ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມສະໄໝວິສາມັນຄັ້ງທີ2 ຂອງສະພາປະຊາຊົນແຂວງຫລວງນ້ຳທາ ຊຸດທີII ໄດ້ໄຂຂຶ້ນໃນຕອນເຊົ້າວັນທີ 11 ຕຸລາ 2022 ຢູ່ທີສະໂມສອນຂອງແຂວງ ພາຍໃຕ້ການເປັນປະທານຂອງທ່ານ ຄໍາຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ໃຫ້ກຽດເຂົ້າຮ່ວມຂອງທ່ານ ຄຳໄຫລ ສີປະເສີດ ກຳມະການສູນກາງພັກ ເລຂາພັກແຂວງ ເຈົ້າແຂວງຫລວງນ້ຳທາ, ມີການນຳຂອງແຂວງ, ອາດີດການນຳແຂວງ, ອາດີດ ສສຊ, ອາດີດ ສສຂ, ຫົວໜ້າ, ຮອງຫົວໜ້າພະແນກການ, ຄະນະຮັບຜິດຊອບສ້າງຮ່າງຂໍ້ຕົກລົງເຈົ້າແຂວງ, ພ້ອມດ້ວຍແຂກຖຶກເຊີນເຂົ້າຮ່ວມ 100 ກວ່າຄົນ.

ໂຄງການພັດທະນາເມືອງທັນສະໄໝ ແລະ ເປັນມິດຕໍ່ສິງແວດລ້ອມ ຢູ່ເຂດນາເຕີຍ ເມືອງ ແລະ ແຂວງຫຼວງນໍ້າທາ ແມ່ນໂຄງການພັດທະນາຂະໜາດໃຫຍ່, ເປັນບູລິມະສິດໜຶ່ງ ຂອງລັດຖະບານ ແລະ ເປັນໂຄງການທີ່ນອນຢູ່ໃນແຜນພັດທະນາເສດຖະກີດ-ສັງຄົມແຫ່ງຊາດ ເຊີ່ງພັກ-ລັດເຮົາ ໄດ້ເອົາໃຈໃສ່ ຊຸກຍູ້ສົ່ງເສີມ ເພື່ອສ້າງເປັນທ່າແຮງໃນ ການເຕີບໂຕທາງດ້ານເສດຖະກິດ-ສັງຄົມ ຂອງຊາດ ກໍ່ຄືຂອງແຂວງ.

ກອງປະຊຸມສະໄໝວິສາມັນຄັ້ງທີ2 ຂອງສະພາປະຊາຊົນແຂວງຫລວງນ້ຳທາ ຊຸດທີII ໄດ້ຮັບຟັງ ແລະ ໄດ້ຄົ້ນຄວ້າ, ພິຈາລະນາ, ຮັບຮອງເອົາຮ່າງຂໍ້ຕົກລົງເຈົ້າແຂວງ ວ່າດ້ວຍການກຳນົດລາຄາຫົວໜ່ວຍຊົດເຊີຍຜົນກະທົບຈາກໂຄງການພັດທະນາຕົວເມືອງທັນສະໄໝ ແລະ ເປັນມິດຕໍ່ສິ່ງເເວດລ້ອມ ຢູ່ເຂດນາເຕີຍ ເມືອງ ແລະ ແຂວງຫລວງນ້ຳທາ, ຊຶ່ງລວມທັງໝົດມີ 7 ໝວດ, 25 ມາດຕາ, ພ້ອມນັ້ນ ຜູ້ແທນກອງປະຊຸມໄດ້ຍົກສູງຄວາມຮັບຜິດຊອບສຸມໃສ່ປະກອບຄຳຄິດເຫັນຕໍ່ຮ່າງຂໍ້ຕົກລົງເຈົ້າແຂວງດັ່ງກ່າວ ຢ່າງມີຈຸດສຸມ ເພື່ອີ່ເຕັມວາມຮັບຜິດຊອບທາງປະຊາທິປະໂຕເຮັດໃຫ້ຮ່າງຂໍ້ຕົກລົງເຈົ້າແຂວງ ມີເນື້ອໃນຖຶກຕ້ອງ, ຮັດກຸມ, ສົມບຸນຂຶ້ນກວ່າເກົ່າ ແລະ ສາມາດພິຈາລະນາ, ຮັບຮອງເອົາໃນກອງປະຊຸມຄັ້ງນີ້ ເພື່ອນຳໄປຈັດຕັ້ງປະຕິບັດໃຫ້ໄດ້ຮັບຜົນປະໂຫຍດສູງສຸດໃນຕໍ່ໜ້າ; ນອກນັ້ນ ສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ ຍັງໄດ້ຍົກສູງຄວາມຮັບຜິດຊອບທາງດ້ານການເມືອງ, ຕາມພາລະບົດບາດ, ໃນນາມເປັນຕົວແທນແຫ່ງສິດຜົນປະໂຫຍດຂອງປະຊາຊົນບັນດາເຜົ່າ ໄດ້ລົງຄະແນນສຽງຮັບຮອງເອົາຮ່າງຂໍ້ຕົກລົງເຈົ້າແຂວງ ວ່າດ້ວຍການກຳນົດລາຄາຫົວໜ່ວຍຊົດເຊີຍຜົນກະທົບຈາກໂຄງການພັດທະນາຕົວເມືອງທັນສະໄໝ ແລະ ເປັນມິດຕໍ່ສິ່ງເເວດລ້ອມ ຢູ່ເຂດນາເຕີຍ ເມືອງ ແລະ ແຂວງຫລວງນ້ຳທາ ດ້ວຍຄະແນນສຽງເປັນເອກະສັນ ແລະ ກອງປະຊຸມໄດ້ປິດລົງຢ່າງເປັນທາງການດ້ວຍຜົນສຳເລັດອັນຈົບງາມໃນຕອນເຊົ້າຂອງວັນດຽວກັນ.