ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

  ກອງປະຊຸມ ປະຈໍາປີ 2021 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ແຂວງສະຫວັນນະເຂດ. ໄດ້ໄຂຂຶ້ນຢ່າງທາງການ ໃນຕອນເຊົ້າຂອງວັນທີ 11 ມັງກອນ 2022. ທີ່ຫ້ອງປະຊຸມຊັ້ນ 2 ຫໍວັດທະນະທຳໄກສອນພົມວິຫານ. ໂດຍການເປັນປະທານຂອງທ່ານ ກົງແກ້ວ ມີວໍລະຈັກ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ປະທານສະພາປະຊາຊົນແຂວງສະຫວັນນະເຂດ, ມີ ທ່ານ ສັນຕິພາບ ພົມວິຫານ ເລຂາພັກແຂວງ, ເຈົ້າແຂວງໆສະຫວັນນະເຂດ, ຄະນະປະຈໍາພັກແຂວງ, ຄະນະປະຈຳສະພາປະຊາຊົນແຂວງ, ບັນດາທ່ານສະມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13, ຮອງປະທ່ານ ຄະນະກໍາມະການ, ຄະນະເລຂາທິການສະພາປະຊາຊົນແຂວງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.
ທ່ານ ຄໍາຜັນ ຄູນສະຫວັນ ຄະນະປະຈໍາພັກແຂວງ, ຮອງປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13, ຮອງປະທານສະພາປະຊາຊົນແຂວງ ໄດ້ຂຶ້ນຜ່ານບົດສະຫຼຸບການເຄື່ອໄຫວວຽກງານ ປະຈໍາປີ 2021 ແລະ ທິດທາງແຜນການ ປະຈໍາປີ 2022 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ຕໍ່ມາກອງປະຊຸມໄດ້ຮັບຟັງການລາຍງານຈາກພາກສ່ວນຕ່າງໆເປັນຕົ້ນ: ຮັບຟັງການລາຍງານ ຈາກທ່ານຮອງເຈົ້າແຂວງສະຫວັນນະເຂດ ຕໍ່ການຈັດຕັ້ງປະຕິບັດມະຕິຂອງກອງປະຊຸມສະພາແຫ່ງຊາດ ສະບັບເລກທີ 12/ສພຊ, ລົງວັນທີ 4 ພະຈິກ 2021 ແລະ ມະຕິກອງປະຊຸມປະຈໍາປີ 2020 ຂອງສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ສະບັບເລກທີ 03/ຄສຊຂ.13, ລົງວັນທີ 15 ມັງກອນ 2021 ກ່ຽວກັບ ຄວາມຄືບໜ້າການຈັດຕັ້ງປະຕິບັດຄາດໝາຍສູ້ຊົນໃຫ້ເມືອງນອງເປັນເມືອງພົ້ນທຸກ; ຮັບຟັງການລາຍງານຈາກຫົວໜ້າພະແນກກະສິກໍາ ແລະ ປ່າໄມ້ແຂວງ ຕໍ່ການຈັດຕັ້ງປະຕິບັດມະຕິຂອງກອງປະຊຸມ ປະຈໍາປີ 2020 ຂອງຄະ ນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ສະບັບເລກທີ 04/ຄສຊຂ.13, ລົງວັນທີ 15 ມັງກອນ 2021 ກ່ຽວກັບ ສະພາບການແກ້ໄຂຂໍ້ຂັດແຍ່ງ ການນໍາໃຊ້ທີ່ດິນປູກອ້ອຍ ໃນຮູບແບບ 2+3 ຢູ່ເມືອງ ໄຊບູລີ ແຂວງສະຫວັນນະເຂດ; ຮັບຟັງການລາຍງານຈາກຫົວໜ້າພະແນກຊັບພະຍາກອນທໍາມະຊາດ ແລະ ສິ່ງແວດລ້ອມແຂວງ ຕໍ່ການຈັດຕັ້ງປະຕິບັດ ມະຕິຂອງຄະນະປະຈໍາສະພາແຫ່ງຊາດ ສະບັບເລກທີ 146/ຄປຈ, ລົງວັນທີ 28 ຕຸລາ 2020 ກ່ຽວກັບ ຄວາມຄືບໜ້າໃນການຈັດຕັ້ງປະຕິບັດ ການປ່ຽນແລວນໍ້າທໍາມະຊາດ ໂຄງການຂະຫຍາຍບໍ່ຄໍາເຊໂປນ ຂອງບໍລິສັດລ້ານຊ້າງມີນີໂຣນລີມີເຕັດ ເມືອງວິລະບູລີ ແຂວງສະຫວັນນະເຂດ ຕໍ່ມາບັນດາທ່ານ ສະມາຊິກສະພາແຫ່ງຊາດ ໄດ້ສຸມໃສ່ສະຕິປັນຍາ ໃນການປະກອບຄໍາເຫັນຢ່າງກົງໄປກົງມາເຂົ້າໃສ່ວຽກງານຕ່າງໆ ຈາກນັ້ນ ກອງປະຊຸມໄດ້ພິຈາລະນາ ແລະ ຮັບຮອງເອົາບົດສະຫຼຸບການເຄື່ອນໄຫວວຽກງານຂອງຄະນະສະ ມາຊິກສະພາແຫ່ງຊາດ ປະຈຳເຂດເລືອກຕັ້ງທີ 13 ປະຈຳປີ 2021 ແລະ ທິດທາງແຜນການ ປະຈໍາປີ 2022 ອີກດ້ວຍ.
ປະທານກອງປະຊຸມຍັງໄດ້ຮຽກຮ້ອງມາຍັງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ຈົ່ງພ້ອມກັນຍົກສູງຄວາມຮັບຜິດຊອບຕໍ່ໜ້າທີ່ການເມືອງຂອງຕົນ, ສຸມທຸກສະຕິປັນຍາຄວາມຮູ້ຄວາມສາມາດ ເຂົ້າໃນການຄົ້ນຄວ້າພິຈາລະນາ ແລະ ປະກອບຄວາມເຫັນຕໍ່ກັບເນື້ອໃນ ທີ່ໄດ້ກ່າວມາຂ້າງເທິງນັ້ນ. ພ້ອມນັ້ນ ຮຽກຮ້ອງໃຫ້ພາກສ່ວນກ່ຽວຂ້ອງ ຈົ່ງລາຍງານ ພ້ອມຕິດຕາມກອງປະຊຸມ ເພື່ອໃຫ້ຄວາມກະຈາງແຈ້ງຕໍ່ບັນຫາທີ່ຜູ້ແທນຕັ້ງຂຶ້ນ. ກໍ່ຄືການປະກອບຄຳເຫັນຂອງສະມາຊິກສະພາແຫ່ງຊາດ ໃນການພິຈາລະນາບັນຫາຕ່າງໆ.
ເຊິ່ງກອງປະຊຸມປະຈໍາປີ 2021 ຂອງຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ໄດ້ດໍາເນີນ ມາເປັນເວລາໜຶ່ງວັນ ດ້ວຍຄວາມເປັນເອກະພາບ, ຄວາມຮັບຜິດຊອບຂອງບັນດາທ່ານ ສະມາຊິກສະພາແຫ່ງຊາດ ປະຈໍາເຂດເລືອກຕັ້ງ ໃນຖານະເປັນຕົວແທນແຫ່ງສິດ ແລະ ຜົນປະໂຫຍດລວມ ຂອງປະຊາຊົນບັນດາເຜົ່າ ແລະ ກອງປະຊຸມດັ່ງກ່າວ ໄດ້ອັດລົງໃນຕອນແລງຂອງວັນດຽວກັນ ດ້ວຍຜົນສໍາເລັດຢ່າງຈົບງາມ.

ພາບ-ຂ່າວ : ທ່ານ ທະນູສິດ ສິງມາວົງ ແລະ ນາງຄອນສະຫວັນ ເມກສະຫວັນ
ເບີໂທ: 020 2357 8008; 9664 1278.