ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

 

        ຕອນບ່າຍ, ວັນທີ 22 ສິງຫາ 2022 ທີ່ຫ້ອງປະຊຸມສະພາປະຊາຊົນແຂວງ (ສພຂ) ໄດ້ຈັດກອງປະຊຸມປະຖົມນິເທດໃຫ້ແກ່ສະມາຊິກສະພາປະຊາຊົນແຂວງ ໃນການດໍາເນີນກອງປະຊຸມສະໄໝສາມັນ ເທື່ອ 3 ຂອງສະພາປະຊາຊົນແຂວງ ຊຸດທີ II; ໂດຍການເປັນປະທານຂອງທ່ານ ທອງສີ ເສົາລິພົມ ປະທານສະພາປະຊາຊົນແຂວງ; ມີ ສະມາຊິກສະພາແຫ່ງຊາດ (ສສຊ) ປະຈໍາເຂດເລືອກຕັ້ງ 2, ສະມາຊິກສະພາປະຊາຊົນແຂວງ (ສສຂ) ແລະ ພະນັກງານຊ່ວຍວຽກຄະນະ ສສຂ ປະຈໍາເມືອງເຂົ້າຮ່ວມ.

ກອງປະຊຸມຄັ້ງນີ້ຈັດເພື່ອເຜີຍແຜ່, ເຊື່ອມຊຶມນິຕິທີ່ສໍາຄັນ ແລະ ສ້າງຄວາມເຂົ້າໃຈ, ເອກະພາບຕໍ່ບັນດານິຕິກໍາທີ່ນໍາມາເຜີຍແຜ່ເຊື່ອມຊຶມໃນຄັ້ງນີ້ ເພື່ອຮັບປະກັນໃຫ້ການດໍາເນີນກອງປະຊຸມສະໄໝສາມັນ ເທື່ອທີ 3 ຂອງ ສພຂ ຊຸດທີ II ບັນລຸຕາມແຜນການທີ່ໄດກໍານົດ, ລວມທັງຮັບປະກັນໃຫ້ບັນຍາກາດການດໍາເນີນກອງປະຊຸມມີຄວາມຟົດຟື້ນ, ບົນຫຼັກການເສີມຂະຫຍາຍສິດປະຊາທິປະໄຕ ຂອງບັນດາ ສສຂ ແລະ ມີເນື້ອໃນຮັດກຸມ, ສອດຄ່ອງຕາມລະບຽບກົດໝາຍ.

ທີ່ກອງປະຊຸມໄດ້ຮັບຟັງທ່ານ ນາງ ພອນສະຫວັນ ສັກຕິຄຸນ ເລຂາທິການ ສພຂ, ຫົວໜ້າກອງເລຂາກອງປະຊຸມຂຶ້ນຜ່ານມະຕິວ່າດ້ວຍການດໍາເນີນກອງປະຊຸມສະພາປະຊາຊົນແຂວງ (ສະບັບປັບປຸງປີ 2021) ສະບັບເລກທີ 307/ຄປຈຂ, ລົງວັນທີ 27 ທັນວາ 2021 ແລະ ມະຕິວ່າດ້ວຍການປະເມີນຕໍ່ຄວາມຮັບຜິດຊອບຂອງບຸກຄະລາກອນ ທີ່ມາລາຍງານ, ຊີ້ແຈງ ແລະ ຕອບຄໍາຊັກຖາມໃນກອງປະຊຸມສະພາປະຊາຊົນແຂວງ ສະບັບເລກທີ 310/ຄປຈຂ, ລົງວັນທີ 31 ທັນວາ 2021. ຈາກນັ້ນ, ຜູ້ແທນກອງປະຊຸມໄດ້ແລກປ່ຽນຄວາມເຫັນຕໍ່ບັນດາເນື້ອໃນທີ່ມາເຜີຍແຜ່ໃນຄັ້ງນີ້ ເພື່ອຄວາມເປັນກະພາບຕໍ່ບາງເນື້ອໃນທີ່ຍັງບໍ່ສອດຄ່ອງ, ໂລ່ງລ່ຽນ.

ພາບ-ຂ່າວ: ນາງ ສຸກສົມພອນ ແກ້ວແສງພະຈັນ