ກອງປະຊຸມສະໄໝວິສາມັນຄັ້ງທີ 3 ຂອງສະພາປະຊາຊົນແຂວງ ຊຸດທີII ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 23 ພຶດສະພາ 2023 ທີ່ຜ່ານມາ ທີ່ສະໂມສອນຂອງແຂວງຫລວງນໍ້າທາ ພາຍໃຕ້ການເປັນປະທານຂອງທ່ານ ຄໍາຟອງ ອິນມານີ ຮອງເລຂາພັກແຂວງ ປະທານສະພາປະຊາຊົນແຂວງ, ໃຫ້ກຽດເຂົ້າຮ່ວມຂອງທ່ານ ວຽງສະຫວັດ ສີພັນດອນ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງຫລວງນ້ຳທາ, ມີບັນດາທ່ານຄະນະປະຈໍາພັກແຂວງ, ກໍາມະການພັກແຂວງ, ອະດີດການນໍາຂອງແຂວງ-ອະດີດສະມາຊິກສະພາແຫ່ງຊາດ ປະຈໍາເຂດເລືອກຕັ້ງ, ອົງການແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສະມາຊິກສະພາປະຊາຊົນແຂວງ, ບັນດາທ່ານເຈົ້າເມືອງ, ພະແນກການ, ສອງກອງບັນຊາການຂອງແຂວງ ພ້ອມດ້ວຍບັນດາທ່ານແຂກທີ່ຖຶກເຊີນເຂົ້າຮ່ວມທັງໝົດ 100 ກວ່າທ່ານ.
ກອງປະຊຸມສະໄໝວິສາມັນຄັ້ງທີ 3 ຂອງສະພາປະຊາຊົນແຂວງ ໄດ້ດໍາເນີນຂຶ້ນ ເປັນເວລາເຄິ່ງວັນ ຢ່າງເຄັ່ງຮ້ອນ ແຫ່ງການເສີມຂະຫຍາຍສິດປະຊາທິປະໄຕ ແລະ ຄວາມຮັບຜິດຊອບສູງຕໍ່ໜ້າທີ່ການເມືອງ ຂອງຜູ້ແທນກອງປະຊຸມ ແລະ ກອງປະຊຸມຄັ້ງນີ້ ໄດ້ຮັບຟັງການລາຍງານ ແລະ ພິຈາລະນາ ຮັບຮອງເອົາ ບັນຫາສໍາຄັນພື້ນຖານຂອງແຂວງ ດັ່ງນີ້: ໄດ້ຮັບຟັງການລາຍງານຂອງຄະນະປະຈໍາສະພາປະຊາຊົນແຂວງ ກ່ຽວກັບ ການພິຈາລະນາ, ຮັບຮອງເອົາ ຮອງເຈົ້າແຂວງ, ປະທານອົງການກວດກາລັດແຂວງ, ເຈົ້າ ເມືອງ ແລະ ຫົວໜ້າອົງການໄອຍະການປະຊາຊົນ ເຂດ-1 ແຂວງຫຼວງນໍ້າທາ ໃນໄລຍະທີ່ສະພາປະຊາຊົນແຂວງ ບໍ່ໄດ້ດໍາເນີນກອງປະຊຸມສະໄໝສາມັນ ແລະ ວິສາມັນ ຂອງສະພາປະຊາຊົນແຂວງ; ໄດ້ພິຈາລະນາ, ຮັບຮອງເອົາ ບຸກຄະລາກອນຂອງແຂວງ ຕາມການສະເໜີຂອງ ເຈົ້າແຂວງ ຈຳນວນ 6 ທ່ານ; ພິຈາລະນາ ຮັບຮອງເອົາການສະເໜີ ຍົກຍ້າຍ ແລະ ແຕ່ງຕັ້ງ ທ່ານ ຄໍາລາ ຂານສະຫງ່າ ກໍາມະການພັກແຂວງ, ຫົວໜ້າພະແນກໂຍທາທິການ ແລະ ຂົນສົ່ງ ເປັນຫົວໜ້າພະແນກອຸດສາຫະກໍາ ແລະ ການຄ້າແຂວງ; ພິຈາລະນາ ຮັບຮອງ ເອົາການສະເໜີ ຍົກຍ້າຍ ທ່ານ ຄໍາເພັດ ຈັນທະວົງ ກໍາມະການພັກແຂວງ, ຫົວໜ້າຫ້ອງວ່າການແຂວງ ໄປຮັບໜ້າທີ່ໃໝ່ຢູ່ເມືອງລອງ; ພິຈາລະນາ ຮັບຮອງ ເອົາການ ຍົກຍ້າຍ ແລະ ແຕ່ງຕັ້ງ ທ່ານ ພູນແກ້ວ ເຫຼົາອິນ ກໍາມະການພັກແຂວງ, ຫົວໜ້າພະແນກເຕັກໂນໂລຊີ ແລະ ການສື່ສານ ເປັນຫົວໜ້າພະແນກໂຍທາທິການ ແລະ ຂົນສົ່ງແຂວງ; ພິຈາລະນາ ຮັບຮອງ ເອົາການຍົກຍ້າຍ ແລະ ແຕ່ງຕັ້ງ ທ່ານ ວັນທາ ພົມວິໄລ ຫົວໜ້າພະແນກອຸດສາຫະກໍາ ແລະ ການຄ້າ ເປັນຫົວໜ້າພະແນກເຕັກໂນໂລຊີ ແລະ ການສື່ສານແຂວງ; ພິຈາລະນາ ຮັບຮອງເອົາການສະເໜີແຕ່ງຕັ້ງ ທ່ານ ຕຽງສະໝອນ ພອນປະເສີດ ກໍາມະການພັກແຂວງ, ເປັນຫົວໜ້າພະແນກສາທາລະນະສຸກແຂວງ ແລະ ພິຈາລະນາ ຍົກຍ້າຍ ທ່ານ ບຸນມາ ພັນດາວົງ ກໍາມະການພັກແຂວງເປັນຫົວໜ້າຫ້ອງວ່າການແຂວງ; ພ້ອມດຽວກັນ ຜູ້ແທນກອງປະຊຸມຍັງໄດ້ມີຄຳເຫັນຕໍ່ກັບບຸກຄະລາກອນຂອງແຂວງ ທີ່ໄດ້ຮັບຮອງເອົາໃນກອງປະຊຸມຄັ້ງນີ້ ແລະ ໄດ້ລົງຄະແນນສຽງຮັບຮອງເອົາດ້ວຍຄະແນນສຽງເປັນເອກະພາບ.
ຂ່າວ ແລະພາບ ວັນນີ ແຝງບົວວັນ