ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມສະໄໝສາມັນເທື່ອທີ 03 ຂອງສະພາປະຊາຊົນແຂວງສະຫວັນນະເຂດຊຸດ​ທີ II  ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 27 ກໍລະກົດ 2022 ທີ່ຫໍວັດທະນະທໍາໄກສອນພົມວິຫານ ແຂວງສະຫວັນນະເຂດ. ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ. ເຂົ້າຮ່ວມມີທ່ານ ສັນຕິພາບ ພົມວິຫານ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆສະຫວັນນະເຂດ ພ້ອມບັນດາທ່ານ ສະມາຊິກສະພາແຫ່ງຊາດປະຈຳເຂດເລືອກຕັ້ງທີ 13, ສະມາຊິກສະພາປະຊາຊົນແຂວງ, ບັນ​ດາເຈົ້າເມືອງ, ເຈົ້ານະຄອນໄກສອນພົມວິຫານ, ບັນ​ດາຫົວໜ້າພະແນກການຕ່າງໆອ້ອມຂ້າງແຂວງ, ແນວລາວສ້າງຊາດ ແລະ ອົງການຈັດຕັ້ງມະຫາຊົນເຂົ້າຮ່ວມຢ່າງພ້ອມພຽງ.

ທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ກ່າວສູນທອນພົດໄຂກອງປະຊຸມຢ່າງເປັນທາງການວ່າ: ກອງ​ປະຊຸມ​ສະ​ໄໝ​ສາມັນ ເທື່ອ​ທີ 03  ຂອງ​ສະພາ​ປະຊາຊົນ​​ແຂວງ ຊຸດ​ທີ II  ຈະ​ໄດ້​ພິຈາລະນາ ​ແລະຕົກລົງ​ບັນຫາ​ສໍາຄັນ​ຕ່າງໆຂອງ​ແຂວງ​ ເປັນຕົ້ນແມ່ນ:

ຮັບຟັງການລາຍງານໂດຍສັງເຂບ ຈາກທ່ານເຈົ້າແຂວງໆສະຫວັນນະເຂດ ກ່ຽວກັບສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022, ຮັບຟັງການລາຍງານ ຂອງຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ແລະ ຮັບຟັວການລາຍງານ ຂອງຫົວໜ້າພະແນກການເງີນແຂວງ ກ່ຽວກັບ ການຈັດຕັ້ງປະຕິບັດແຜນງົບປະມານແຫ່ງລັດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022, ຮັບຟັງການລາຍງານ ຂອງຫົວໜ້າພະແນກພະລັງງານ ແລະ ບໍ່ແຮ່ແຂວງ ກ່ຽວກັບ ການຄຸ້ມຄອງການຂຸດຄົ້ນແຮ່ທາດ ພາຍໃນແຂວງສະຫວັນນະເຂດ, ຮັບຟັງການລາຍງານ ຂອງຫົວໜ້າພະແນກສຶກສາທິການ ແລະ ກິລາແຂວງ ກ່ຽວກັບ ການປັບປຸງຄຸນນະພາບລະບົບການຮຽນ-ການສອນ ທຸກຊັ້ນທຸກສາຍ ໃນໄລຍະໃໝ່, ຮັບຟັງການລາຍງານ ຂອງຫົວໜ້າກອງບັນຊາການ ປກສ ແຂວງ ກ່ຽວກັບຄວາມຄືບໜ້າ ການຈັດຕັ້ງປະຕິບັດ ວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ, ຮັບຟັງການລາຍງານ ຂອງຫົວໜ້າອົງການໄອຍະການປະຊາຊົນແຂວງ ກ່ຽວກັບການປະຕິພັດພາລະບົດບາດການຕິດຕາມທົ່ວໄປ ຕິດພັນກັບການຈັດຕັ້ງປະຕິບັດ ວາລະແຫ່ງຊາດ, ຮັບຟັງການລາຍງານ ຂອງປະທານສານປະຊາຊົນແຂວງ ກ່ຽວກັບຂໍ້ສະດວກ, ຂໍ້ຫຍຸ້ງຍາກໃນການຕັດສິນຄະດີແພ່ງ, ຄະດີອາຍາ, ກົນໄກຂອງການປະສານສົບທົບໃນການດຳເນີນຄະດີຂອງສານປະຊາຊົນແຂວງ, ສານປະຊາຊົນເຂດ ໂດຍຕິດພັນກັບວາລະແຫ່ງຊາດ, ຮັບຟັງການລາຍງານ ຂອງຫົວໜ້າພະແນກຍຸຕິທຳແຂວງ ກ່ຽວກັບ ຂໍ້ສະດວກ, ຂໍ້ຫຍຸ້ງຍາກ ໃນການຈັດຕັ້ງປະຕິບັດວຽກງານທະບຽນສານ ແລະ ການຈັດຕັ້ງປະຕິບັດຄໍາຕັດສິນຂອງສານ ທີ່ໃຊ້ໄດ້ຢ່າງເດັດຂາດ ໃນໄລຍະຜ່ານມາ ພ້ອມທັງລາຍງານ ກ່ຽວກັບການຂຶ້້ນບັນຊີເຕົ້າໂຮມຊັບສິນ ທີ່ສານຕັດສິນຮິບເປັນຂອງລັດ ໃນໄລຍະຜ່ານມາ, ຮັບຟັງການລາຍງານ ຂອງຫົວໜ້າຊັບພະຍາກອນທຳມະຊາດ  ແລະ ສິ່ງແວດລ້ອມແຂວງ ກ່ຽວກັບ ການຈັດຕັ້ງປະຕິບັດນິຕິກຳໃຕ້ກົດໝາຍ ໂດຍສະເພາະຂໍ້ຕົກລົງຂອງທ່ານເຈົ້າແຂວງ ວ່າດ້ວຍການກໍານົດເຂດປະເມີນທີ່ດິນ ແລະ ສິ່ງປຸກສ້າງ ທີ່ແຂວງສະຫວັນນະເຂດ; ຂໍ້ຕົກລົງຂອງທ່ານເຈົ້າແຂວງ ວ່າດ້ວຍການຮັບຮອງເອົາແຜນທີ່ດິນຈັດສັນເບື້ອງຕົ້ນຂອງແຂວງສະຫວັນນະເຂດ ຮອດປີ 2025, ຮັບຟັງການລາຍງານການເຄື່ອນໄຫວໃນໄລຍະແຕ່ກອງແຕ່ກອງປະຊຸມສະ ໄໝສາມັນ ເທື່ອທີ 2 ຫາກອງປະຊຸມສະໄໝສາມັນ ເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II, ພາຍຫຼັງທີ່ໄດ້ຮັບຟັງການລາຍງານຂອງບັນດາພະແນກການແລ້ວ ກອງປະຊຸມຍັງໄດ້ ຮັບຮອງ ມະຕິກອງປະຊຸມ ສະພາປະຊາຊົນແຂວງ ວ່າດ້ວຍການຮັບຮອງ ເອົາການກໍານົດເຂດຫ່າງໄກສອກຫຼີກ ແລະ ທຸລະກັນດານ ປີ 2022, ຮັບຮອງ ເອົາບົດລາຍງານການເຄື່ອນໄຫວໃນໄລຍະແຕ່ກອງແຕ່ກອງປະຊຸມສະ ໄໝສາມັນ ເທື່ອທີ 2 ຫາກອງປະຊຸມສະໄໝສາມັນ ເທື່ອທີ 3 ແລະ ທິດທາງແຜນການຮອດກອງປະຊຸມສະໄໝສາມັນ ເທື່ອທີ 4 ຂອງສະພາປະຊາຊົນແຂວງ ຊຸດທີ II ແລະ ຮັບຮອງເອົາມະຕິ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດຂອງແຂວງ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022.

 

ໃນໂອກາດນີ້ທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງ ຍັງໄດ້ຮຽກຮ້ອງມາຍັງ ບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແລະ ບັນດາທ່ານສະມາຊິກສະພາປະຊາຊົນແຂວງ ຈົ່ງພ້ອມກັນເອົາໃຈໃສ່ຕໍ່ບັນດາເນື້ອໃນຂອງກອງປະຊຸມດ້ວຍຄວາມຮັບຜິດຊອບສູງ ໃນຖານະທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນ   ຈົ່ງພ້ອມກັນຍົກສູງຄວາມຮັບຜິດຊອບໜ້າທີ່ການເມືອງຂອງຕົນ ໃນການຄົ້ນຄວ້າພິຈາລະນາ ແລະ ປະກອບຄໍາເຫັນ ຢ່າງມີປະຊາທິປະໄຕ, ເລິກເຊິ່ງ, ມີຈຸດສຸມ, ຮັບປະກັນຄວາມຖືກຕ້ອງຕາມລະບຽບກົດໝາຍ.

ເຊິ່ງກອງ​ປະຊຸມ​ສະ​ໄໝ​ສາມັນ ເທື່ອ​ທີ 03 ຂອງ​ສະພາ​ປະຊາຊົນ​​ແຂວງສະຫວັນນະເຂດ ຊຸດ​ທີ II ໄດ້ດໍາເນີນໄປເປັນເວລາ 3 ວັນ ນັບແຕ່ວັນທີ 27 – 29 ກໍລະກົດ 2022 ໃນໄລຍະການດໍາເນີນກອງປະຊຸມທີ່ກໍາລັງດໍາເນີນນັ້ນ ສະພາປະຊາຊົນແຂວງ ຍັງໄດ້ເປີດໂທລະສັບສາຍດ່ວນ(ບໍ່ໄດ້ເສຍຄ່າໂທ) 041 156, ເພື່ອຮັບຄໍາຄິດຄໍາເຫັນຂອງປະຊາຊົນ ອີກດ້ວຍ.