ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

(ສ​ພ​ຊ) ໃນວັນ 3 ມີນາ 2022 ທີ່ຫ້ອງປະຊຸມສະພາປະຊາຊົນແຂວງ (ສ​ພ​ຂ) ຄໍາມ່ວນ ໄດ້ເປີດກອງປະຊຸມການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ໂດຍການເປັນປະທານຂອງທ່ານ ສະເຫລີມສັກ ແກ້ວຈັນທະລາ ເລຂາທິການສະພາປະຊາຊົນແຂວງ (ສ​ພ​ຂ) ຄຳ​ມ່ວນ ໂດຍການເຂົ້າຮ່ວມທ່ານ ບົວພັນ ແສງຈັນ ຮອງປະທານ ສ​ພ​ຂ ຄໍາມ່ວນ ພ້ອມດ້ວຍບັນດາທ່ານຄະນະປະຈໍາ ສ​ພ​ຂ, ຄະນະກຳມະການ, ຄະນະເລຂາທິການ, ຫົວໜ້າ-ຮອງຫົວໜ້າຂະແໜງ ຕະຫລອດຮອດພະນັກງານ-ລັດຖະກອນພາຍໃນ ສ​ພ​ຂ ເຂົ້າຮ່ວມທັງໝົດ 38 ທ່ານ ຍິງ 17 ທ່ານ.

ກອງປະຊຸມໃນຄັ້ງນີ້, ແມ່ນເພື່ອສະຫລຸບຕີລາຄາຄືນຜົນງານ, ຈຸດດີ, ​ຈຸດອ່ອນ ແລະ ຂໍ້ຄົງຄ້າງໃນການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ຂອງຄະນະເລຂາທິການ ສ​ພ​ຂ ຄໍາມ່ວນ, ໃນການເຮັດທີ່ຕາມພາລະບົດບາດ, ສິດ ແລະ ໜ້າທີ່ເປັນເສນາທິການຮອບດ້ານໃຫ້ແກ່ ສ​ພ​ຂ, ຄະນະປະຈໍາ ສ​ພ​ຂ, ຄະນະສະມາຊິກສະພາແຫ່ງຊາດປະຈໍາເຂດເລືອກຕັ້ງ ແລະ ຄະນະສະມາຊິກສະພາປະຊາຊົນແຂວງປະຈໍາເຂດເລືອກຕັ້ງເມືອງ.

ໃນກອງປະຊຸມໄດ້ຮັບຟັງການຜ່ານຮ່າງບົດລາຍງານການເຄື່ອນໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ຂອງຄະນະເລຂາທິການ ສ​ພ​ຂ, ມະຕິຂອງຄະນະປະຈໍາ ສ​ພ​ຂ ຄໍາມ່ວນ ວ່າດ້ວຍການຈັດຕັ້ງ ແລະ ການເຄື່ອນໄຫວວຽກງານຂອງຄະນະເລຂາທິການ ສ​ພ​ຂ ຄໍາມ່ວນ ສະບັບເລກທີ 138/ຄປຈ.ສພຂ, ລົງວັນທີ 7 ທັນວາ 2022, ມະຕິຕົກລົງຂອງຄະນະເລຂາທິການວ່າດ້ວຍການແບ່ງຄວາມຮັບຜິດຊອບວຽກງານໃຫ້ພະນັກງານພາຍໃນ 4 ຂະແໜງການທີ່ຂຶ້ນກັບຄະນະເລຂາທິການ ສ​ພ​ຂ ຄໍາມ່ວນ, ຮ່າງມະຕິກອງປະຊຸມວຽກງານຄະນະເລຂາທິການ ສ​ພ​ຂ ຄໍາມ່ວນ ປະຈໍາປີ 2021 ແລະ ທິດທາງປະຈໍາປີ 2022; ພ້ອມນັ້ນ, ກອງປະຊຸມຍັງໄດ້ປະກອບຄໍາຄິດຄໍາເຫັນ ຢ່າງມີບັນຍາກາດອັນຟົດຟື້ນ ແລະ ເປັນເຈົ້າການເຂົ້າໃສ່ເນື້ອໃນຄັ້ງນີ້ ໃຫ້ມີອັນຄົບຖ້ວນສົມບູນເລິກເຊິ່ງຖືກຕ້ອງ, ສອດຄ່ອງກັບສະພາບຄວາມເປັນຈິງ ທັງເປັນບ່ອນອີງໃຫ້ແກ່ການຈັດຕັ້ງປະຕິບັດວຽກງານໃນຕໍ່ໜ້າໃຫ້ໄດ້ຮັບປະສິດທິພາບ ແລະ ປະສິດທິຜົນດີຂຶ້ນເປັນກ້າວໆ.

ຕອນທ້າຍກອງປະຊຸມ, ທ່ານ ບົວພັນ ແສງຈັນ ຮອງປະທານ ສ​ພ​ຂ ໄດ້ໃຫ້ກຽດໂອ້ລົມຕໍ່ກອງປະຊຸມ ໂດຍທ່ານໄດ້ສະແດງຄວາມຍ້ອງຍໍ ແລະ ຊົມເຊີຍຕໍ່ຜົນງານທີ່ຄະນະເລຂາທິການສະພາປະຊາຊົນຂັ້ນແຂວງ ຍາດໄດ້ຜົນງານອັນພົ້ນເດັ່ນມາຫລາຍດ້ານ ຕະຫລອດໄລຍະ 1 ປີ ທີ່ຜ່ານມາ; ພ້ອມນັ້ນ, ຮອງປະທານ ສ​ພ​ຂ ໄດ້ເນັ້ນໜັກຕື່ມໃຫ້ເອົາໃຈໃສ່ຍົກສູງສ້າງຂີດຄວາມສາມາດວຽກງານເປັນເສນາທິການຮອບດ້ານບົນພື້ນຖານກົດໝາຍ ທັງຕ້ອງຄົ້ນຄວ້ານິຕິກຳໃຫ້ເລິກເຊິ່ງບັນຫານີ້ໃຫ້ຖືເປັນບັນຫາທີສຳຄັນ; ເອົາໃຈໃສ່ປະຕິບັດໜ້າທີ່ທັງຕິດຕາມກວດກາລະອຽດໃນການເຄື່ອນໄຫວວຽກງານແຕ່ລະດ້ານຂອງຄະນະເລຂາທິການ ແລະ ແຂງແໜງການ ເພື່ອຊອກຫາວິທີແກ້ໄຂປ່ຽນແປງບາງບັນຫາທີ່ເປັນຂໍ້ຄົງຄ້າງໃຫ້ດີຂຶ້ນເລື້ອຍໆ.

(ພາບ ແລະ ຂ່າວ: ເອື້ອ ມະໂນສິງ)