ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຫຼວງນໍ້າທາ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 24 ທັນວາ 2024 ຢູ່ທີ່ສະໂມສອນຂອງແຂວງ ພາຍໃຕ້ການເປັນປະທານຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງຫຼວງນໍ້າ ທາ,ໂດຍການໃຫ້ກຽດເຂົ້າຮ່ວມຂອງ ທ່ານ ວຽງສະຫວັດ ສີພັນດອນ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆຫຼວງນໍ້າທາ ແລະ ທ່ານ ພົຕ. ປອ ວົງສັກ ພັນທະວົງ ກໍາມະການຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ ສະພາແຫ່ງຊາດ, ສະມາຊິກສະພາແຫ່ງຊາດປະຈໍາເຂດເລືອກຕັ້ງ ທີ 3 ແຂວງຫຼວງນໍ້າທາ, ມີບັນດາທ່ານຮອງເລຂາພັກແຂວງ, ຮອງເຈົ້າແຂວງ, ອະດີດການນໍາພັກ-ລັດ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ອົງການກວດສອບປະຈໍາພາກເໜືອ-2, ເຈົ້າເມືອງ, ພະແນກການອ້ອມຂ້າງແຂວງ, ອົງການລັດທຽບເທົ່າພະແນກຂັ້ນແຂວງ ພ້ອມດ້ວຍແຂກຖືກເຊີນ ເຂົ້າຮ່ວມ 150 ກວ່າທ່ານ.
ປະຕິບັດຕາມລັດຖະທໍາມະນູນ ແລະ ກົດໝາຍວ່າດ້ວຍສະພາປະຊາຊົນຂັ້ນແຂວງ, ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງ ຈະໄດ້ດໍາເນີນເປັນເວລາ 4 ວັນ (ແຕ່ວັນທີ 24-27 ທັນວາ 2024) ເພື່ອຮັບຟັງລາຍງານ ແລະ ພິຈາລະນາຮັບຮອງເອົາເນື້ອໃນສໍາຄັນ ຄື ບົດລາຍງານຂອງເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ປະຈໍາປີ 2024 ແລະ ແຜນການປະຈໍາປີ 2025 ຂອງແຂວງ;ບົດລາຍງານກ່ຽວກັບແຜນການຈັດສັນໂຄງການລົງທຶນຂອງລັດ ປະຈໍາປີ 2025 ຂອງແຂວງ;ບົດລາຍງານກ່ຽວກັບ ແຜນດັດແກ້ງົບປະມານ 6 ເດືອນທ້າຍປີ 2024 ແລະ ແຜນຄາດຂະເນການຈັດສັນງົບປະມານ ປະຈໍາປີ 2025 ຂອງແຂວງ;ບົດລາຍງານຂອງອົງການກວດກາລັດ ກ່ຽວກັບການຈັດຕັ້ງປະຕິບັດແຜນການເຄື່ອນ ໄຫວວຽກງານປະຈໍາປີ 2024, ທິດທາງແຜນການປະຈໍາປີ 2025 ແລະ ຜົນການກວດກາ ຕາມຜົນຂອງການກວດສອບ ປີ 2022;ບົດລາຍງານ ຂອງອົງການກວດສອບປະຈໍາພາກເໜືອ-2 ກ່ຽວກັບຈັດຕັ້ງປະຕິບັດແຜນການ ເຄື່ອນໄຫວວຽກງານປະຈໍາປີ 2024, ທິດທາງແຜນການ ປະຈໍາປີ 2025 ແລະ ຜົນການກວດສອບບົດສະຫຼຸບຂາດຕົວ ການຈັດຕັ້ງປະຕິບັດແຜນງົບປະມານ ປະຈໍາປີ 2023 ຂອງແຂວງຫຼວງນໍ້າທາ;ບົດລາຍງານກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ຂອງອົງການໄອຍະການປະຊາຊົນ ແລະ ສານປະຊາຊົນແຂວງ;ບົດລາຍງານກ່ຽວກັບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈໍາປີ 2024 ແລະ ທິດທາງແຜນການ ປະຈໍາປີ 2025 ຂອງສະພາປະຊາຊົນແຂວງ;ບົດລາຍງານ ກ່ຽວກັບການເຄື່ອນໄຫວວຽກງານຂອງຄະນະປະຈໍາສະພາປະຊາຊົນແຂວງ ໃນລະຫວ່າງສອງກອງປະຊຸມ (ກອງປະຊຸມສະໄໝສາມັນເທື່ອທີ 7 ຫາເທື່ອທີ 8);ບົດປະກອບຄໍາເຫັນ ຂອງອົງການແນວລາວສ້າງຊາດແຂວງ ກ່ຽວກັບການຕິດຕາມກວດກາການເຄື່ອໄຫວວຽກງານ ໃນໜຶ່ງປີຜ່ານມາ ແລະ ທິດທາງແຜນການ ໜຶ່ງປີຕໍ່ໜ້າ ຂອງສະພາປະຊາຊົນແຂວງ;ຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນສົ່ງເສີມ ແລະ ພັດທະນາກິລາກາຍຍະກໍາຂອງແຂວງ (ສະບັບປັບປຸງ);ຂໍ້ຕົກລົງຂອງເຈົ້າແຂວງວ່າດ້ວຍ ກອງທຶນຄວບຄຸ່ມ, ສະກັດກັ້ນ ແລະ ຕ້ານຢາເສບຕິດ (ສະບັບປັບປຸງ);ບົດລາຍງານກ່ຽວກັບ ການຈັດຕັ້ງປະຕິບັດແຜນຟື້ນຟູ-ປັບປຸງຊີວິດການເປັນຢູ່ ຂອງປະຊາ ຊົນທີ່ຖືກຜົນກະທົບຈາກໂຄງການກໍ່ສ້າງເຂື່ອນໄຟຟ້ານໍ້າທາ 1 ເມືອງນາແລ ໄລຍະທີ 1 (2020-2023) ແລະ ແຜນການໄລຍະທີ 2 (2025-2028);ບົດລາຍງານກ່ຽວກັບ ຜົນກະທົບຈາກໄພພິບັດນ້ໍາຖ້ວມ ຢູ່ແຂວງຫຼວງນໍ້າ ປີ 2024, ພ້ອມນັ້ນຍັງຈະໄດ້ຮັບຟັງການຊີ້ແຈງຂອງຂະແໜງການກ່ຽວຂ້ອງ ຕໍ່ຄໍາຊັກຖາມກັບທີ່ຂອງສະມາຊິກສະພາປະຊາຊົນແຂວງ.
ກອງປະຊຸມສະໄໝສາມັນເທື່ອທີ 8 ຂອງສະພາປະຊາຊົນແຂວງຄັ້ງນີ້ ຈະໄດ້ຄົ້ນຄວ້າປະ ກອບຄໍາເຫັນ ແລະ ພິຈາລະນາ, ຮັບຮອງເອົາຫຼາຍເນື້ອໃນສໍາຄັນພື້ນຖານຂອງແຂວງ, ເພື່ອຮັບປະກັນໃຫ້ເນື້ອໃນດັ່ງກ່າວ ມີຄຸນນະພາບ, ມີປະສິດທິຜົນ ແລະ ບັນລຸຕາມຄາດໝາຍທີ່ວາງໄວ້.
ພ້ອມດຽວກັນນັ້ນ ທ່ານປະທານກອງປະຊຸມໄດ້ເນັ້ນໜັກ ແລະ ຮຽກຮ້ອງມາຍັງທຸກພາກສ່ວນທີ່ກ່ຽວຂ້ອງ ແລະ ຜູ້ແທນກອງປະຊຸມ ຈົ່ງສືບຕໍ່ໃຫ້ຄວາມຮ່ວມມື, ສະໜອງຂໍ້ມູນ ແລະ ຮຽກຮ້ອງມາຍັງບັນດາທ່ານສະມາຊິກສະພາປະຊາຊົນແຂວງ ຈົ່ງນໍາໃຊ້ ສິດປະສາທິປະໄຕ ແລະ ເຊີດຊູຄວາມຮັບຜິດຊອບຂອງຕົນ ສຸມໃສ່ຄົ້ນຄວ້າເນື້ອໃນຢ່າງເລິກເຊິ່ງ, ປະກອບຄໍາເຫັນ ຢ່າງຖີ່ຖ້ວນ, ມີຈຸດສຸມ, ພາວະວິໄສ, ມີເຫດມີຜົນ, ຮັດກຸມ ບົນພື້ນຖານແນວທາງຂອງພັກ, ກົດໝາຍຂອງລັດ ແລະ ສະພາບຄວາມເປັນຈິ່ງທາງດ້ານເສດຖະກິດ-ສັງຄົມ ຂອງແຂວງໃນປັດຈຸບັນ ເຮັດໃຫ້ເນື້ອໃນ ທີ່ນໍາມາພິຈາລະນາ, ຮັບຮອງຄັ້ງນີ້ ມີຄຸນນະພາບ, ສາມາດນໍາໄປຈັດຕັ້ງປະຕິບັດຢ່າງມີປະສິດທິພາບ ແລະ ປະສິດທິຜົນ.
ໂດຍ ນາງ ອຳພອນ ສີປະເສີດ