ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຂ່າວ:ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຫລວງນໍ້າທາ ຊຸດທີ II ໄຂຂຶ້ນຢ່າງເປັນທາງການ

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງຫລວງນໍ້າທາ ຊຸດທີ II ໄດ້ໄຂຂຶ້ນຢ່າງເປັນທາງການ ໃນຕອນເຊົ້າວັນທີ 2 ສິງຫາ 2022 ຢູ່ສະໂມສອນຂອງແຂວງ, ພາຍໃຕ້ການເປັນປະທານຂອງທ່ານ ຄຳຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມຂອງທ່ານ ຄໍາໄຫຼ ສີປະເສີດ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໆ ຫຼວງນໍ້າທາ, ທ່ານ ພົນຕີ ປະລິນຍາເອກ ວົງສັກ ພັນທະວົງ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ3, ຕາງໜ້າຄະນະປະຈໍາສະພາແຫ່ງຊາດ, ປະທານກໍາມາທິການ ປກຊ-ປກສ ສະພາແຫ່ງຊາດ ແລະ ທ່ານ ພົນຈັດຕະວາ ປະລິນຍາເອກ ວັນທອນ ສຸລິສັກ ຮອງຫົວໜ້າກົມໃຫຍ່ສັນຕິບານກະຊວງປ້ອງກັນຄວາມສະຫງົບ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ3, ອົງການແນວລາວສ້າງຊາດແຂວງ, ບັນດາທ່ານການນໍາພັກ-ລັດ, ອາດີດການນໍາຂອງແຂວງ, ອາດີດສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ບັນດາທ່ານນັກປະຕິວັດອາວຸໂສ, ຜູ້ຊົງຄຸນວຸດທິ, ບັນດາທ່ານສະມາຊິກສະພາແຫ່ງຊາດປະຈໍາເຂດເລືອກຕັ້ງ, ສະມາຊິກສະພາປະຊາຊົນແຂວງ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, 2ກອງບັນຊາການຂອງແຂວງ, ພະແນກການ, ອົງການທຽບເທົ່າ ແລະ ບັນດາທ່ານແຂກຖຶກເຊີນເຂົ້າຮ່ວມ 150 ກວ່າ ທ່ານ.

ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຄັ້ງນີ້ ຈະໄດ້ສຸມໃສ່ພິຈາລະນາ, ຮັບຮອງບັນດາເນື້ອໃນທີ່ສໍາຄັນ ດັ່ງນີ້: ບົດລາຍງານໂດຍສັງເຂບຂອງເຈົ້າແຂວງ ກ່ຽວກັບສະພາບພົ້ນເດັ່ນ ໃນການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ປະຈໍາຫົກເດືອນຕົ້ນປີ 2022 ແລະ ແຜນການປະຈໍາຫົກເດືອນທ້າຍປີ 2022 ຂອງແຂວງຫຼວງນໍ້າທາ; ບົດລາຍງານຂອງອົງການປົກຄອງແຂວງ ກ່ຽວກັບການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະຈໍາຫົກເດືອນຕົ້ນປີ ແລະ ແຜນການປະຈໍາຫົກເດືອນທ້າຍປີ 2022;ບົດລາຍງານຂອງອົງການປົກຄອງແຂວງ ກ່ຽວກັບແຜນງົບປະມານ ປະຈໍາຫົກເດືອນຕົ້ນປີ ແລະ ແຜນການປະຈໍາຫົກເດືອນທ້າຍປີ 2022;ບົດລາຍງານຂອງອົງການປົກຄອງແຂວງ ກ່ຽວກັບການຄຸ້ມຄອງ ສິນຄ້າລາຄາ ແລະ ການຄຸ້ມຄອງບັນດາປ້ຳນ້ຳມັນ ຢູ່ພາຍໃນແຂວງຫຼວງນໍ້າທາ;ບົດລາຍງານຂອງຄະນະສະເພາະກິດຂັ້ນແຂວງ ກ່ຽວກັບສະພາບການຕ້ານ, ສະກັດກັ້ນ ແລະ ແກ້ໄຂການລະບາດຂອງພະຍາດໂຄວິດ-19 ຕິດພັນກັບການຄຸ້ມຄອງ ແລະ ນໍາສົ່ງຄົນຕ່າງປະເທດທີ່ເຂົ້າມາແຂວງຫຼວງນໍ້າທາໂດຍບໍ່ຖືກຕ້ອງເຂົ້າສູນເພື່ອລໍຖ້າກັບຄືນປະເທດ;ບົດລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບ ເຄື່ອນໄຫວວຽກງານ ໃນໄລຍະແຕ່ກອງປະຊຸມສະໄໝສາມັນເທື່ອທີ 2 ຫາກອງປະຊຸມສະໄໝສາມັນເທື່ອທີ 3 ແລະ ແຜນການຮອດກອງປະຊຸມສະໄໝສາມັນເທື່ອທີ 4 ຂອງສະພາປະຊາຊົນແຂວງ ຊຸດທີ 3;ພິຈາລະນາ ແລະ ຮັບຮອງເອົານິຕິກໍາໃຕ້ກົດໝາຍຂອງແຂວງ ຈໍານວນ 3 ສະບັບ ສ້າງ ໃໝ່ 3 ສະບັບຄື:ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງນໍ້າ, ຊັບພະຍາກອນນໍ້າ ແລະ ດີນ ບໍລິ ເວນແຄມນໍ້າ;ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການຄຸ້ມຄອງສິ່ງເສດເຫຼືອ;ຮ່າງຂໍ້ຕົກລົງຂອງເຈົ້າແຂວງວ່າດ້ວຍ ການກໍານົດຫົວໜ່ວຍລາຄາຊົດເຊີຍ ໃຫ້ປະຊາ ຊົນທີ່ຖືກຜົນກະທົບຈາກໂຄງການກໍ່ສ້າງຕົວເມືອງທັນສະໄໝ ແລະ ເປັນມິດຕໍ່ສິ່ງ ແວດລ້ອມ ຢູ່ເຂດນາເຕີຍ; ພິຈາລະນາ ແລະ ຮັບຮອງເອົາບຸກຄະລາກອນຂອງແຂວງຈໍານວນໜຶ່ງ ຕາມການສະເໜີຂອງເຈົ້າແຂວງ.

ພ້ອມດຽວກັນ ຜູ້ແທນກອງປະຊຸມ ໄດ້ສຸມສະຕິປັນຍາ ໃນການຄົ້ນຄວ້າ, ປະກອບຄຳເຫັນຕໍ່ບົດລາຍງານຕ່າງໆ ແລະ ບັນຫາທີ່ພົບຄວາມຫຍຸ້ງຍາກພາຍໃນແຂວງ, ເມືອງ ເພື່ອໃຫ້ໄດ້ຮັບການ ປັບປຸງແກ້ໄຂໃຫ້ດີຂຶ້ນກວ່າເກົ່າ; ນອກນັ້ນ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ຍັງໄດ້ລົງຄະແນນສຽງຮັບຮອງເອົາວຽກງານ, ບຸກຄະລາກອນຂອງແຂວງ ບັນຫາສຳຄັນຂອງແຂວງ ຢ່າງມີຄວາມໝາຍ ແລະ ເປັນຂະບວນຟົດຟື້ນ, ກອງປະຊຸມດັ່ງກ່າວຈະໄດ້ດຳເນີນເປັນເວລາ 03 ວັນເຕັມ ຈຶ່ງສໍາເລັດ.

ໂດຍ: ນາງ ອຳພອນ ສີປະເສີດ