ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສ​ພ​ຊ) ກອງປະຊຸມສະໄໝວິສາມັນຂອງສະພາປະຊາຊົນແຂວງ (ສ​ພ​ຂ) ຫລວງນໍ້າທາ ໄດ້ໄຂ​ຂຶ້ນ ແລະ ອັດລົງດ້ວຍຜົນສຳເລັດອັນຈົບງາມ ພາຍ​ຫລັງດຳເນີນຂຶ້ນເປັນເວລາ​ໜຶ່ງຕອນຂອງວັນທີ 20 ກໍລະກົດ 2021 ຢູ່ທີ່ສະໂມສອນຂອງແຂວງ​ຫລວງ​ນ້ຳ​ທາ ໂດຍການປະທານຂອງ ທ່ານ ຄຳຟອງ ອິນມານີ ປະທານ ສ​ພ​ຂ ຫລວງນໍ້າທາ; ເຂົ້າຮ່ວມມີທ່ານ ຄຳໄຫລ ສີປະເສີດ ເຈົ້າແຂວງໆຫລວງນໍ້າທາ, ມີກຳມະການປະຈຳພັກແຂວງ, ກຳມະການພັກແຂວງ, ສະມາຊິກສະພາແຫ່ງຊາດ (ສ​ຊ​ຊ) ປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ (ສ​ສ​ຂ), ອະດີດການນຳຂອງແຂວງ, ອະດີດ ສ​ສ​ຊ ປະຈຳເຂດເລືອກຕັ້ງ, ອະດີດ ສ​ສ​ຂ, ອົງການແນວລາວສ້າງຊາດແຂວງ, ອົງການຈັດຕັ້ງມະຫານຊົນ, ພະແນກການ, ສອງກອງບັນຊາການ, ເຈົ້າເມືອງ 5 ເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມທັງໝົດ 100 ກວ່າທ່ານ.

ກອງປະຊຸມຄັ້ງ​ນີ້, ໄດ້ຄົ້ນຄວ້າພິຈາລະນາ, ລົງຄະແນນສຽງຮັບຮອງເອົາບຸກຄະລາກອນ ທີ່ເຈົ້າແຂວງໄດ້ສະເໜີແຕ່ງຕັ້ງເປັນຮອງເຈົ້າແຂວງຫລວງນ້ຳທາ ເພື່ອເຮັດໃຫ້ອົງການບໍລິຫານລັດຂັ້ນແຂວງ ໄດ້ຈັດຕັ້ງປະຕິບັດພາລະບົດບາດຂອງຕົນ ທັນເວລາ ແລະ ຖືກຕ້ອງຕາມກົດໝາຍ ໂດຍສະເພາະເພື່ອຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ເຊິ່ງເປັນການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ ຄັ້ງທີ VIII ຂອງອົງຄະນະພັກແຂວງ ໃຫ້ສໍາເລັດຕາມລະດັບຄາດໝາຍ ແລະ ມີປະສິດທິຜົນສູງຂຶ້ນກວ່າເກົ່າ.

ກອງປະຊຸມສະໄໝວິສາມັນຂອງ ສ​ພ​ຂ ໄດ້ດຳເນີນຂຶ້ນຢ່າງເຄັ່ງຮ້ອນ, ມີປະຊາທິປະໄຕ, ມີຄວາມສາມັກຄີ ແລະ ຄວາມຮັບຜິດຊອບຂອງຜູ້ແທນກອງປະຊຸມ; ກອງປະຊຸມໄດ້ສິ້ນສຸດລົງ ດ້ວຍຜົນສຳເລັດອັນດີ ເຊິ່ງໄດ້ສະແດງເຖິງຄວາມເປັນເອກະພາບ ແລະ ຄວາມຮັບຜິດຊອບການເມືອງຂອງບັນດາ ສ​ສ​ຂ ໃນການປະຕິບັດ 3 ພາລະບົດບາດຂອງຕົນ ເຂົ້າໃນການຄົ້ນຄວ້າ, ພິຈາລະນາຮັບຮອງເອົາບັນຫາສໍາຄັນພື້ນຖານຂອງທ້ອງຖິ່ນ, ເປັນການສ້າງເງື່ອນໄຂຕາມກົດໝາຍ ໃຫ້ແກ່ອົງການປົກຄອງແຂວງ ຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ຂອງຕົນ ຢ່າງຄົບຖ້ວນ ແລະ ທັນເວລາ ທັງເປັນການປະກອບສ່ວນຢ່າງຕັ້ງໜ້າ ຂອງບັນດາອົງການຈັດຕັ້ງຂອງພັກ-ລັດທີ່ກ່ຽວຂ້ອງ, ອົງການແນວລາວສ້າງຊາດ, ອົງການຈັດຕັ້ງມະຫາຊົນ, ພະນັກງານ-ລັດຖະກອນ ແລະ ທຸກພາກສ່ວນທີ່ກ່ຽວຂ້ອງ.

(ອຳພອນ ສີປະເສີດ)