ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າຂອງວັນທີ 23 ສີງຫາ 2022 ນີ້. ທີ່ຫ້ອງປະຊຸມ ສະພາປະຊາຊົນແຂວງ (ສພຂ), ທ່ານ ນາງ ແສງອາລຸນ ວົງສາທິການ ເລຂາທິການ ສພຂ ຕາງໜ້າຄະນະປະຈໍາ ສພຂ ໄດ້ຖະແຫຼງຂ່າວຕໍ່ສື່ມວນຊົນ ກ່ຽວກັບຜົນສໍາເລັດກອງປະຊຸມສະໄໝສາມັນເທື່ອທີ 3 ຂອງ ສພຂ ຊຸດທີ II ໃຫ້ຊາບວ່າ: ກອງປະຊຸມສະໄໝສາມັນເທື່ອທີ 3 ຂອງ ສພຂ ອັດຕະປື ຊຸດທີ II ໄດ້ເລີ່ມໄຂຂຶ້ນຕອນເຊົ້າຂອງວັນຈັນ,​ ວັນທີ 15 ສີງຫາ 2022 ແລະ ໄດ້ດໍາເນີນມາເຖິງຕອນແລງ ຂອງວັນ ພຸດ ວັນທີ 17 ສີງຫາ 2022 ຊຶ່ງໄດ້ໃຊ້ເວລາດໍາເນີນກອງປະຊຸມທັງໝົດ 3 ວັນເຕັມ; ພາຍໃຕ້ການນຳພາ ຂອງທ່ານ ນາງ ມີນາພອນ ໄຊສົມພູ ຮອງເລຂາພັກແຂວງ, ປະທານສະພາປະຊາຊົນແຂວງ ພ້ອມດ້ວຍຄະນະ 2 ທ່ານ; ໂດຍມີສະມາຊິກສະພາປະຊາຊົນແຂວງເຂົ້າຮ່ວມທັງໜົດ 26 ທ່ານ, ຍິງ9 ທ່ານ, ມີບັນດາທ່ານສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 17, ການນໍາພັກ-ລັດຂັ້ນສູງ ຂອງແຂວງ, ອົງການຈັດຕັ້ງພັກ-ລັດ, ອົງການຈັດຕັ້ງສັງຄົມ, ອາວຸໂສບໍານານຜູ້ຊົງຄຸນວຸດທິ ແລະ ແຂກຜູ້ມີກຽດທີ່ຖືກເຊີນເຂົ້າຮ່ວມຢ່າງພ້ອມພຽງ.
ເຊິ່ງໃນກອງປະຊຸມໄດ້ເຕັມໄປດ້ວຍບັນຍາກາດການປະກອບຄຳຄິດຄຳເຫັນທີ່ພົດພື້ນເບີກບານ ຢ່າງກົງໄປກົງມາ ດ້ວຍການສຸມ ສະຕິປັນຍາ ເຫື່ອແຮງ ຂອງບັນດາທ່ານຄະນະປະຈໍາ, ຄະນະກຳມະການ, ສະມາຊິກສະພາປະຊາຊົນແຂວງ ແລະ ການປະກອບສ່ວນ ຂອງອົງການປົກຄອງແຂວງ, ພະແນກການ, ອົງການທຽບເທົ່າ ແລະ ພາກສ່ວນທີ່ກ່ຽວຂ້ອງ, ນຳເອົາເນື້ອໃນຄວາມຮັບຜິດຊອບຕາມພາລະບົດບາດຂອງຕົນ ເຂົ້າໃສ່ການດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ອັດຕະປື ຊຸດທີ IIຢ່າງຄົບຖ້ວນ ເຮັດໃຫ້ການພິຈາລະນາ ແລະ ຮັບຮອງເອົາບັນຫາສຳຄັນພື້ນຖານ ຂອງທ້ອງຖີ່ນ ຂອງສະພາປະຊາຊົນຂັ້ນແຂວງ ທີ່ໄດ້ກຳນົດໄວ້ໃນລັດຖະທຳມະນູນ ແລະ ກົດໝາຍໄດ້ຮັບຜົນສຳເລັດຕາມຄາດໝາຍທີ່ວາງໄວ້.

ກອງປະຊຸມ, ໄດ້ພິຈາລະນາຮັບຮອງເອົາບັນຫາສຳຄັນພື້ນຖານຂອງທ້ອງຖີ່ນ ໂດຍໄດ້ອອກເປັນມະຕິ ກອງປະຊຸມ 5 ສະບັບ ລະອຽດມີດັ່ງນີ້:

ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາການແຕ່ງຕັ້ງ ທ່ານ ແສງປະດິດ, ສຸດນາມສຸລິນ ສະມາຊິກສະພາປະຊາຊົນແຂວງປະຈຳເຂດເລືອກຕັ້ງເມືອງພູວົງ ເປັນຮອງປະທານ ຄະນະກໍາມະການເສດຖະກິດ, ແຜນການ ແລະ ການເງິນ ຕາມການສະເໜີຂອງຄະນະປະຈໍາສະພາປະຊາຊົນແຂວງ;
ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮັບຮອງການແຕ່ງຕັ້ງທ່ານ ຈິດປະສົງ ສິງສະຫວັດ, ເປັນຫົວໜ້າພະແນກແຮງງານ ແລະສະຫວັດດີການສັງຄົມແຂວງ ຕາມການສະເໜີຂອງທ່ານເຈົ້າແຂວງ;
ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດແຜນພັດທະ ນາເສດຖະກິດ-ສັງຄົມ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022;
ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນງົບປະມານແຫ່ງລັດຂັ້ນແຂວງ 6 ເດືອນຕົ້ນປີ ແລະ ແຜນການ 6 ເດືອນທ້າຍປີ 2022.
ມະຕິກອງປະຊຸມສະພາປະຊາຊົນແຂວງ ວ່າດ້ວຍການຮັບຮອງເອົາບົດລາຍງານ ຂອງຄະນະປະຈໍາສະພາປະຊາຊົນແຂວງ ກ່ຽວກັບການເຄື່ອນ ໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ II;

ການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ອັດຕະປື ຊຸດທີ II ຍັງໄດ້ຮັບຟັງການລາຍງານ ແລະ ຊີ້ແຈງຈາກທ່ານເຈົ້າແຂວງ, ຮອງເຈົ້າແຂວງ, ກອງບັນຊາການ ປກສ, ອົງການກວດກາລັດແຂວງ, ອົງການໄອຍະການປະຊາຊົນແຂວງ ແລະ ມີ 10 ພະແນກການ ຕໍ່ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂັ້ນແຂວງ ກໍ່ຄືການຈັດຕັ້ງປະຕິບັດ 2 ວາລະແຫ່ງຊາດຢູ່ແຂວງອັດຕະປື.
ໃນກ
ໄລຍະດຳເນີນກອງປະຊຸມຄັ້ງນີ້, ມີປະຊາຊົນບັນດາເຜົ່າສົ່ງຄຳຄິດຄຳເຫັນຜ່ານໂທລະສັບສາຍດ່ວນ (036 156) ມີທັງໝົດ 21 ສາຍ. ໃນນັ້ນ, ຂົງເຂດເສດຖະກິດມີ 09 ສາຍ; ຂົງເຂດວັດທະນະທໍາ-ສັງຄົມ ມີ 06 ສາຍ; ຂົງເຂດຍຸຕິທໍາ, ປກຊ-ປກສ ມີ 06 ສາຍ.ເຊິ່ງພົວພັນເຖິງການຄຸ້ມຄອງບໍລິຫານລັດ, ການພັດທະນາເສດຖະກິດ-ສັງຄົມຂອງແຂວງ, ການພັດທະນາທີ່ມີຜົນກະທົບຕໍ່ສັງຄົມ ແລະ ສິ່ງແວດລ້ອມ ຕໍ່ກັບບັນຫາທີ່ສົ່ງມາທາງໂທລະສັບສາຍດ່ວນດັ່ງກ່າວນັ້ນ, ກອງເລຂາກອງປະຊຸມໄດ້ສັງລວມ ແລະ ມອບໃຫ້ຄະນະກຳມະການ ຂອງສະພາປະຊາຊົນແຂວງ ປະສານສົມທົບພາກສ່ວນກ່ຽວຂ້ອງ ເພື່ອຄົ້ນຄວ້າ ແລະ ຊີ້ແຈງເປັນລາຍລັກອັກສອນ, ຮັບປະກັນໄດ້ຄວາມຖືກຕ້ອງສອດຄ່ອງຕາມກົດໝາຍ ແລະ ລະບຽບການ.