ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມຝຶກອົບຮົມຍົກສູງລະດັບສ້າງຂີດຄວາມສາມາດແບບໃໝ່ ໃຫ້ແກ່ ສສຊ-ສສຂ ແລະ ພະນັກງານ-ລັດຖະກອນພາຍໃນສະພາປະຊາຊົນແຂວງໄຊສົມບູນ

ຕ.ລ. 4, 2022 | ເຂດ 18 ໄຊສົມບູນ

 

ໃນລະຫວ່າງວັນທີ 28-29 ກັນຍາ 2022 ຜ່ານມານີ້, ສະພາປະຊາຊົນແຂວງໄຊສົມບູນ ໄດ້ໄຂກອງປະຊຸມຝຶກອົບຮົມ ກ່ຽວກັບການຕິດຕາມກວດກາ ການຈັດຕັ້ງປະຕິບັດແຜນງົບປະມານ ແລະ ແຜນພັດທະນາເສດຖະກິດ-ສັງຄົມ, ພາລະບົດບາດຂອງບັນດາກົງຈັກການຈັດຕັ້ງ ຂອງສະພາປະຊາຊົນແຂວງ ແລະ ທັກສະການເປັນເສນາທິການ ໃຫ້ແກ່ສະພາປະຊາຊົນແຂວງໄຊສົມບູນ ທີ່ສະໂມສອນໃຫຍ່ກອງບັນຊາການທະຫານເມືອງທ່າໂທມ, ໂດຍພາຍໃຕ້ການເຂົ້າຮ່ວມ ເປັນປະທານຂອງ ທ່ານ ແດງ ປະທຸມທອງ ຮອງເລຂາພັກແຂວງ, ປະທານຄະນະ ສສຊ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ແລະ ໃຫ້ກຽດເຂົ້າຮ່ວມ ເປັນວິທະຍາກອນໂດຍ ທ່ານ ປອ ສາຍທອງ ພົມມະວົງ ຫົວໜ້າກົມແຜນການ ແລະ ການລົງທຶນ ສະພາແຫ່ງຊາດ ແລະ ມີບັນດາ ທ່ານ ຄະນະ ສສຊ ປະຈໍາເຂດເລືອກຕັ້ງ, ບັນດາທ່ານ ສສຂ ປະຈໍາເຂດເລືອກຕັ້ງ 5 ເມືອງ ຕະຫຼອດຮອດພະນັກງານ-ລັດຖະກອນ ທັງພາຍໃນສະພາປະຊາຊົນແຂວງ ແລະ ຜູ້ຊ່ວຍວຽກ ສສຊ-ສສຂ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວນີ້, ທ່ານ ແດງ ປະທຸມທອງ ປະທານກອງປະຊຸມໄດ້ກ່າວໄຂກອງປະຊຸມ ໂດຍທ່ານ ໄດ້ໃຫ້ຮູ້ວ່າ: ເພື່ອຍົກສູງຂີດຄວາມສາມາດໃຫ້ແກ່ ສສຊ-ສສຂ ແລະ ພະນັກງານ-ລັດຖະກອນພາຍໃນ ສະພາປະຊາຊົນແຂວງໄຊສົມບູນ ຮັບຮູ້ ແລະ ເຂົ້າໃຈ ໃນການຈັດຕັ້ງປະຕິບັດແຜນງົບປະມານ ແລະ ແຜນພັດທະນາເສດຖະກິດ-ສັງຄົມ, ພາລະບົດບາດຂອງບັນດາກົງຈັກການຈັດຕັ້ງ ຂອງສະພາປະຊາຊົນແຂວງ ແລະ ທັກສະການເປັນເສນາທິການ ໃຫ້ແກ່ສະພາປະຊາຊົນແຂວງ ດັ່ງກ່າວ, ທີ່ປະຊຸມໄດ້ຮັບຟັງການນໍາສະເໜີ ແລະ ການເຊື່ອມຊຶມຄືດັ່ງນີ້:

ຮັບຟັງບົດຮຽນຈາກ ທ່ານ ປອ ສາຍທອງ ພົມມະວົງ ວິທະຍາກອນ ໄດ້ນໍາເອົາຮ່າງເອກະສານທີ່ມີຄວາມໝາຍອັນສໍາຄັນ ແລະ ນໍາສະເໜີບົດຮຽນ ກ່ຽວກັບ ການຕິດຕາມກວດກາ ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ແຜນງົບປະມານຂັ້ນແຂວງ. ພ້ອມນັ້ນ, ວິທະຍາກອນ ແລະ ສໍາມະນາກອນ ຍັງໄດ້ສົນທະນາແລກປ່ຽນບົດຮຽນ, ພ້ອມທັງສະເໜີ ບາງບັນຫາທີ່ຄ້າງຄາ, ຂ້ອງໃຈ ແລະ ທ່ານ ປອ ສາຍທອງ ພົມມະວົງ ວິທະຍາກອນ ທ່ານ ໄດ້ອະທິບາຍຊີ້ແຈງຕາມການສະເໜີ ແລະ ຂໍ້ຂ້ອງໃຈຕ່າງໆ ເພື່ອໃຫ້ທີ່ປະຊຸມເຂົ້າໃຈຢ່າງເລິກເຊິ່ງ;

ພ້ອມດຽວກັນນີ້ ທີ່ປະຊຸມຍັງໄດ້ຮັບຟັງການເຊື່ອມຊຶມ ກົດໝາຍວ່າດ້ວຍເອກະສານ ຈາກທ່ານ ແດງ ປະທຸມທອງ ປະທານກອງປະຊຸມ ໂດຍທ່ານ ໄດ້ເໜັ້ນໜັກໃຫ້ເປັນການຖາມ-ຕອບ ເປັນສ່ວນຫຼາຍ ເພື່ອເປັນການແລກປ່ຽນບົດຮຽນເຊິ່ງກັນ ແລະ ກັນ ໃຫ້ບັນຍາກາດໃນຫ້ອງປະຊຸມມີຂະບວນການທີ່ຟົດຟື້ນ ແລະ ເພື່ອເຮັດໃຫ້ ຜູ້ເຂົ້າຮ່ວມກອງປະຊຸມສາມາດກໍາແໜ້ນ, ຮັບຮູ້ເຖິງຄວາມສໍາຄັນຂອງເອກະສານຕ່າງໆ ທາງລັດຖະການ ແລະ ເອກະສານທົ່ວໄປ ທີ່ມີຄວາມໝາຍ ຂອງພັກ-ຂອງຊາດ ແລະ ຍັງໄດ້ຮັບຟັງບົດຮຽນກ່ຽວກັບ ມະຕິວ່າດ້ວຍການຈັດຕັ້ງ ແລະ ການເຄື່ອນໄຫວ ຂອງຄະນະປະຈໍາສະພາປະຊາຊົນແຂວງ;

ຮັບຟັງມະຕິຂອງຄະນະປະຈໍາສະພາປະຊາຊົນແຂວງ ວ່າດ້ວຍການຈາລະຈອນເອກະສານພາຍໃນສະພາປະຊາຊົນແຂວງ; ຮັບຟັງມະຕິ ຂອງຄະນະປະຈໍາສະພາປະຊາຊົນແຂວງ ວ່າດ້ວຍລະບຽບການກະກຽມ, ດໍາເນີນກອງປະຊຸມສະພາປະຊາຊົນແຂວງ ແລະ ກອງປະຊຸມພາຍໃນສະພາປະຊາຊົນແຂວງໄຊສົມບູນ ແລະ ຮັບຟັງບົດຮຽນກ່ຽວກັບ ສິດ, ພາລະບົດບາດຂອງ ຄະນະເລຂາທິການ ຂອງຂະແໜງຄົ້ນຄວ້າ-ສັງລວມ, ຂໍ້ມູນຂ່າວສານ, ຂະແໜງບໍລິຫານ-ການເງິນ ແລະ ຂະແໜງຈັດຕັ້ງກວດກາ ແລະ ວຽກງານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ແລະ ສະມາຊິກສະພາປະຊາຊົນແຂວງ ເຊິ່ງນໍາສະເໜີໂດຍ ທ່ານ ນາງ ຂັນກາບ ໄຊຍະກຸມມານ ສສຊ, ຄະນະປະຈໍາ, ເລຂາທິການສະພາປະຊາຊົນແຂວງໄຊສົມບູນ;

ຮັບຟັງບົດຮຽນກ່ຽວກັບ ສິດ, ພາລະບົດບາດຂອງ ຄະນະກໍາມະການເສດຖະກິດ, ແຜນການ ແລະ ການເງິນ ນໍາສະເໜີໂດຍທ່ານ ນາງ ຄໍາຫຼ້າ ທອງສີວອນ ສສຂ ປະຈໍເຂດເລືອກຕັ້ງເມືອງລ້ອງຊານ, ຮອງປະທານຄະນະກໍາມະການເສດຖະກິດ, ແຜນການ ແລະ ການເງິນ; ຮັບຟັງບົດຮຽນ ກ່ຽວກັບ ສິດ, ພາລະບົດບາດ ຂອງຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ ນໍາສະເໜີໂດຍທ່ານ ສົມດີ ຈັນທະວົງ ສສຂ ປະຈໍາເຂດເລືອກຕັ້ງປະຈໍາເມືອງທ່າໂທມ, ປະທານຄະນະກໍາມະການວັດທະນະທໍາ-ສັງຄົມ ແລະ ບັນດາເຜົ່າ; ຮັບຟັງກ່ຽວກັບ ສິດ, ພາລະບົດບາດ ຂອງຄະນະກໍາມະການຍຸຕິທໍາ ແລະ ປກຊ-ປກສ ນໍາສະເໜີໂດຍ ທ່ານ ພັທ ທອງພຽນ ກົງສະເດັດ ສສຂ ປະເຂດເລືອກຕັ້ງເມືອງອະນຸວົງ, ຮອງປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ;

ພາຍຫຼັງທີ່ໄດ້ຮັບຟັງການນໍາສະເໜີເອກະສານສໍາຄັນຕ່າງໆ ສໍາເລັດແລ້ວ ທ່ານ ແດງ ປະທຸມທອງ ປະທານກອງປະຊຸມ ໄດ້ຊີ້ນໍາ-ນໍາພາ ແລະ ທ່ານ ໄດ້ມີຄໍາເຫັນໂອ້ລົມທີ່ປະຊຸມ ໂດຍທ່ານ ໄດ້ເໜັ້ນໜັກ ໃຫ້ບັນດາທ່ານ ສສຊ-ສສຂ ຕະຫຼອດຮອດພະນັກງານ-ລັດຖະກອນ ພາຍໃນສະພາປະຊາຊົນແຂວງໄຊສົມບູນ ຈົ່ງພ້ອມກັນນໍາເອົາເນື້ອໃນຈິດໃຈ ໄປເປັນບົດຮຽນ ໃນການປະຕິບັດຈັງຕັ້ງວຽກງານ ໃຫ້ປະກົດຜົນເປັນຈິງ ທັງໃນປັດຈຸບັນ ແລະ ໃນຕໍ່ໜ້າ ແລ້ວທ່ານໄດ້ ກ່າວປິດກອງປະຊຸມຢ່າງເປັນທາງການ ໃນເວລາ 2:30 ນາທີ ຂອງວັນທີ 29 ກັນຍາ 2022, ເຊິ່ງກອງປະຊຸມໄດ້ດໍາເນີນເປັນເວລາ 2 ວັນດ້ວຍກັນ ແລະ ໄດ້ຮັບການສະໜັບສະໜູນໂດຍ: ແຜນງານການມີສ່ວນຮ່ວມຂອງປະຊາຊົນ ຂອງວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ-CEGGA).

(ນາງ ອໍາໄພພອນ ແກ້ວວິໄລ)