ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

ຕອນເຂົ້າວັນທີ 27 ກໍລະກົດ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ຈັດກອງປະຊຸມສະຫຼຸບຕີລາຄາການຈັດຕັ້ງປະຕິບັດວຽກງານຮອບດ້ານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງ ໂດຍການເປັນປະທານຂອງທ່ານ ທອງສີ ເສົາສຸລິພົມ ປະທານຄະນະປະຈໍາສະພາປະຊາຊົນແຂວງ (ຄປຈຂ); ມີທ່ານຄະນະປະຈໍາສະພາປະຊາຊົນແຂວງ, ຮອງປະທານຄະນະກໍາມະການ ສພຂ, ຮອງຄະນະເລຂາທິການ ສພຂ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານ-ລັດຖະກອນພາຍ ສພຂ ເຂົ້າຮ່ວມ.

ທີ່ກອງປະຊຸມຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການ ສພຂ ຂຶ້ນຜ່ານ ບົດສະຫຼຸບຕີລາຄາວຽກງານຮອບດ້ານ ປະຈໍາ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງ; ຈາກນັ້ນ, ເພື່ອເປັນບ່ອນອິງໃນການປັບປຸງບົດສະຫຼຸບດັ່ງກ່າວປະທານກອງປະຊຸມໄດ້ເຈາະຈິ້ມບາງບັນຫາເປັນຕົ້ນ: ດ້ານ  ອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນ ທີ່ ສພຂ ໄດ້ເຄື່ອນໄຫວວຽກງານໃນໄລຍະ 6 ເດືອນຜ່ານມາ. ພ້ອມກັນນັ້ນ, ຜູ້ເຂົ້າຮ່ວມກອງປະຊຸມ ກໍໄດ້ຜັດປ່ຽນກັນປະກອບຄໍາເຫັນ, ແລກປ່ຽນບົດຮຽນ ພ້ອມທັງຫາວິທີການແກ້ໃນຕໍ່ໜ້າ ເພື່ອຄວາມເປັນເອກະພາບ ຢ່າງກົງໄປກົງມາ ແລະ ສ້າງສັນ. ເພື່ອຮັບປະກັນໃຫ້ການເຄື່ອນໄຫວວຽກງານຂອງ ສພຂ, ທັງຮັບປະກັນໃຫ້ການປະຕິບັດພາລະບົດບາດ ຂອງ ສພຂ ໃນຖານະເປັນອົງການນິຕິບັນຍັດ ມີຄວາມເຂັ້ມແຂງ ໃນການສືບຕໍ່ສ້າງ ແລະ ປັບປຸງອໍານາດລັດທຸກຂັ້ນ ໃຫ້ມີຄຸນນະພາບ ແລະ ມີປະສິດທິພາບ, ປະສິດຜົນສູງ.

ມາໃນຕອນທ້າຍຂອງກອງປະຊຸມ ທ່ານ ທອງສີ ເສົາສຸລິພົມ ໄດ້ສັງລວມຄືນຜົນຂອງການດໍາເນີນກອງປະຊຸມໃນຄັ້ງນີ້ ເຊິງທ່ານກໍໄດ້ຕິລາຄາສູງຕໍ່ກັບຄວາມພະຍາຍາມ ຂອງຄະນະນໍາ, ພະນັກງານ – ລັດຖະກອນ ໃນການປັບປຸງລະບົບການເມືອງ ປະຊາທິປະໄຕ ໃນຂະແໜງການຂອງສະພາປະຊາຊົນແຂວງ ທີ່ແບກຫາບພາລະໜ້າທີ່ອັນໜັກໜ່ວງຕໍ່ທຸກການເຄື່ອນໄຫວຂອງສະພາປະຊາຊົນແຂວງທີ່ສະແດງອອກໃນບົດສະຫຼຸບຕິລາຄາການຈັດຕັ້ງປະຕິບັດວຽກງານຮອບດ້ານຂອງ ສພຂ ໃນ 6 ເດືອນຕົ້ນປີທີ່ຜ່ານມາ. ພ້ອມກັນນັ້ນ, ເພື່ອເປັນແນວທາງໃນການຈັດຕັງປະຕິບັດວຽກງານໃນຕໍ່ໜ້າທ່ານໄດ້ມີບາງຄໍາເຫັນ ເປັນຕົ້ນ: ດ້ານ​ການ​ເມືອງ​-ແນວ​ຄິດ; ດ້ານ​ຄວາມ​ຮັບຜິດຊອບ​ຕໍ່ໜ້າ​ທີ່​ການ​ເມືອງ; ແບບ​ແຜນ​ວິທີ​ເຮັດ​ວຽກ ແລະ ການປະສານງານຂອງສະພາປະຊາຊົນແຂວງ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ.