ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ວັນທີ 18 ກໍລະກົດ 2022 ຢູ່ທີ່ຫ້ອງປະຊຸມສຳນັກງານຫ້ອງວ່າການ ນະຄອນຫຼວງວຽງຈັນ ທ່ານ ນະຄະເສນ ສີຫາລາດ, ກຳມະການຄະນະປະຈໍາ, ເລຂາທິການ ສະພາປະຊາຊົນ ນະຄອນຫຼວງວຽງຈັນ ຖະແຫຼງຂ່າວຕໍ່ສື່ມວນຊົນເພື່ອແຈ້ງມາຍັງບັນດາທ່ານ ພະນັກງານ-ລັດຖະກອນ, ທະຫານ-ຕຳຫຼວດ ນັກສຶກສາ, ປັນຍາຊົນ, ກຳ ມະກອນຊາວຜູ້ອອກແຮງງານ ຕະຫຼອດຮອດ ພໍ່ແມ່ປະຊາຊົນບັນດາເຜົ່າ ຊາວນະຄອນຫຼວງວຽງຈັນ ເພື່ອຊາບກ່ຽວກັບການກະກຽມ ດຳເນີນກອງປະຊຸມ ສະໄໝສາມັນ ເທື່ອທີ 03 ຂອງສະພາປະຊາຊົນ ນະຄອນຫຼວງວຽງຈັນ ຊຸດທີ II ເຊິ່ງມາເຖິງປະຈຸບັນນີ້ ການກະກຽມຄວາມພ້ອມໃນດ້ານຕ່າງໆ ຂອງກອງປະຊຸມ ແມ່ນມີຄວາມຄົບຖ້ວນ, ສອດຄ່ອງກັບກົດໝາຍ ດັ່ງລາຍລະອຽດລຸ່ມນີ້: ກອງປະຊຸມ ສະໄໝສາມັນ ເທື່ອທີ 03 ຂອງສະພາປະຊາຊົນ ນະຄອນຫຼວງວຽງຈັນ ໃນຄັ້ງນີ້ ຈະດໍາເນີນຂຶ້ນໃນລະຫວ່າງວັນທີ 21-26 ກໍລະກົດ 2022, ຈໍານວນ 04 ວັນທາງລັດຖະການ ຢູ່ທີ່ຫ້ອງປະຊຸມສຳນັກງານອົງການປົກຄອງ ນະຄອນຫຼວງວຽງຈັນ, ກອງປະຊຸມຄັ້ງນີ້ເປັນກອງປະຊຸມທີ່ມີຄວາມໝາຍສຳຄັນຫຼາຍຢ່າງຫຍິ່ງ ເປັນການຢັ້ງຢືນເຖິງຄວາມເປັນເອກະພາບ ແລະ ຄວາມເຊື່ອນໝັ້ນ ຂອງປວງຊົນ ຊາວນະຄອນຫຼວງ ຕໍ່ການນຳພາ ຂອງພັກ-ລັດ ແມ່ນໝາກຜົນແຫ່ງການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກ ນະຄອນຫຼວງວຽງຈັນ ແລະ ເປັນການສະຫຼຸບຕີລາຄາຄືນກ່ຽວກັບການຈັດຕັ້ງປະຕິບັດພາລະບົດບາດການຕິດຕາມກວດ ກາການຈັດຕັ້ງປະຕິບັດ ລັດຖະທຳມະນູນ, ກົດໝາຍ, ແຜນພັດທະນາເສດ ຖະກິດ-ສັງຄົມ, ແຜນງົບປະມານແຫ່ງລັດ ແລະ ບັນດານິຕິກຳຕ່າງໆ ໃນໄລຍະ 06 ເດືອນຕົ້ນປີ 2022 ຜ່ານມາ.
ປະຕິບັດຕາມມາດຕາ 60 ຂອງກົດໝາຍວ່າດ້ວຍການປັບປຸງບາງມາດຕາ ຂອງກົດໝາຍວ່າດ້ວຍສະພາແຫ່ງຊາດ ແລະ ສະພາປະຊາຊົນ ຂັ້ນແຂວງ ສະບັບເລກທີ 82/ສພຊ, ລົງວັນທີ 30 ມິຖຸນາ 2020, ກອງປະຊຸມຄັ້ງນີ້ ຈະໄດ້ພິຈາລະນາ ແລະ ຮັບຮອງເອົາ ບັນຫາສຳຄັນພື້ນຖານ ຂອງ ນະຄອນຫຼວງວຽງຈັນ ດັ່ງນີ້:
1. ພິຈາລະນາ ແລະ ຮັບຮອງເອົາ ບົດລາຍງານ ຂອງທ່ານເຈົ້າຄອງ ນະຄອນຫຼວງວຽງຈັນ ກ່ຽວກັບຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງນະຄອນຫຼວງວຽງຈັນ.
2. ຮັບຟັງການລາຍງານຊີ້ແຈງບາງວຽກງານສຳຄັນ ຂອງອົງການປົກຄອງ ນະຄອນຫຼວງວຽງຈັນ ດັ່ງນີ້:
1) ບັນຫາການຄວບຄຸມລາຄາສິນຄ້າ, ແຜນການຄຸ້ມຄອງລາຄາສິນຄ້າໃນອານາຄົດ ແລະ ການສົ່ງເສີມການຜະລິດເປັນສິນຄ້າພາຍໃນ.
2) ບັນຫາຄວາມຊັກຊ້າການຈັດຕັ້ງປະຕິບັດໂຄງການ ກໍ່ສ້າງເສັ້ນທາງແຕ່ ບ້ານດອນນົກຂຸ້ມ ຫາບ້ານສ້າງເວີຍ ແລະ ບ້ານດົງສະຫວາດ.
3) ບັນຫາການແກ້ໄຂນໍ້າຖວມຂັງ ຈາກໂຄງການກໍ່ສ້າງເສັ້ນທາງເລກທີ 13 ເໜືອ ແລະ ໂຄງການກໍ່ສ້າງເສັ້ນ ທາງດ່ວນວຽງຈັນ-ວັງວຽງ, ໂຄງການທາງລົດໄຟລາວ-ຈີນ ໃນຂອບເຂດເມືອງນາຊາຍທອງ.
4) ບັນຫາການຊົດເຊີຍທີ່ດິນ ໃຫ້ແກ່ຜູ້ທີ່ຖືກຜົນກະທົບຈາກໂຄງການທ່າບົກ-ທ່ານາແລ້ງ ແລະ ເຂດໂລຈິສຕິກ.
5) ບັນຫາຄວາມຄືບໜ້າການຈັດຕັ້ງປະຕິບັດໂຄງການນ້ຳເປື້ອນ ນະຄອນຫຼວງວຽງຈັນ ພາຍໃຕ້ເງິນກູ້ລັດຖະ ບານຮົງກາລີ.
6) ບັນຫາການແກ້ໄຂການອອກໃບຕາດິນຊັກຊ້າ ຕາມຫາງສຽງຂອງປະຊາຊົນ.
7) ບັນຫາການລົບລ້າງໃບຕາດິນ ຈຳນວນ 17 ຕອນ ເຂດບຶງສາລະຄຳ, ເຂດສຳປະທານ ຂອງບໍລິສັດມິດຕະ ພາບການກະເສດ.
8) ບັນຫາການຄຸ້ມຄອງຄົນຕ່າງປະເທດ ຢູ່ນະຄອນຫຼວງວຽງຈັນ (ຍົກໃຫ້ເຫັນເຖິງການຄຸ້ມຄອງຕົວຈິງ, ບັນຫາທີ່ເກີດຂຶ້ນ, ຂໍ້ສະດວກ ແລະ ຂໍ້ຫຍຸ້ງຍາກ ໃນການຄຸ້ມຄອງ, ການຕິດຕາມກວດກາ ແລະ ການແກ້ໄຂບັນຫາ ໂດຍສະເພາະທາງດ້ານນິຕິກຳ).
9) ຮັບຟັງການລາຍງານຊີ້ແຈງກ່ຽວກັບການແກ້ໄຂບັນຫາກອງທຶນຢາເສບຕິດ ນຄອນຫຼວງວຽງຈັນ (ຍົກໃຫ້ເຫັນເຖິງທີ່ມາຂອງກອງທຶນ, ການນຳຈໍານວນເງິນຄືນ, ການຄຸ້ມຄອງ ແລະ ການນໍາໃຊ້ ໂດຍສະເພາະແມ່ນການນໍາໃຊ້ ເຂົ້າໃນການບໍາບັດຜູ້ຕິດຢາເສບຕິດ ເກີດຜົນຫຍັງແດ່).
10) ຮັບຟັງການລາຍງານ ຂອງກອງບັນຊາການປ້ອງກັນຄວາມສະຫງົບ ກ່ຽວກັບການຈັດຕັ້ງຜັນຂະຫຍາຍ ການຈັດຕັ້ງວາລະແຫ່ງຊາດວ່າດ້ວຍການແກ້ໄຂຢາເສບຕິດ ຢູ່ນະຄອນຫຼວງ ຕາມຂໍ້ຕົກລົງຂອງ ທ່ານເຈົ້າຄອງ ນະຄອນ ຫຼວງ ສະບັບເລກທີ 841/ຈນວ, ລົງວັນທີ 25 ຕຸລາ 2021 (ລົງເລກິ 06 ວຽກຈຸດສຸມຕາມສິດ ແລະ ໜ້າທີ່ຂອງຕົນ ແລະ ການດຳເນີນຄະດີຢາເສບຕິດ, ໃນນັ້ນ ຍົກໃຫ້ເຫັນເຖິງຂັ້ນຕອນວິທີການດຳເນີນຄະດີ, ຈຳນວນຄະດີ, ຜູ້ຖຶກຫາ ແລະ ຂອງກາງ).
11) ຮັບຟັງການລາຍງານ ຂອງພະແນກຍຸຕິ ກ່ຽວກັບການຈັດຕັ້ງຜັນຂະຫຍາຍ ການຈັດຕັ້ງວາລະແຫ່ງຊາດວ່າດ້ວຍການແກ້ໄຂຢາເສບຕິດ ຢູ່ນະຄອນຫຼວງ ຕາມຂໍ້ຕົກລົງຂອງ ທ່ານເຈົ້າຄອງ ນະຄອນຫຼວງ ສະບັບເລກທີ 841/ຈນວ, ລົງວັນທີ 25 ຕຸລາ 2021.
3. ພິຈາລະນາ ແລະ ຮັບຮອງເອົາ ບົດລາຍງານຜົນການຈັດຕັ້ງປະຕິບັດ ແຜນການເຄື່ອນໄຫວວຽກງານ 06 ເດືອນຕົ້ນປີ ແລະ ທິດທາງແຜນການ 06 ເດືອນທ້າຍປີ 2022 ຂອງ ສະພາປະຊາຊົນ ນະຄອນຫຼວງວຽງຈັນ.
4. ຮັບຟັງການລາຍງານ ການຕິດຕາມກວດກາການນຳໃຊ້ 07 ມາດຕະການ ສກັດກັ້ນ ຂອງອົງການສືບສວນ-ສອບສວນ ຕາມທີ່ກຳນົດໄວ້ໃນມາດຕາ 136 ຂອງກົດໝາຍວ່າດ້ວຍການດຳເນີນຄະດີອາຍາ ໂດຍສະເພາະການແກ້ໄຂການລະເມີດກົດໝາຍໃນການພາຕົວ, ກັຕົວ, ຈັບຕົວ ແລະ ການກັກຂັງພາງ ທີ່ບໍ່ຖືກຕ້ອງຕາມກົດໝາຍ ໃນໄລຍະ 06 ເດືອນຕົ້ນປີ 2022 ຂອງອົງການໄອຍາການ ປະຊາຊົນ ນະຄອນຫຼວງວຽງຈັນ.
5. ຮັບຟັງການລາຍງານ ຂອງອົງການໄອຍາການປະຊາຊົນ ນະຄອນຫຼວງວຽງຈັນ ກ່ຽວກັບການຈັດຕັ້ງຜັນຂະຫຍາຍ ການຈັດຕັ້ງວາລະແຫ່ງຊາດວ່າດ້ວຍການແກ້ໄຂຢາເສບຕິດ ຢູ່ນະຄອນຫຼວງ ຕາມຂໍ້ຕົກລົງຂອງ ທ່ານເຈົ້າຄອງ ນະຄອນຫຼວງ ສະບັບເລກທີ 841/ຈນວ, ລົງວັນທີ 25 ຕຸລາ 2021 (ລົງເລິກການດຳເນີນຄະດີຢາເສບຕິດ ໂດຍຍົກໃຫ້ເຫັນຈໍານວນຄະດີ ແລະ ການອອກຄໍາສັ່ງຕ່າງໆ).
6. ຮັບຟັງການລາຍງານ ຂອງສານປະຊາຊົນ ນະຄອນຫຼວງວຽງຈັນ ກ່ຽວກັບການຈັດຕັ້ງຜັນຂະຫຍາຍ ການຈັດຕັ້ງວາລະແຫ່ງຊາດວ່າດ້ວຍການແກ້ໄຂຢາເສບຕິດ ຢູ່ນະຄອນຫຼວງ ຕາມຂໍ້ຕົກລົງຂອງ ທ່ານເຈົ້າຄອງ ນະຄອນ ຫຼວງ ສະບັບເລກທີ 841/ຈນວ, ລົງວັນທີ 25 ຕຸລາ 2021.(ລົງເລິກການດຳເນີນຄະດີຢາເສບຕິດ).
ນອກຈາກບັນດາເນື້ອໃນທີ່ກ່າວມາຂ້າງເທິງນີ້ແລ້ວ ກອງປະຊຸມຍັງຈະໄດ້ ຮັບຟັງການລາຍງານຊີ້ແຈງ ຈາກສະມາຊິກອົງການປົກຄອງ ນະຄອນຫຼວງ ຕໍ່ຄຳຊັກຖາມຂອງ ບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນ ຢູ່ໃນກອງປະຊຸມຕື່ມອີກ.
ເປົ້າໝາຍທີ່ເຂົ້າຮ່ວມກອງປະຊຸມໃນຄັ້ງນີ້ ປະກອບດ້ວຍສະມາຊິກສະແຫ່ງຊາດ, ສະມາຊິກສະພາປະຊາຊົນ ທ່ານເຈົ້າຄອງ-ຮອງເຈົ້າຄອງ, ສະມາຊິກອົງການປົກຄອງ, ອົງການລັດທຽບເທົ່າພະແນກ ຂັ້ນນະຄອນຫຼວງ, ພາກສ່ວນຂົງເຂດຕຸລາການ, ແນວລາວສ້າງຊາດ, ອົງການຈັດຕັ້ງມະຫາຊົນ, ເຈົ້າເມືອງ, ບັນດາພາກສ່ວນທຸລະກິດ ແລະ ພາກສ່ວນຮັບຜິດຊອບທີ່ກ່ຽວຂ້ອງ ເຂົ້າຮ່ວມ ປະມານ 150 ກວ່າທ່ານ.
ອີກເທື່ອໜຶ່ງ ໃນນາມຕາງໜ້າຄະນະປະຈຳ ສະພາປະຊາຊົນ ນະຄອນຫຼວງ ຂໍເຊີນຊວນບັນດາອົງການຈັດຕັ້ງພັກ-ລັດ, ພະນັກງານ, ທະຫານ, ຕຳຫຼວດ, ອົງການຈັດຕັ້ງສັງຄົມທຸກພາກສ່ວນ ຕະຫຼອດຮອດພໍ່ແມ່ປະຊາຊົນ ບັນດາເຜົ່າຊາວນະຄອນຫຼວງວຽງຈັນ ຈົ່ງໃຫ້ການຕິດຕາມຂ່າວສານຜ່ານສື່ສິ່ງພິມ, ສື່ອີເລັກໂຕນິກ, ວິທະຍຸກະຈາຍສຽງ, ໂທລະພາບແຫ່ງຊາດ ແລະ ໂທລະພາບນະຄອນຫຼວງວຽງຈັນ ທີ່ຈະເຜີຍແຜ່ໃຫ້ບັນດາທ່ານໄດ້ຮັບຊາບຢ່າງກວ້າງຂວາງ.
ນອກຈາກນັ້ນ, ບັນດາທ່ານສາມາດມີຄໍາເຫັນ ຫລື ຄໍາສະເໜີ ຜ່ານທາງໂທລະສັບສາຍດ່ວນໝາຍເລກ 021 260 242 ຫຼື 1156 ຂອງສະພາປະຊາຊົນ ສະພາປະຊາຊົນ ນະຄອນຫຼວງວຽງຈັນ ໃນຄັ້ງນີ້ດ້ວຍ.