ຕອນເຊົ້າຂອງວັນທີ 14 ທັນວາ 2023 ຢູ່ສະໂມສອນເມືອງງາ, ແຂວງອຸດົມໄຊ ສະພາປະຊາຊົນແຂ ວງ ໄດ້ໄຂກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນແຂວງ ໃນການຕິດຕາມກວດກາ ການຈັດຕັ້ງປະຕິບັດການຊີ້ແຈງຂອງການຈັດຕັ້ງກ່ຽວຂ້ອງ ແລະ ບຸກຄະລາກອນທີ່ສະພາປະຊາຊົນແຂວງເລືອກຕັ້ງ ແລະ ຮັບຮອງເອົາການແຕ່ງຕັ້ງ, ໂດຍການເປັນປະທານຂອງທ່ານ ຄໍາດີ ວົງລ້ອມ ຮອງເລຂາພັກແຂວງ ປະທານສະພາປະຊາຊົນແຂວງ, ມີສະຫາຍ ຄໍາເຜີຍ ງອນວັນຄໍາ ກໍາມະການປະຈໍາພັກແຂວງ ຮອງປະທານສະພາປະຊາຊົນແຂວງ, ມີວິທະຍາກອນຈາກສະພາແຫ່ງຊາດ, ຄະນະປະຈໍາສະພາປະຊາຊົນແຂວງ, ສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 7 ເມືອງ, ຄະນະເລຂາທິການ, ຫົວໜ້າຂະແໜງ ແລະ ພະນັກງານວິຊາການພາຍໃນສະພາປະຊາຊົນແຂວງ ເຂົ້າຮ່ວມ.

ຈຸດປະສົງຂອງກອງປະຊຸມແມ່ນເພື່ອຈັດຕັ້ງເຊື່ອມຊຶມພາລະບົດບາດໃນການຕິດຕາມກວດກາຂອງສະມາຊິກສະພາປະຊາຊົນແຂວງ ໃນວາລະກອງປະຊຸມສະໄໝສາມັນແຕ່ລະຄັ້ງ, ໃຫ້ກໍາໄດ້ຫຼັກການ, ຂັ້ນຕອນ ແລະ ວິທີການຕິດຕາມກວດກາ ຕາມການລາຍງານຂອງອົງການປົກຄອງແຂວງ ແລະ ຕາມການສະເໜີຂອງປະຊາຊົນ, ຊັກຖາມ ແລະ ຕິດຕາມກວດກາ ການຊີ້ແຈງຂອງອົງການປົກຄອງໃນກອງປະຊຸມສະໄໝສາມັນແຕ່ລະຄັ້ງໃຫ້ຮັດກຸມ, ມີປະສິດທິຜົນສູງ ແລະ ເພື່ອຈັດຕັ້ງປະຕິບັດການລົງຄະນະແນນຄວາມໄວ້ວາງໃຈໃຫ້ໄປລວງດຽວກັນ ຮັບປະກັນດ້ານເນື້ອໃນ, ຄຸນນະພາບ ແລະ ທັນກັບເວລາ, ພ້ອມທັງເປັນການເປີດກ້ວາງໃຫ້ບັນດາສະມາຊິກສະພາປະຊາຊົນແຂວງປະຈໍາເຂດເລືອກຕັ້ງ 7 ເມືອງ ສົນທະນາແລກປ່ຽນບົດຮຽນເຊິ່ງກັນ ແລະ ກັນ ໃຫ້ເລິກເຊິ່ງກວ່າເກົ່າ.

           ກອງປະຊຸມໄດ້ຮັບຟັງການຜ່ານ ພາລະບົດບາດ, ສິດ ແລະ ໜ້າທີ່ຂອງສະມາຊິກສະພາປະຊາຊົນແຂວງ ດ້ານການຕິດຕາມກວດກາ; ບົດຮຽນການປະເມີນບຸກຄະລາກອນທີ່ສະພາແຫ່ງຊາດເລືອກຕັ້ງ ແລະ ຮັບຮອງເອົາການເລືອກຕັ້ງ; ບົດຮຽນກ່ຽວກັບ ການຕິດຕາມກວດກາການຈັດຕັ້ງປະຕິບັດຄຳຊີ້ແຈງຂອງການຈັດຕັ້ງ ກ່ຽວຂ້ອງຂົງເຂດເສດຖະກິດ ແລະ ບົດຮຽນກ່ຽວກັບການກະກຽມບົດປະກອບຄຳເຫັນ ແລະ ການສ້າງຄຳຊັກຖາມ ໃນກອງປະຊຸມສະໄໝສາມັນຂອງສະພາປະຊາຊົນແຂວງ. ຈາກນັ້ນ, ປະທານໄດ້ຮຽກຮ້ອງມາຍັງບັນດາສະມາຊິກສະພາ ຈົ່ງສຸມທຸກສະຕິປັນຍາຂອງຕົນ ເຂົ້າໃນການຄົ້ນຄວ້າ, ເຊື່ອມຊຶມ ແລະ ສົນທະນາແລກປ່ຽນຄວາມຄິດເຫັນໃນແຕ່ລະຫົວຂໍ້ ຮ່ວມກັນໃຫ້ເປັນຂະບວນຟົດຟື້ນ ເພື່ອຮັບປະກັນການກໍາແໜ້ນພາລະບົດບາດ, ສິດ ແລະ ໜ້າທີ່ ຂອງສະມາຊິກສະພາປະຊາຊົນແຂວງໃນແຕ່ລະດ້ານ ແລະ ຮັບປະກັນການຈັດຕັ້ງປະຕິບັດໜ້າທີ່ວຽກງານຂອງຕົນໃຫ້ສໍາເລັດຕາມຈຸດປະສົງ ແລະ ຄາດໝາຍທີ່ວາງໄວ້. ກອງປະຊຸມຝຶກອົບຮົມສ້າງຄວາມເຂັ້ມແຂງໃຫ້ແກ່ສະມາຊິກສະພາປະຊາຊົນແຂວງໃນຄັ້ງນີ້ ດໍາເນີນເປັນເວລາ 2 ວັນຈຶ່ງສໍາເລັດ.

ສສະໝັບສະໜູນໂດຍ: ໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ(ມູນນິທິເອເຊຍ).

ພາບ/ຂ່າວ: ສະພາປະຊາຊົນແຂວງ