ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ຕອນເຊົ້າວັນທີ 12 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດກອງປະຊຸມປືກສາຫາລື ກ່ຽວກັບການສ້າງນິຕິກໍາໃຕ້ກົດໝາຍຂອງແຂວງ ໂດຍການເປັນປະທານ ຂອງທ່ານ ຫຸມເພັງ ຈອມວິສານ ກໍາມະການພັກແຂວງ, ຮອງປະທານ ຄະນະປະຈໍາສະພາປະຊາຊົນແຂວງ (ຄຈປຂ); ມີບັນດາປະທານ, ຮອງຄະນະກໍາມະການ ສພຂ, ຕາງໜ້າຈາກ ພະແນກຍຸຕິທໍາແຂວງ, ພະແນກພາຍໃນແຂວງ, ພະແນກແຜນການ ແລະ ການລົງທຶນແຂວງ, ພະແນກສຶກສາທິການ ແລະ ກິລາແຂວງ, ກອງບັນຊາການ ປກສ ແຂວງ, ແນວລາວສ້າງຊາດແຂວງ ແລະ ພະນັກງານວິຊາການທີ່ກ້ຽວຂ້ອງພາຍໃນ ສພຂ ເຂົ້າຮ່ວມ.

ກອງປະຊຸມຄັ້ງນີ້ແມ່ນເພື່ອປືກສາຫາລື ແລະ ກວດກາເບິ່ງຄວາມພ້ອມກ່ຽວກັບການສ້າງ ນິຕິກໍາໃຕ້ກົດໝາຍຂອງແຂວງ ເປັນຕົ້ນ: ຂໍ້ຕົກລົງຂອງເຈົ້າແຂວງ ວ່າດ້ວຍການສະກັດກັ້ນ, ຕ້ານ ແລະ ແກ້ໄຂບັນຫາຢາເສບຕິດຢູ່ແຂວງຜົ້ງສາລີ; ຂໍຕົກລົງຂອງເຈົ້າແຂວງ ວ່າດ້ວຍການຈັດງານບຸນປະເພນີ ຢູ່ພາຍໃນແຂວງຜົ້ງສາລີ; ຂໍ້ຕົກລົງຂອງເຈົ້າແຂວງ ວ່າດ້ວຍການສ້າງກອງທຶນກິລາກາຍຍະກໍາ ແຂວງຜົ້ງສາລີ; ຂໍ້ຕົກລົງຂອງເຈົ້າແຂວງ ວ່າດ້ວຍກໍານົດຫົວໜ່ວຍລາຄາສິ່ງປຸກສ້າງ, ພືດອຸດສາຫະກໍາ ແລະ ພືດກະສີກໍາ ແລະ ໜັງສະເໜີຂອງອົງການປົກຄອງແຂວງທີ່ ສະເໜີໃຫ້ ສພຂ ຄົ້ນຄວ້າ, ພິຈາລະນາຮັບຮອງເອົາແຊງ ຂອງຊົນເຜົ່າອາຄາ 2 ແຊງ (ແຊງປາລາ ແລະ ແຊງພືຊໍ) ທັງນີ້ກໍຄວາມເປັນເອກະພາບທາງເນື້ອໃນ ແລະ ຫຼັກການ ເພື່ອໃຫ້ມີຄວາມຮັດກຸມ.

ທີ່ປະຊຸມໄດ້ຮັບຟັງທ່ານ ຄໍາພັນ ຄຸນສົມບັດ ຮອງປະທານຄະນະກໍາມະການຍຸຕິທໍາ ແລະ ປ້ອງກັນຊາດ-ປ້ອງກັນຄວາມສະຫງົບ ຂຶ້ນສະເໜີ ຜົນຂອງການຄົ້ນຄວ້າ, ກວດກາ ກ່ຽວກັບເນື້ອໃນ ຮ່າງນິຕິກໍາໃຕ້ກົດໝາຍ ຂອງອົງການປົກຄອງແຂວງ ຈໍານວນ 4 ສະບັບ ແລະ ການສະເໜີໃຫ້ ສພຂ ຮັບຮອງເອົາ ແຊງຂອງຊົນເຜົ່າອາຄາ 2 ແຊງ (ແຊງປາລາ ແລະ ແຊງພືຊໍ). ຈາກນັ້ນ, ຜູ້ແທນກອງປະຊຸມກໍໄດ້ຜັດປ່ຽນກັນປະກອບຄໍາເຫັນຕໍ່ເນື້ອໃນດັ່ງກ່າວຢ່າງກົງໄປກົງມາ ເພື່ອຮັບປະກັນໃຫ້ເນື້ອໃນມີຄວາມສອດຄ່ອງ ແລະ ຖືກຕ້ອງທາງດ້ານລະບຽບ, ຫຼັກການ ແລະ ຮັບປະກັນເຖິງຄວາມເປັນທໍາຂອງສັງຄົມ.

ຕອນທ້າຍຂອງປະຊຸມທ່ານ ຫຸມເພງ ຈອມວິສານ ໄດ້ສັງລວມຄືນຜົນຂອງກອງປະຊຸມປືກສາຫາລື ພ້ອມທັງຮຽກຮ້ອງໃຫ້ແຕ່ລະພາກສ່ວນທີ່ກ່ຽວຂ້ອງເອົາໃຈໃສ່ໃນການປັບປຸງເນື້ອໃນນິຕິກໍາໃຕ້ກົດໝາຍດັ່ງກ່າວ ເພື່ອຮັບປະກັນໃຫ້ນໍາສະເໜີເຂົ້າໃນກອງປະຊຸມສະໄໝສາມັນ ເທື່ອທີ 3 ຂອງ ສພຂ ຊຸດທີ II ຄົ້ນຄວ້າພິຈາລະນາ ແລະ ຮັບຮອງເອົາຕາມລະບຽບກົດໝາຍ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ