ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ກອງປະຊຸມປຶກສາຫາລື ແລະ ກະກຽມເນື້ອໃນໃຫ້ແກ່ກອງປະຊຸມວິສາມັນ ຂອງສະພາປະຊາຊົນແຂວງຫລວງນ້ຳທາ

ຕ.ລ. 7, 2022 | ເຂດ 3 ຫຼວງນ້ຳ​ທາ

ຕອນແລງວັນທີ 6 ຕຸລາ 2022 ຢູ່ຫ້ອງປະຊຸມສະພາປະຊາຊົນແຂວງ ໄດ້ເປີດກອງປະຊຸມປຶກສາຫາລື ແລະ ກະກຽມເນື້ອໃນຮອບດ້ານໃຫ້ແກ່ກອງປະຊຸມວິສາມັນຄັ້ງທີII ຂອງສະພາປະຊາຊົນແຂວງຫລວງນ້ຳທາ ຊຸດທີ2 ທີ່ຈະພິຈາລະນາ, ຮັບຮອງເອົາຂໍ້ຕົກລົງເຈົ້າແຂວງ ວ່າດ້ວຍການກຳນົດລາຄາຫົວໜ່ວຍຊົດເຊີຍຜົນກະທົບຈາກໂຄງການພັດທະນາຕົວເມືອງທັນສະໄໝ ແລະ ເປັນມິດຕໍ່ສິ່ງເເວດລ້ອມ ພາຍໃຕ້ການເປັນປະທານຮ່ວມຂອງທ່ານ ຄຳຟອງ ອີນມານີ ຮອງເລຂາພັກແຂວງ ປະທານສະພາປະຊາຊົນແຂວງ ແລະ ທ່ານ ອ່ອນຈັນ ຄຳພາວົງ ຮອງເຈົ້າແຂວງຫລວງນ້ຳທາ, ຜູ້ຊີ້ນຳວຽກງານເສດຖະກິດແຂວງ, ມີສະມາຊິກສະພາແຫ່ງຊາດປະຈຳເຂດເລືອກຕັ້ງ, ສະມາຊິກສະພາປະຊາຊົນແຂວງ, ຫົວໜ້າ, ຮອງຫົວໜ້າພະແນກການ, ຄະນະຮັບຜິດຊອບສ້າງນິຕິກຳຮ່າງຂໍ້ຕົກລົງເຈົ້າແຂວງ, ຫົວໜ້າ, ຮອງຫົວໜ້າຂະແໜງ ພ້ອມດ້ວຍພະນັກງານທີ່ກ່ຽວຂ້ອງເຂົ້າຮ່ວມ 35 ຄົນ. ຍິງ 6 ຄົນ.

ກອງປະຊຸມໄດ້ຮັບຟັງການລາຍງານໂດຍຫຍໍ້ຂອງຮ່າງຂໍ້ຕົກລົງເຈົ້າແຂວງ ວ່າດ້ວຍການກຳນົດລາຄາຫົວໜ່ວຍຊົດເຊີຍຜົນກະທົບຈາກໂຄງການພັດທະນາຕົວເມືອງທັນສະໄໝ ແລະ ເປັນມິດຕໍ່ສິ່ງເເວດລ້ອມ ຢູ່ເຂດນາເຕີຍ ເມືອງຫລວງນ້ຳທາ, ແຂວງຫລວງນ້ຳທາ, ຊຶ່ງຂໍ້ຕົກລົງດັ່ງກ່າວ ແມ່ນໄດ້ນຳເຂົ້າພິຈາລະນາ, ຮັບຮອງໃນກອງປະຊຸມສະໄໝສາມັນເທື່ອທີ3 ຂອງສະພາປະຊາຊົນແຂວງ ທີ່ຜ່ານມາແຕ່ບໍ່ທັນຮັບຮອງ ແລະ ໄດ້ນຳໄປປັບປຸງໃຫ້ຖຶກຕ້ອງສອດຄ່ອງໃຫ້ດີກວ່າເກົ່າ, ເພື່ອຮັບປະກັນຈະນຳເຂົ້າພິຈາລະນາໃນກອງປະຊຸມວິສາມັນຄັ້ງທີII ຂອງສະພາປະຊາຊົນແຂວງຫລວງນໍ້າທາ ຊຸດທີ2 ໃນຄັ້ງນີ້ລວມທັງໝົດ 7 ໝວດ, 23 ມາດຕາ; ພ້ອມດຽວກັນກອງປະຊຸມໄດ້ມີການແລກປ່ຽນ, ປະກອບຄຳຄິດເຫັນ ແລະ ຄວາມເປັນເອກະພາບກັນຕໍ່ຮ່າງຂໍ້ຕົກລົງເຈົ້າແຂວງສະບັບນີ້ ຢ່າງມີຈຸດສຸມ ເພື່ອເຮັດໃຫ້ເນື້ອໃນຮ່າງຂໍ້ຕົກລົງສະບັບນີ້ມີເນື້ອໃນຖຶກຕ້ອງ, ຮັດກຸມ, ສອດຄ່ອງຕາມລະບຽບກົດໝາຍກັບຄວາມເປັນຈິງ ແລະ ຮັບປະກັນເນື້ອໃນຮອບດ້ານໃຫ້ທວງທັນກັບເວລາທີ່ຈະເປີດກອງປະຊຸມວິສາມັນຄັ້ງທີII ຂອງສະພາປະຊາຊົນແຂວງຊຸດທີ2 ທີ່ຈະໄຂຂື້ນໃນຕໍ່ໜ້ານີ້.