ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 ໃນວັນທີ 4 ສິງຫາ 2022 ນີ້ວ່າ ທ່ານ ນາງ ແກ້ວລາ ມະນີຈິດ ຄະນະປະຈໍາສະພາ, ເລຂາທິການສະພາປະຊາຊົນແຂວງຫຼວງພະບາງໄດ້ຖະແຫຼງຂ່າວເປີດກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ເຊິ່ງຈະໄຂຂຶ້ນຢ່າງເປັນທາງການໃນລະຫວ່າງວັນທີ 10-12 ສິງຫາ 2022ນີ້ ທີ່ຫ້ອງປະຊຸມໃຫຍ່ຫ້ອງວ່າການແຂວງ.

ກອງປະຊຸມຈະໄດ້ຄົ້ນຄວ້າພິຈາລະນາ ແລະຮັບຮອງເອົາບັນຫາສຳຄັນພື້ນຖານຂອງແຂວງເຊິ່ງ ລວມມີຫນ້າວຽກຕົ້ນຕໍຄື: ວຽກງານອົງການປົກຄອງແຂວງແມ່ນຈະໄດ້ຮັບຟັງການລາຍງານໂດຍສັງເຂບຂອງທ່ານເຈົ້າແຂວງ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະແຜນງົບປະມານແຫ່ງລັດຂອງແຂວງໄລຍະ 6ເດືອນຕົ້ນປີ ແລະ ທິດທາງແຜນການໄລຍະ 6 ເດືອນທ້າຍ 2022, ຮັບຟັງການລາຍງານການຈັດຕັ້ງແຜນງົບປະມານແຫ່ງລັດຂອງແຂວງ 6ເດືອນຕົ້ນ ແລະທິດທາງແຜນການ 6 ເດືອນທ້າຍປີ ຈາກພະແນກການເງິນ, ຮັບຟັງການລາຍງານການຈັດຕັ້ງປະຕິ ບັດການຄຸມຄ້ອງການລົງທຶນຂອງພາກເອກະຊົນ ແລະການແກ້ໄຂໜີ້ສິນບັນດາໂຄງການລົງທຶນລັດ ຈາກພະແນກແຜນການ ແລະການລົງທຶນ, ຮັບຟັງການລາຍງານກ່ຽວກັບຄວາມຄືບໜ້າໃນການຈັດຕັ້ງປະຕິບັດ 2 ວາລະແຫ່ງຊາດວ່າດ້ວຍການ ແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດຂອງແຂວງຫຼວງພະບາງ, ຮັບຟັງການລາຍງານການລາຍງານກ່ຽວກັບການຄຸ້ມຄອງລາຄາສິນຄ້າປະເພດຕ່າງໆ ແລະລາຄານໍ້າມັນເຊື້ອໄຟ, ຮັບຟັງການລາຍງານກ່ຽວກັບການຜະລິດສະບຽງອາຫານຕິດພັນກັບການຜະລິດສິນຄ້າ ເພື່ອຊົມໃຊ້ພາຍໃນ ແລະສົ່ງອອກຂອງແຂວງ, ຈະໄດ້ຮັບຟັງການລາຍງານກ່ຽວກັບການຈັດຕັງປະຕິບັດວຽກງານຂອງອົງການໄອຍະການປະຊາຊົນແຂວງ ແລະສານປະຊາຊົນແຂວງໃນໄລຍະ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022, ວຽກງານຂອງສະພາປະຊາຊົນແຂວງແມ່ນຈະໄດ້ຮັບຟັງການລາຍງານກ່ຽວກັບການເຄື່ອນໄຫວວຽກງານແຕ່ລະໄລຍະຂອງການປະຊຸມສະໄໝສາມັນເທື່ອທີ2 ຫາກອງປະຊຸມສະໄໝສາມັນເທື່ອ3 ແລະທິດທາງແຜນການເຄື່ອນໄຫວວຽກງານຮອດກອງປະຊຸມສະໄໝສາມັນເທື່ອທີ 4ຂອງສະພາປະຊາຊົນແຂວງ. ນອກນີ້ກອງປະຊຸມຍັງຈະໄດ້ຮັບຟັງການປະກອບຄຳເຫັນ ຂອງຄະນະປະຈຳສະພາປະຊາຊົນແຂວງ ຕໍ່ບົດລາຍງານຂອງອົງການປົກຄອງແຂວງ ແລະ ພະແນກການທີ່ກ່ຽວຂ້ອງ, ພ້ອມທັງຮັບຟັງການປະກອບຄຳຄິດ, ຄຳເຫັນ, ຄຳຊັກຖາມ ແລະເຈາະຈີມຂອງບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ6 ແລະສະມາຊິກສະພາປະຊາຊົນແຂວງ ແລະອື່ນໆ.

ໂອກາດທ້າຍນີ້ເພິ່ນຍັງໄດ້ເຊີນຊວນປະຊາຊົນລາວບັນດາເຜົ່າພາຍໃນແຂວງຫຼວງພະບາງ ຈົງຕິດຕາມການດຳເນີນ ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີII ຄັ້ງນີ້ຈົນສໍາເລັດ ພ້ອມທັງເປີດກວ້າງໃຫ້ຜູ້ມີສິດເລືອກຕັ້ງມີຄຳຄິດ, ຄຳເຫັນ ແລະສະເໜີໂດຍຜ່ານໂທລະສັບສາຍດ່ວນ 071 156 ໂດຍກົງໃນໄລຍະກອງປະຊຸມນີ້ຕື່ມອີກ,

                             ​​​​​​ຂ່າວ: ນາງ ຄໍາຫຼ້າ ພອນພິລາ