ສະພາແຫ່ງຊາດ ປະຈຳເຂດເລືອກຕັ້ງທີ 1, ສະມາຊິກ ສະພາປະຊາຊົນ ນະຄອນຫຼວງ, ຫົວໜ​້າພະແນກການ,​ອົງ​ການທຽບເທົ່າ​ພະແນກ, ແນວລາວສ້ງຊາດ,​ ອົງ​ການຈັດຕັ້ງ​ມະຫາຊົນ, ເຈົ້າເມືອງ, ພາກສ່ວນຂົງເຂດຕຸລາການ ແລະ ພາກສ່ວນກ່ຽວຂ້ອງເຂົ້າຮ່ວມ.

ທ່ານ ອານຸພາບ ຕຸນາລົມ ໄດ້ກ່າວໄຂກອງປະຊຸມຢ່າງເປັນທາງການວ່າ: ປະຕິບັດຕາມ ມາດຕາ 60 ຂອງກົດໝາຍວ່າດ້ວຍສະພາປະຊາຊົນ ຂັ້ນແຂວງ ທີ່ກໍານົດກ່ຽວກັບກອງປະຊຸມສະໄໝສາມັນ ປະຈໍາຫົກເດືອນຕົ້ນປີ ຂອງສະພາປະຊາຊົນ ນະຄອນຫຼວງວຽງຈັນ, ມື້ນີ້ ກອງປະຊຸມສະໄໝສາມັນ ເທື່ອທີ 03 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ໄດ້ໄຂຂຶ້ນຢ່າງເປັນທາງການ ໃນທ່າມກາງບັນຍາກາດທີ່ທົ່ວພັກ-ລັດ, ທົ່ວກໍາລັງປະກອບອາວຸດ ແລະ ທົ່ວປວງຊົນ ຊາວນະຄອນຫຼວງວຽງຈັນ ພວມສຸມໃສ່ຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນະຄອນຫຼວງ, ບັນດາມະຕິຂອງກອງປະຊຸມສະໄໝສາມັນ ເທື່ອທີ 02 ຂອງສະພາປະຊາຊົນ ນະຄອນຫຼວງວຽງຈັນ, ໂດຍສະເພາະແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2022 ທີ່ຕິດພັນກັບການຈັດຕັ້ງປະຕິບັດ 02 ວາລະແຫ່ງຊາດ ແລະ ການຟື້ນຟູຜົນກະທົບຈາກການແຜ່ລະບາດຂອງພະຍາດໂຄວິດ-19 ໃຫ້ຄືນສູ່ສະພາບປົກກະຕິ.

ໃນໄລຍະ 06 ເດືອນຕົ້ນປີຜ່ານມາ ບັນດາອົງການຈັດຕັ້ງລັດ ອ້ອມຂ້າງນະຄອນຫຼວງວຽງຈັນ ໄດ້ສຸມໃສ່ຈັດ ຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2022 ຕາມມະຕິກອງປະຊຸມ ສະໄໝສາມັນ ເທື່ອທີ 02 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຮັບຮອງເອົາ, ເຖິງວ່າພວກເຮົາກໍາລັງຢູ່ໃນຊ່ວງໄລຍະເວລາທີ່ມີຄວາມຫຍຸ້ງຍາກທີ່ສຸດ ຂອງການພັດທະນາເສດຖະກິດ-ສັງຄົມ ໃນຫຼາຍຂົງເຂດ, ຫຼາຍລະດັບ ລວມທັງບັນດາຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍຫຼາຍປະການ ເປັນຕົ້ນສະພາບການແຜ່ລະບາດ ຂອງພະຍາດໂຄວິດ-19, ບັນດາຂໍ້ຂັດແຍ່ງຢູ່ໃນພາກພື້ນ ແລະ ສາກົນ, ອັດຕາເງິນເຟີ້, ການຂາດແຄນເງິນຕາ ແລະ ບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ, ການເພີ່ມຂຶ້ນຂອງລາຄາສິນຄ້າ ແລະ ນໍ້າມັນເຊື້ອໄຟ ເຊິ່ງໄດ້ສົ່ງຜົນກະທົບ ຕໍ່ ສປປ ລາວ ໃນຂອບເຂດທົ່ວປະເທດ, ໂດຍສະເພາະນະຄອນຫຼວງວຽງຈັນ ເປັນຈໍານວນບໍ່ໜ້ອຍ. ແຕ່ເຖິງຢ່າງໃດກໍຕາມ, ພາຍໃຕ້ການຊີ້ນໍາ-ນໍາພາ ຂອງອົງຄະນະພັກ, ອົງການປົກຄອງ, ສະພາປະຊາຊົນ ນະຄອນຫຼວງ ໄດ້ເຮັດໃຫ້ການ ຈັດຕັ້ງປະຕິບັດບັນດາຄາດໝາຍ ໃນແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ 2022 ກໍຄືການປະຕິບັດ 02 ວາລະແຫ່ງຊາດ ທີ່ສະພາປະຊາຊົນຮັບຮອງເອົາ ໃຫ້ມີຄວາມຄືບໜ້າເປັນຢ່າງດີ, ເຊິ່ງສາມາດບັນລຸຄາດໝາຍ ທາງດ້ານເສດຖະກິດຈໍານວນໜຶ່ງ, ການຈັດຕັ້ງປະຕິບັດມາດຕະການປ້ອງກັນໂຄວິດ-19 ຢ່າງຈິງຈັງ ເຮັດໃຫ້ການແຜ່ລະບາດຂອງພະຍາດໂຄວິດ-19 ຫຼຸດລົງ ແລະ ສາມາດຄວບຄຸມໄດ້. ການພັດທະນາຂອງນະຄອນຫຼວງ ສືບຕໍ່ມີສະຖຽນລະພາບທາງດ້ານການເມືອງທີ່ໜັກແໜ້ນ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍໂດຍພື້ນຖານ, ມີສະພາບແວດລ້ອມ ແລະ ເງື່ອນໄຂ ທີ່ເອື້ອອໍານວຍໃຫ້ແກ່ການພັດທະນາ ນະຄອນຫຼວງວຽງຈັນ ໄດ້ກັບເຂົ້າສູ່ສະພາບເກືອບປົກກະຕິ ແລະ ຄ່ອຍໆດີຂຶ້ນເທື່ອລະກ້າວ.

ກອງປະຊຸມ ສະໄໝສາມັນ ເທື່ອທີ 03 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ຄັ້ງນີ້ ຈະໄດ້ພິຈາລະນາຮັບຮອງເອົາບັນດາເນື້ອໃນທີ່ສໍາຄັນ ດັ່ງນີ້:
1. ພິຈາລະນາ ແລະ ຮັບຮອງເອົາ ບົດລາຍງານຂອງທ່ານເຈົ້າຄອງ ນະຄອນຫຼວງວຽງຈັນ ກ່ຽວກັບຜົນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງນະຄອນຫຼວງວຽງຈັນ;
2. ຮັບຟັງການສະເໜີ ເພື່ອທາບທາມຄໍາຄິດຄໍາເຫັນກ່ຽວກັບ ບົດລາຍງານຄວາມຄືບໜ້າ ໃນການປັບປຸງຮ່າງ ແຜນຈັດສັນທີ່ດິນ, ຄຸ້ມຄອງຊັບພະຍາກອນທໍາມະຊາດ ແລະ ສິ່ງແວດລ້ອມ ແບບຮອບດ້ານ ຂອງນະຄອນຫຼວງວຽງ ຈັນ;
3. ຮັບຟັງການລາຍງານຊີ້ແຈງ ບາງວຽກງານສໍາຄັນ ຂອງອົງການປົກຄອງ ນະຄອນຫຼວງວຽງຈັນ ດັ່ງນີ້:
1) ບັນຫາການຄວບຄຸມລາຄາສິນຄ້າ, ແຜນການຄຸ້ມຄອງລາຄາສິນຄ້າໃນອະນາຄົດ ແລະ ການສົ່ງເສີມ ການຜະລິດ ເປັນສິນຄ້າພາຍໃນ;
2) ບັນຫາຄວາມຊັກຊ້າ ການຈັດຕັ້ງປະຕິບັດໂຄງການ ກໍ່ສ້າງເສັ້ນທາງແຕ່ບ້ານດອນນົກຂຸ້ມ ຫາ ບ້ານສ້າງເຫວີຍ ແລະ ບ້ານດົງສະຫວາດ;
3) ບັນຫານໍ້າຖ້ວມຂັງ ຈາກໂຄງການກໍ່ສ້າງເສັ້ນທາງເລກທີ 13 ເໜືອ, ໂຄງການກໍ່ສ້າງເສັ້ນທາງດ່ວນ ວຽງຈັນ-ວັງວຽງ ແລະ ໂຄງການທາງລົດໄຟລາວ-ຈີນ ໃນຂອບເຂດເມືອງນາຊາຍທອງ;
4) ບັນຫາການຊົດເຊີຍທີ່ດິນ ໃຫ້ແກ່ຜູ້ຖືກຜົນກະທົບ ຈາກໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ;
5) ບັນຫາການຈັດຕັ້ງປະຕິບັດ ໂຄງການນໍ້າເປື້ອນນະຄອນຫຼວງວຽງຈັນ ພາຍໃຕ້ເງິນກູ້ລັດຖະບານຮົງກາລີ;
6) ບັນຫາການແກ້ໄຂ ການອອກໃບຕາດິນຊັກຊ້າ ຕາມຫາງສຽງຂອງປະຊາຊົນ;
7) ບັນຫາການລົບລ້າງໃບຕາດິນ ຈໍານວນ 17 ຕອນບຶງສາລາຄໍາ, ເຂດສໍາປະທານຂອງບໍລິສັດມິດຕະພາບການກະເສດ;
8) ບັນຫາການຄຸ້ມຄອງຄົນຕ່າງປະເທດ ຢູ່ນະຄອນຫຼວງວຽງຈັນ;
9) ຮັບຟັງການລາຍງານຊີ້ແຈງ ກ່ຽວກັບການແກ້ໄຂບັນຫາກອງທຶນຢາເສບຕິດ ນະຄອນຫຼວງວຽງຈັນ;
10) ຮັບຟັງການລາຍງານ ຂອງກອງບັນຊາການປ້ອງກັນຄວາມສະຫງົບ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021, ໂດຍລົງເລິກ 6 ວຽກຈຸດສຸມຕາມສິດ ແລະ ໜ້າທີ່ຂອງຕົນ ແລະ ການດໍາເນີນຄະດີຢາເສບຕິດ;
11) ຮັບຟັງການລາຍງານ ຂອງພະແນກຍຸຕິທໍາ ກ່ຽວກັບການຈັດຕັ້ງປະຕິບັດ ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021.
4. ພິຈາລະນາ ແລະ ຮັບຮອງເອົາບົດລາຍງານຜົນການຈັດຕັ້ງປະຕິບັດ ແຜນການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງສະພາປະຊາຊົນ ນະຄອນຫຼວງວຽງຈັນ;
5. ຮັບຟັງການລາຍງານ ການຕິດຕາມກວດກາການນໍາໃຊ້ 07 ມາດຕະການສະກັດກັ້ນ ຂອງອົງການສືບ ສວນ-ສອບສວນ ຕາມທີ່ໄດ້ກໍານົດໄວ້ໃນມາດຕາ 136 ຂອງກົດໝາຍວ່າດ້ວຍ ການດໍາເນີນຄະດີອາຍາ ໂດຍສະ ເພາະການແກ້ໄຂການລະເມີດກົດໝາຍໃນການພາງຕົວ, ກັກຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ ໃນໄລຍະ 06 ເດືອນຕົ້ນປີ 2022 ຂອງອົງການໄອຍະການປະຊາຊົນ ນະຄອນຫຼວງວຽງຈັນ;
6. ຮັບຟັງການລາຍງານ ຂອງອົງການໄອຍະການປະຊາຊົນ ນະຄອນຫຼວງວຽງຈັນ ກ່ຽວກັບການຈັດຕັ້ງປະຕິ ບັດ ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງເຈົ້າຄອງນະຄອນຫຼວງວຽງຈັນ ສະ ບັບເລກທີ 841/ຈນວ, ລົງວັນທີ 25 ຕຸລາ 2021. ໂດຍລົງເລິກການດໍາເນີນຄະດີຢາເສບຕິດ ຢູ່ນະຄອນຫຼວງ;
7. ຮັບຟັງກາລາຍງານ ຂອງສານປະຊາຊົນ ນະຄອນຫຼວງວຽງຈັນ ກ່ຽວກັບການຈັດຕັ້ງປະຕິບັດ ວາລະແຫ່ງ ຊາດ ກ່ຽວກັບການແກ້ໄຂບັນຫາຢາເສບຕິດ ຕາມຂໍ້ຕົກລົງ ຂອງທ່ານເຈົ້າຄອງ ນະຄອນຫຼວງວຽງຈັນ ສະບັບເລກທີ 841/ຈນວ, ລົງວັນທີ 25 ຕຸລາ 2021, ໂດຍລົງເລິກການດໍາເນີນພິຈາລະນາຕັດສິນຄະດີຢາເສບຕິດ;
8. ພິຈາລະນາ ແລະ ຮັບຮອງເອົາ ການສະເໜີແຕ່ງຕັ້ງບຸກຄະລາກອນ ຂອງອົງການປົກຄອງນະຄອນຫຼວງ ຈໍາ ນວນໜຶ່ງ.

(ນາງ ພອນທິບ ອິນທິລາດ)