ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

            (ສພຊ) ວັນທີ 31 ມັງກອນ 2022 ທີ່ສະພາແຫ່ງຊາດ, ຄະນະຮັບຜິດຊອບຈັດກອງປະຊຸມສໍາມະນາວິທະຍາ ສາດ ກ່ຽວກັບການຍົກເວັ້ນການປະຕິບັດບາງມາດຕາຂອງກົດໝາຍ ໄດ້ຈັດກອງປະຊຸມປຶກສາຫາລື, ກະກຽມເນື້ອໃນກອງປະຊຸມສຳມະນາວິທະຍາສາດ ກ່ຽວກັບການຍົກເວັ້ນການປະຕິບັດບາງມາດຕາຂອງກົດໝາຍ ໂດຍການເປັນປະທານຂອງທ່ານ ສຈ.ປອ ຈະເລີນ ເຍຍປາວເຮີ ຮອງປະທານສະພາແຫ່ງຊາດ ທັງເປັນປະທານກຳມາທິການກົດໝາຍ; ມີບັນດາລັດຖະມົນຕີ-ຮອງລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ, ກະຊວງອຸດສາຫະກຳ ແລະ ການຄ້າ, ກະຊວງພະລັງງານ ແລະ ບໍ່ແຮ່, ກະຊວງກະສິກຳ ແລະ ປ່າໄມ້, ກະຊວງການເງິນ, ກະຊວງແຜນການ ແລະ ການລົງທຶນ, ຮອງປະທານກຳມາທິການເສດຖະກິດ, ເຕັກໂນໂລຊີ ແລະ ສິ່ງແວດລ້ອມ ແລະ ຫົວໜ້າສະຖາບັນຄົ້ນຄວ້ານິຕິກຳສະພາແຫ່ງຊາດ ເຂົ້າຮ່ວມ.
ທັງນີ້, ເພື່ອປຶກສາຫາລືກ່ຽວກັບການກະກຽມບັນດາເນື້ອໃນຕ່າງໆ ທີ່ຈະສະເໜີໃນກອງປະຊຸມສຳມະນາວິທະ ຍາສາດ ກ່ຽວກັບການຍົກເວັ້ນການປະຕິບັດບາງມາດຕາຂອງກົດໝາຍ ແລະ ເພື່ອທົບທວນຄືນການຈັດຕັ້ງປະຕິບັດລັດຖະທໍາມະນູນ ແລະ ກົດໝາຍ ໃນໄລຍະຜ່ານມາ ວ່າມີຄວາມຈໍາເປັນໃນການຍົກເວັ້ນການປະຕິບັດບາງມາດຕາຂອງກົດໝາຍ ເພື່ອຮັບໃຊ້ໃຫ້ແກ່ນະໂຍບາຍການພັດທະນາເສດຖະກິດ-ສັງຄົມ ຂອງປະເທດ ແລະ ເພື່ອເປັນການຄົ້ນຄວ້າ, ວິໄຈຜົນໄດ້ຮັບ, ຜົນເສຍ, ດ້ານຕັ້ງໜ້າ, ດ້ານຫຍໍ້ທໍ້ ແລະ ບົດຮຽນ ທີ່ໄດ້ຮັບຈາກການຍົກເວັ້ນການປະຕິບັດບາງມາດ ຕາຂອງກົດໝາຍ ໃນໄລຍະຜ່ານມາ ບົນພື້ນຖານການສະເໜີຢ່າງມີວິທະຍາສາດ ກ່ຽວກັບທິດທາງແກ້ໄຂ ແລະ ປັບປຸງໃນຕໍ່ໜ້າ; ແລກປ່ຽນບົດຮຽນ ແລະ ລະດົມແນວຄວາມຄິດ ເພື່ອຊອກຫາທາງອອກທີ່ດີທີ່ສຸດ ແນໃສ່ຮັບປະກັນໃຫ້ການຄຸ້ມຄອງລັດ, ຄຸ້ມຄອງເສດຖະກິດ-ສັງຄົມ ດ້ວຍກົດໝາຍ ໃຫ້ມີຄວາມສັກສິດ ທັງເປັນການສ້າງຄວາມສະດວກ ແລະ ດຶງດູດການລົງທຶນໃຫ້ຫລາຍຂຶ້ນ.
(ພາບ ແລະ ຂ່າວ: ອາລິນ ສຸພິມມະປະດິດ)