ກອງປະຊຸມປະຈຳປີ 2022 ຂອງຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ແຂວງສະຫວັນນະເຂດ ໄດ້ໄຂຂຶ້ນຢ່າງເປັນທາງການໃນຕອນເຊົ້າ ວັນທີ 23 ມັງກອນ 2023 ທີ່ຫ້ອງປະຊຸມຊັ້ນ 02 ຫໍວັດທະນະທຳໄກສອນພົມວິຫານ ໂດຍພາຍໃຕ້ການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ປະທານສະພາປະຊາຊົນແຂວງສະຫວັນນະເຂດ, 
ໃຫ້ກຽດເຂົ້າຮ່ວມຂອງທ່ານ ສັນຕິພາບ ພົມວິຫານ ກຳມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງໆສະຫວັນນະເຂດ, ຄະນະປະຈຳພັກແຂວງ, ຄະນະປະຈຳ ສພຂ, ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ຮອງປະທານຄະນະກຳມະການ , ຄະນະເລຂາທິການ ສພຂແລະ ພາກສ່ວນທີ່ກ່ຽວຂ້ອງເຂົ້າຮ່ວມ
ກອງປະຊຸມໃນຄັ້ງນີ້ ໃນເບື້ອງຕົ້ນ ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ຮອງປະທານສະພາປະຊາຊົນແຂວງ ໄດ້ຂຶ້ນຜ່ານບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນ ການເຄື່ອນໄຫວວຽກງານ ປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ຕໍ່ມາກອງປະຊຸມໄດ້ຮັບຟັງການລາຍງານຈາກພາກສ່ວນຕ່າງໆເປັນຕົ້ນ: ຮັບຟັງການລາຍງານ ຂອງທ່ານຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບ ການຄຸ້ມຄອງ ແລະ ການສົ່ງເສີມການລົງທຶນ ພາຍໃນແຂວງສະຫວັນນະເຂດ ແລະ ການລາຍງານ ຂອງທ່ານຫົວໜ້າພະແນກກະສິກໍາ ແລະ ປ່າໄມ້ແຂວງ ກ່ຽວກັບ ການຈັດສັນ ແລະ ຄຸ້ມຄອງ 03 ປະເພດປ່າ ພາຍໃນແຂວງສະຫວັນນະເຂດ ຈາກນັ້ນບັນດາທ່ານ ສະມາຊິກສະພາ ແຫ່ງຊາດ ໄດ້ສຸມໃສ່ສະຕິປັນຍາ ໃນການປະກອບຄໍາເຫັນຢ່າງກົງໄປກົງມາເຂົ້າໃສ່ວຽກງານຕ່າງໆ ຈາກນັ້ນ ກອງປະ ຊຸມໄດ້ພິຈາລະນາ ແລະ ຮັບຮອງບົດລາຍງານການເຄື່ອນໄຫວວຽກງານ ປະຈໍາປີ 2022 ແລະ ທິດທາງແຜນການເຄື່ອນໄຫວວຽກງານ ປະຈໍາປີ 2023 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13; ບົດລາຍງານ ຂອງທ່ານຫົວໜ້າພະແນກແຜນການ ແລະ ການລົງທຶນແຂວງ ກ່ຽວກັບ ການຄຸ້ມຄອງ ແລະ ການສົ່ງເສີມການລົງທຶນ ພາຍໃນແຂວງສະຫວັນນະເຂດ; ບົດລາຍງານ ຂອງທ່ານຫົວໜ້າພະແນກກະສິກໍາ ແລະ ປ່າໄມ້ແຂວງ ກ່ຽວກັບ ການຈັດສັນ ແລະ ຄຸ້ມຄອງ 03 ປະເພດປ່າ ພາຍໃນແຂວງສະຫວັນນະເຂດ
ຊຶ່ງກອງປະຊຸມປະຈໍາປີ 2022 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ໄດ້ດໍາເນີນ ມາເປັນເວລາໜຶ່ງວັນ ດ້ວຍຄວາມເປັນເອກະພາບ, ຄວາມຮັບຜິດຊອບຂອງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດລວມ ຂອງປະຊາຊົນບັນດາເຜົ່າ ແລະ ກອງປະຊຸມດັ່ງກ່າວ ໄດ້ອັດລົງໃນຕອນແລງຂອງວັນດຽວກັນ ດ້ວຍຜົນສໍາເລັດຢ່າງຈົບງາມ.
