ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍຂອງວັນອັັງຄານ, ວັນທີ 02 ສິງຫາ 2022 ຢູ່ທີ່ຫ້ອງສະຕູດີໂອສະຖານີ ວິທະຍຸ-ໂທລະພາບແຂວງ ທ່ານນາງ ວັນສີ ພວງມະໄລ ກໍາມະການປະຈໍາ ສພຂ, ເລຂາທິການ ສພຂ, ຕາງໜ້າຄະນະປະຈຳສະພາປະຊາ ຊົນແຂວງ ໄດ້ຖະແຫຼງຕໍ່ສື່ມ່ວນຊົນຂອງແຂວງກ່ຽວກັບການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ວ່າ:

ໂດຍປະຕບັດຕາມມາດຕາ 60 ຂອງກົດໝາຍວ່າດ້ວຍ ສະພາປະຊາຊົນຂັ້ນແຂວງ ກ່ຽວກັບການດໍາເນີນກອງປະຊຸມສະພາປະຊາຊົນຂັ້ນແຂວງ. ກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງ ຊຸດທີ II ຈະໄດ້ໄຂຂຶ້ນໃນລະຫວ່າງວັນທີ 09-10 ສິງຫາ 2022 ໃຊ້ເວລາ 2 ວັນ, ຢູ່ທີ່ສະໂມສອນແຂວງ(ບ້ານເຈງ) ກອງປະຊຸມຄັ້ງນີ້ ບັນດາທ່ານສະມາຊິກສະພາປະຊາຊົນແຂວງ ຈະໄດ້ສຸມໃສ່ຄົ້ນຄວ້າ, ພິຈາລະນາ ແລະ ຮັບຮອງເນື້ອໃນສໍາຄັນດັ່ງນີ້:

ກ. ວຽກງານອົງການປົກຄອງແຂວງ

  • ບົດລາຍງານ ໂດຍສັງເຂບຂອງທ່ານເຈົ້າແຂວງ ກ່ຽວກັບວຽກງານການບໍລິຫານລັດປະຈຳ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2022;
  • ບົດລາຍງານ ການຈັດຕັ້ງປະຕິບັດແຜນພັດທະນາເສດຖະກິດສັງຄົມປະຈຳ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2022;
  • ບົດລາຍງານ ການຈັດຕັ້ງປະຕິບັດແຜນງົບປະມານແຫ່ງລັດປະຈຳ 06 ເດືອນຕົ້ນປີ, ທິດທາງແຜນການປະຈໍາ 06 ເດືອນທ້າຍປີ 2022 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ;
  • ບົດລາຍງານ ກ່ຽວກັບການແກ້ໄຂບັນຫາເສດຖະກິດ, ການຄຸ້ມຄອງລາຄາສິນຄ້າອຸປະໂພກ-ບໍລິໂພກ ແລະ ສະພາບຄວາມຫຍຸ້ງຍາກທາງດ້ານນໍ້າມັນເຊື້ອໄຟພາຍໃນແຂວງອຸດົມໄຊ;
  • ບົດລາຍງານ ກ່ຽວກັບຮ້ານແລກປ່ຽນ, ການຄຸ້ມຄອງເງິນຕາ ແລະ ການແກ້ໄຂບັນຫາເງິນເຟີ້ ຢູ່ແຂວງອຸດົມໄຊ;
  • ບົດລາຍງານ ການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຊົດເຊີຍຜົນກະ ທົບຈາກໂຄງ ການພັດທະນາແຄມນໍ້າກໍ ເຂດເທດສະບານເມືອງໄຊ, ແຂວງອຸດົມໄຊ ແລະ ການຊົດເຊີຍຜົນກະທົບຈາກໂຄງການກໍ່ສ້າງເສັ້ນທາງລົດໄຟລາວ-ຈີນ ນອກແລວແດງ ຊ່ວງຜ່ານແຂວງອຸດົມໄຊ;
  • ບົດລາຍງານ ການຈັດຕັ້ງປະຕິບັດຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງສະ ໜາມກິລາ, ສະ ບັບເລກທີ 69/ຈຂ.ອຊ, ລົງວັນທີ 29 ມັງກອນ 2021 ແລະ ການຈັດຕັ້ງປະຕິບັດວຽກງານ ກິລາ-ກາຍະກໍາ 06 ເດືອນຕົ້ນ ແລະ ທິດທາງແຜນການປະຈໍາ 06 ເດືອນທ້າຍປີ 2022.

         ຂ. ວຽກງານຍຸຕິທໍາ, ປກຊ-ປກສ .

  • ບົດລາຍງານ ການຈັດຕັ້ງປະຕິບັດວ່າລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ແລະ ການແກ້ໄຂປະກົດການຫຍໍ້ທໍ້ພາຍໃນແຂວງອຸດົມໄຊ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2022.

ຄ. ວຽກງານຂອງສະພາປະຊາຊົນແຂວງ

  • ບົດລາຍງານ ຂອງຄະນະປະຈຳສະພາປະຊາຊົນແຂວງ ກ່ຽວກັບການເຄື່ອນໄຫວວຽກງານ ຂອງສະພາປະຊາຊົນແຂວງປະຈຳ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2022;

ງ. ດ້ານນິຕິກໍາ

ພິຈາລະນາ, ຮັບຮອງເອົາການສ້າງ ແລະ ປັບປຸງນິຕິກຳໃຕ້ກົດໝາຍຈຳນວນ  02 ສະບັບ, ໃນນີ້: ສ້າງໃໝ່ມີ 01 ສະບັບ ແລະ ປັບປຸງ 01 ສະບັບຄື:

  • ຮ່າງຂໍ້ຕົກລົງຂອງທ່ານເຈົ້າແຂວງ ວ່າດ້ວຍ ການຄຸ້ມຄອງຈັດງານປະເພນີຕ່າງໆຢູ່ແຂວງອຸດົມໄຊ(ສະບັບສ້າງໃໝ່);
  • ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການປະເມີນລາຄາທີ່ດິນໃນທົ່ວແຂວງອຸດົມໄຊ ເລກທີ 506/ຈຂ.ອຊ, ລົງວັນທີ 19 ພຶດສະພາ 2020(ສະບັບປັບປຸງ).

ຈ. ບົດປະກອບຄໍາເຫັນຂອງຄະນະປະຈໍາສະພາປະຊາຊົນແຂວງ

  • ບົດປະກອບຄໍາເຫັນ ຂອງຄະນະປະຈໍາສະພາປະຊາຊົນແຂວງ ຕໍ່ບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈຳ 06 ເດືອນຕົ້ນປີ ແລະ ທິດທາງແຜນການ ປະຈໍາ 06 ເດືອນທ້າຍປີ 2022; ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ.
  • ບົດປະກອບຄໍາເຫັນຂອງຄະນະປະຈໍາສະພາປະຊາຊົນແຂວງ ຕໍ່ບົດລາຍງານການຈັດຕັ້ງປະຕິບັດວາລະແຫ່ງຊາດ ວ່າດ້ວຍ ການແກ້ໄຂບັນຫາຢາເສບຕິດ ແລະ ການແກ້ໄຂປະກົດການຫຍໍ້ທໍ້ພາຍໃນແຂວງອຸດົມໄຊ 06 ເດືອນຕົ້ນປີ ແລະ ທິດທາງແຜນການປະຈໍາ 06 ເດືອນທ້າຍປີ 2022.

ຄຽງຄູ່ກັບການພິຈາລະນາ ແລະ ຮັບຮອງເອົາບັນຫາສຳຄັນດັ່ງກ່າວມາຂ້າງເທິງນັ້ນ, ຕະຫຼອດໃນໄລຍະດຳເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II, ຄະນະເລຂາທິການ ສພຂ ໄດ້ຈັດຕັ້ງໂທລະສັບສາຍດ່ວນ(081 156 ໂດຍບໍ່ເສຍຄາ) ຫຼື ຈະສົ່ງເປັນລາຍລັກອັກສອນມາທາງ ສະພາປະຊາຊົນແຂວງອຸດົມໄຊ ຕັ້ງຢູ່ບ້ານນາເລົາ, ເມືອງໄຊ, ແຂວງອຸດົມໄຊ(ໂມງລັດຖະການ) ເພື່ອຮັບເອົາຄໍາຄິດເຫັນ ແລະ ຄໍາສະເໜີຂອງປະຊາຊົນບັນດາເຜົ່າ ມາຍັງກອງປະຊຸມ.

ໃນໂອກາດດັ່ງກ່າວ ຂໍເຊີນຊວນມາຍັງບັນດາທ່ານພະນັກງານລັດຖະກອນ, ທະຫານ-ຕໍາຫຼວດ, ນັກຮຽນ/ນັກສຶກສາ, ປັນຍາຊົນ, ກຳມະກອນ/ຊາວຜູ້ອອກແຮງງານ ແລະ ພໍ່ແມ່ປະຊາຊົນລາວບັນດາເຜົ່າໃນທົ່ວແຂວງອຸດົມໄຊ ຈົ່ງພ້ອມກັນຕິດຕາມການດໍາເນີນກອງປະຊຸມສະໄໝສາມັນເທື່ອທີ 3 ຂອງສະພາປະຊາຊົນແຂວງອຸດົມໄຊ ຊຸດທີ II ຄັ້ງນີ້ແຕ່ຕົ້ນຕະຫຼອດປາຍ.

ພາບ/ຂ່າວ: ແສງພອນ ອິນນະລົງ.