ຕອນບ່າຍ ວັນທີ 8 ມິຖຸນາ 2023 ສະຫະພັນແມ່ຍິງຮາກຖານ ສະພາປະຊົນແຂວງຜົ້ງສາລີ ໄດ້ຈັດກອງປະຊຸມປະເມີນຂໍ້ແຂ່ງຂັນ 3 ດີ ປະຈໍາ 6 ເດືອນຕົ້ນປີ 2023 ທີ່ຫ້ອງປະຊຸມສະພາປະຊາຊົນແຂວງ ½ ໂດຍການເປັນປະທານຂອງ ສະຫາຍ ນາງ ພອນສະຫວັນ ສັກຕິຄຸນ ເລຂາໜ່ວຍພັກສະພາປະຊາຊົນແຂວງ, ມີບັນດາຄະນະສະຫະພັນແມ່ຍິງຮາກຖານ, ປະທານກໍາມະບານຮາກຖານ, ຄະນະຮາກຖານຊາວໜຸ່ມ ແລະ ສະມາຊິກສະຫະພັນແມ່ຍິງຮາກຖານ ພາຍໃນສະພາປະຊາຊົນແຂວງ ເຂົ້າຮ່ວມ.

ໃນກອງປະຊຸມ ໄດ້ຮັບຟັງ ສະຫາຍ ປະທານສະຫະພັນແມ່ຍິງຮາກຖານສະພາປະຊາຊົນແຂວງ ຜ່ານແຈ້ງການແນະນໍາ ຂອງສະຫະພັນແມ່ຍິງແຂວງ ກ່ຽວກັບການຈັດຕັ້ງປະຕິບັດຂໍ້ແຂ່ງຂັນ 3 ດີ; ຮັບຟັງ ສະຫາຍຄະນະສະຫະພັນແມ່ຍິງຮາກຖານ ຜ່ານບົດສະຫຼຸບວຽກງານຮອບດ້ານ ປະຈໍາ 6 ເດືອນຕົ້ນປີ 2023 ຂອງສະຫະພັນແມ່ຍິງຮາກຖານສະພາປະຊາຊົນແຂວງ ພ້ອມທັງຮັບຟັງການປະກອບຄໍາຄິດເຫັນ ຈາກສະມາຊິກ ຕໍ່ບົດສະຫຼຸບດັ່ງກ່າວ. ຈາກນັ້ນ, ກອງປະຊຸມກໍ່ໄດ້ດໍາເນີນການປະເມີນສະມາຊິກແມ່ຍິງ ໃນການປະຕິບັດເນື້ອໃນຂໍ້ແຂ່ງຂັນ 3 ດີ ປະຈໍາ 6 ເດືອນຕົ້ນປີ 2023

ຕອນທ້າຍ, ປະທານກອງປະຊຸມໄດ້ມີຄໍາເຫັນໂອ້ລົມຕື່ມ ເຊິ່ງກ່ອນອື່ນສະຫາຍ ໄດ້ຍ້ອງຍໍຊົມເຊີຍ ແລະ ເອກະພາບຕໍ່ບົດສະຫຼຸບວຽກງານຮອບດ້ານ ປະຈໍາ 6 ເດືອນຕົ້ນປີ 2023 ຂອງສະຫະພັນແມ່ຍິງຮາກຖານ ພ້ອມກັນນີ້, ສະຫາຍໄດ້ເນັ້ນຕື່ມ ຕໍ່ກັບບັນດາສະມາຊິກ ກໍ່ຄໍຄະນະສະຫະພັນແມ່ຍິງຮາກຖານ ນໍາເອົາເນື້ອໃນຂອງການປະເມີນໃນຄັ້ງນີ້ ແລະ ຄໍາຕໍານິສົ່ງຂ່າວ ຈາກບັນດາສະມາຊິກ ເພື່ອເປັນທິດທາງສືບຕໍ່ປັບປຸງໃນການຈັດຕັ້ງປະຕິບັດຂໍ້ແຂ່ງຂັນ 3 ດີ ໃນຕໍ່ໜ້າ ແລະ ເພື່ອເຮັດໃຫ້ການຈັດຕັ້ງປະຕິບັດໜ້າທີ່ການເມືອງ ມີຜົນສໍາເລັດຕາມແຜນການທີ່ວາງໄວ້

ພາບ-ຂ່າວ: ນັກຂ່າວສະພາປະຊາຊົນແຂວງ