ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສພຂ)ວັນທີ 3 ກຸມພາ 2022 ນີ້, ຢູ່ທີ່ສະໂມສອນຂອງເມືອງຄົງເຊໂດນ ແຂວງສາລະວັນ ຄະນະສະມາຊິກ ສະພາປະຊາຊົນແຂວງ (ສພຂ) ປະຈໍາເຂດເລືອກຕັ້ງເມືອງຄົງເຊໂດນ ໄດ້ຈັດກອງປະຊຸມສະຫຼຸບການ ເຄື່ອນໄຫວວຽກ ງານ ປະຈໍາປີ 2021 ແລະ ວາງທິດທາງແຜນການ ປະຈໍາປີ 2022 ຂອງຕົນຂຶ້ນຢ່າງເປັນທາງການ; ໃຫ້ກຽດເຂົ້າຮ່ວມໂອ້ລົມ ແລະ ໃຫ້ທິດຊີ້ນໍາຂອງທ່ານ ສີເຮັງ ຫອມສົມບັດ ຮອງເລຂາພັກແຂວງ ປະທານ ສພຂ ສາລະວັນ; ໂດຍທ່ານ ວັນນະລອນ ອິນທະພອນເດດ ຫົວໜ້າຄະນະ ສສຂ ປະຈໍາເຂດເລືອກຕັ້ງເມືອງຄົງເຊໂດນ ເປັນປະທານກອງປະຊຸມ; ເຂົ້າຮ່ວມມີທ່ານ ປອ ສະໄໝ ໂພທິການ ກໍາມະການພັກແຂວງ ເລຂາພັກເຈົ້າເມືອງຄົງເຊໂດນ; ມີທ່ານເລຂາທິການ ສພຂ; ພ້ອມດ້ວຍ ສສຂ, ຄະນະນຳຂັ້ນເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ທັງນີ້, ເພື່ອເປັນການຈັດຕັ້ງ ແລະ ຜັນຂະຫຍາຍ ມະຕິຂອງຄະນະປະຈໍາ ສພຂ ສະບັບເລກທີ 03/ຄຈສຂ.ສວ ລົງວັນທີ 19 ພຶດສະພາ 2021 ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງຄະນະ ສສຂ ປະຈໍາເຂດເລືອກຕັ້ງເມືອງ ແລະ ເພື່ອສະຫຼຸບຕີລາຄາຄືນ, ຖອດຖອນບົດຮຽນການເຄື່ອນໄຫວວຽກງານຕະຫຼອດໄລຍະ 1 ປີ ຜ່ານມາ, ພ້ອມທັງວາງທິດທາງແຜນການໃນປີຕໍ່ໜ້າ ຂອງຄະນະ ສສຂ ປະຈໍາເຂດເລືອກຕັ້ງເມືອງ ທີ່ຈະເປັນບ່ອນອີງໃນການຈັດຕັ້ງຜັນຂະຫຍາຍເປັນແຜນການເຄື່ອນໄຫວວຽກງານຂອງຕົນ ເຮັດໃຫ້ການປະຕິບັດໜ້າທີ່ເປັນເສນາທິການໃຫ້ແກ່ ສພຂ ໃຫ້ໄດ້ຮັບໝາກຜົນຜົນງານ.

ທ່ານ ວັນນະລອນ ອິນທະພອນເດດ ຫົວໜ້າຄະນະ ສສຂ ປະຈໍາເຂດເລືອກຕັ້ງເມືອງຄົງເຊໂດນ ໄດ້ຂຶ້ນຜ່ານຮ່າງບົດສະຫຼຸບການເຄື່ອນໄຫວວຽກງານ ປະຈໍາປີ 2021 ແລະ ວາງທິດທາງແຜນການ ປະຈໍາປີ 2022 ເຊິ່ງສະແດງໃຫ້ເຫັນຜົນສໍາເລັດໃນຫຼາຍດ້ານທີ່ພົ້ນເດັ່ນ ທີ່ໄດ້ເອົາໃຈໃສ່ເຄື່ອນໄຫວຕາມພາລະບົດບາດ, ສິດ ແລະ ໜ້າທີ່ຂອງຄະນະ ສສຂ ປະຈໍາເຂດເລືອກຕັ້ງເມືອງຄົງເຊໂດນ ໂດຍສະເພາະ: ໄດ້ເຂົ້າຮ່ວມກອງປະຊຸມຄັ້ງປະຖົມມະລຶກ, ກອງປະຊຸມສະໄໝສາມັນເທື່ອທີ 2 ຂອງ ສພຂ ຊຸດທີ II ພ້ອມກັນນັ້ນກໍ່ໄດ້ນໍາເອົາຄໍາຄິດ, ຄໍາເຫັນ ແລະ ຄຳສະເໜີຂອງປະຊາຊົນ ນໍາສະເໜີຕໍ່ກອງປະຊຸມສະພາພິຈາລະນາແກ້ໄຂ; ໄດ້ສັງລວມເກັບກໍາສະຖິຕິພົນລະເມືອງ ສົ່ງໃຫ້ຄະນະເລຂາທິການ ສພຂ ເພື່ອເປັນຖານຂໍ້ມູນໃຫ້ແກ່ການເລືອກຕັ້ງໃນຊຸດຕໍ່ໜ້າ; ເຂົ້າຮ່ວມການຄົ້ນຄວ້າປະກອບຄໍາຄິດ, ຄໍາເຫັນໃສ່ຮ່າງກົດໝາຍ 8 ສະບັບ, ຮ່າງມະຕິຂອງຄະນະປະຈໍາ ສພຊ 4 ສະບັບ, ຮ່າງນິຕິກໍາໃຕ້ກົດໝາຍ (ຂໍ້ຕົກລົງຂອງທ່ານເຈົ້າແຂວງ) 3 ສະບັບ; ນອກນັ້ນກໍ່ຍັງມີບາງບັນຫາຂໍ້ຫຍຸ້ງຍາກຈໍານວນໜຶ່ງ ທີ່ຈະຕ້ອງໄດ້ປັບປຸງ ແກ້ໄຂໃຫ້ດີຂຶ້ນ ແລະ ສ່ວນທິດທາງແຜນການໃນປີຕໍ່ໜ້າ ສືບຕໍ່ເປັນເຈົ້າການ ນໍາເອົາຜົນສໍາເລັດຂອງກອງປະຊຸມສະໄໝສາມັນເທື່ອທີ 2 ແລະ ເທື່ອທີ 3 ຂອງ ສພຊ ຊຸດທີ IX ແລະ ສພຂ ສາລະວັນ ຊຸດທີ II ໃຫ້ໄດ້ 15 ຈຸດເຄື່ອນໄຫວເຜີຍແຜ່ໃຫ້ເລິກເຊິ່ງ ແລະ ກວ້າງຂວາງ ໂດຍຕິດພັນກັບການພົບປະຢ້ຽມຢາມ, ແລກປ່ຽນຄໍາຄິດເຫັນ, ຄວາມມຸ້ງມາດປາຖະໜາຂອງປະຊາຊົນຜູ້ມີສິດເລືອກຕັ້ງ ໃນຂອບເຂດເມືອງຄົງເຊໂດນ; ໃນວາລະຕໍ່ມາ ຜູ້ເຂົ້າຮ່ວມກໍ່ໄດ້ຜັດປ່ຽນກັນປະກອບຄຳເຫັນ ແລະ ແລກປ່ຽນວຽກງານບາງບັນຫາຈໍານວນໜຶ່ງ ເຂົ້າໃສ່ເນື້ອໃນຮ່າງບົດສະຫຼຸບດັ່ງກ່າວແນ່ໃສ່ໃຫ້ມີເນື້ອໃນຄົບຖ້ວນສົມບູນຂຶ້ນຕື່ມ.

ໂອກາດດຽວກັນ, ທ່ານປະທານ ສພຂ ພ້ອມດ້ວຍ ສສຂ ໄດ້ຜັດປ່ຽນກັນເຜີຍແຜ່ຜົນສໍາເລັດຂອງກອງປະຊຸມສະໄໝສາມັນເທື່ອທີ 2 ສພຊ ຊຸດທີ IX ແລະ ສພຂ ສາລະວັນ ຊຸດທີ II ກໍ່ຄືມະຕິກອງປະຊຸມທີ່ຕົກລົງຮັບຮອງເອົາບັນຫາສຳຄັນພື້ນຖານຂອງປະເທດຊາດ ຂອງທ້ອງຖິ່ນ ແລະ ສອງວາລະແຫ່ງຊາດ ວ່າດ້ວຍການແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ບັນຫາຢາເສບຕິດ ໃຫ້ບັນດາທ່ານການນໍາຂັ້ນເມືອງ, ພະນັກງານຫຼັກແຫຼງຂັ້ນເມືອງ ໄດ້ຮັບຮູ້ ແລະ ເຂົ້າໃຈ ນຳໄປຈັດຕັ້ງຜັນຂະຫຍາຍເຂົ້າສູ່ວຽກງານເຂົ້າສູ່ລວງເລິກໃຫ້ມີຜົນສຳເລັດ.

ດີລຳພົນ ພົມມະຈັນ