ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນບ່າຍຂອງວັນອາທິດ, ວັນທີ 16 ກໍລະກົດ 2022 ນີ້, ຢູ່ທີ່ຫ້ອງປະຊຸມຊັ້ນ 3 ຫ້ອງວ່າການແຂວງອຸດົມໄຊ ໄດ້ຈັດກອງປະຊຸມພົບປະ ລະຫວ່າງ ຄະນະຜູ້ແທນຂັ້ນສູງ ແຂວງດຽນບຽນ ແຫ່ງ ສສ ຫວຽດນາມ ກັບ ຄະນະຜູ້ແທນຂັ້ນສູງແຂວງອຸດົມໄຊ ແຫ່ງ ສປປ ລາວ, ຝ່າຍແຂວງດຽນບຽນນຳໂດຍສະຫາຍ ຫວງຽນ ວັນຖັງ ກຳມະການສູນກາງພັກ, ເລຂາພັກແຂວງ, ຫົວຫນ້າຄະນະຜູ້ແທນສະມາຊິກສະພາແຫ່ງຊາດ ແຂວງດຽນບຽນ ພ້ອມດ້ວຍຄະນະ ແລະ ຝ່າຍແຂວງອຸດົມໄຊນຳໂດຍສະຫາຍ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງອຸດົມໄຊ ພ້ອມດ້ວຍຄະນະ.
ກອງປະຊຸມຜູ້ແທນໄດ້ຮັບຊົມ, ຮັບຟັງການລາຍງານການຮ່ວມມືດ້ານການສຶກສາ ໃນໄລຍະຜ່ານມາ, ກໍ່ຄື ສົກປີ 2018-2020 ແຂວງອຸດົມໄຊ ໄດ້ຮັບການຊ່ວຍເຫຼືອດ້ານງົບປະມານຈຳນວນ 12 ຕື້ດົງ ເຂົ້າໃນການກໍ່ສ້າງອາຄານຮຽນ ແລະ ດ້ານການສຶກສາຕ່າງໆ ສະເໜີໂດຍສະຫາຍ ສົມສັກ ສຸພິໄລ ຫົວໜູ້າພະແນກສຶກສາທິການ ແລະ ກິລາແຂວງອຸດົມໄຊ.
ຫຼັງຈາກນັ້ນສະຫາຍ ບຸນຄົງ ຫລ້າຈຽມພອນ ກຳມະການສຳຮອງສູນກາງພັກ, ເລຂາຄະນະບໍລິຫານງານພັກແຂວງ ເຈົ້າແຂວງອຸດົມໄຊ ແລະ ສະຫາຍ ຫວງຽນ ວັນຖັງ ກຳມະການສູນກາງພັກ, ເລຂາພັກແຂວງ, ຫົວຫນ້າຄະ ນະຜູ້ແທນສະມາຊິກສະພາແຫ່ງຊາດ ແຂວງດຽນບຽນ ໄດ້ລາຍງານສະພາບລວມຂອງການພັດທະນາເສດຖະກິດ-ສັງຄົມຂອງແຂວງຕົນ, ຜົນການຈັດຕັ້ງປະຕິບັດບົດບັນທຶກລະຫວ່າງ ແຂວງດຽນບຽນ ແຫ່ງ ສສ ຫວຽດນາມ ກັບ ແຂວງອຸດົມໄຊ ແຫ່ງ ສປປ ລາວ ໄລຍະປີຜ່ານມາ, ເຊິ່ງມີຫລາຍດ້ານທີ່ພົ້ນເດັ່ນເຊັ່ນ: ວຽກງານການກໍ່ສ້າງພັກ ແລະ ຮາກຖານການເມືອງ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານການລົງທຶນ, ການຄ້າ ແລະ ການບໍລິການ, ວຽກງານກະສິກຳ, ວຽກງານໂຍທາທິການ ແລະ ຂົນສົ່ງ, ວຽກງານວັດທະນະທໍາ-ສັງຄົມ, ວຽກງານສາທາ ລະນະສຸກ, ວຽກງານວັດທະນະທຳ ແລະ ກິລາ ເປັນຕົ້ນ. ພ້ອມນັ້ນທັງສອງຝ່າຍໄດ້ສົນທະນາ, ແລກປ່ຽນຄໍາຄິດເຫັນ ແລະ ເປັນເອກະພາບກັນທາງດ້ານເນື້ອໃນຂອງບົດບັນທຶກຊ່ວຍຈໍາລະຫວ່າງ ແຂວງດຽນບຽນ ແຫ່ງ ສສ ຫວຽດນາມ ກັບ ແຂວງອຸດົມໄຊ ແຫ່ງ ສປປ ລາວ ແລະ ໂອກາດດັ່ງກ່າວຄະນະຜູ້ແທນຂອງ 2 ແຂວງ ກໍ່ໄດ້ລົງນາມບົດບັນທຶກຊ່ວຍຈຳ ຢ່າງເປັນທາງການ. ພາບ/ຂ່າວ: ແສງພອນ ອິນນະລົງ.