ທ່ານ ນາງ ດາວເພັດ ສີຫາວົງ ໄດ້ມີຄໍາເຫັນກ່າວເປີດວ່າ: ກອງປະຊຸມຄັ້ງນີ້ ແມ່ນກິດຈະກຳໜຶ່ງທີ່ນອນຢູ່ໃນການສະໜັບສະໜູນດ້ານວຽກງານໄອຊີທີໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ໃນຂອບຂອງໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ມີຈຸດປະສົງເພື່ອສ້າງຄວາມເຂົ້າໃຈໃນການນໍາໃຊ້ໄອຊີທີ, ການພັດທະນາທີ່ທັນສະໄໝ ການຫັນເປັນດິຈິຕອນຢູ່ພາຍໃນສະພາແຫ່ງຊາດ ແລະ ສະພາປະຊາຊົນຂັ້ນແຂວງ, ຮ່ວມກັນປຶກສາຫາລື ຄົ້ນຄວ້າແຜນການ ແລະ ຍຸດທະສາດການພັດທະນາວຽກງານໄອຊີທີຂອງສະພາແຫ່ງຊາດ ແລະ ສະພາປະຊາຊົນຂັ້ນແຂວງ; ນອກນັ້ນ, ຍັງຈະໄດ້ແລກປ່ຽນບົດຮຽນທີ່ດີ, ບັນ ດາສິ່ງທ້າທາຍຕ່າງໆຕໍ່ກັບວຽກງານໄອຊີທີ ເພື່ອໃຫ້ຊ່ຽວຊານ ແລະ ຄະນະຮັບຜິດຊອບການປະເມີນ ບັນທຶກເອົາຄວາມຄິດເຫັນ ແລະ ການສະເໜີຂອງບັນດາທ່ານ ນຳໄປປະເມີນໄດ້ ແລະ ວິເຄາະເອົາຜົນຂອງການປຶກສາຫາລື ເຂົ້າໃນແຜນການຊ່ວຍເຫຼືອ ແລະ ຮ່າງແຜນຍຸດທະສາດການພັດທະນາ ແລະ ການຮ່ວມມືລະຫວ່າງສະພາແຫ່ງຊາດ ກັບ ສະພາປະຊາຊົນຂັ້ນແຂວງ. ເພື່ອຮັບປະກັນໃຫ້ວຽກໄອຊີທີ ມີຄວາມຕໍ່ເນື່ອງ ແລະ ຍືນຍົງ, ພວກເຮົາຈະໄດ້ສ້າງເຄືອຂ່າຍຜູ້ປະສານງານວຽກງານໄອຊີທີ ລະຫວ່າງສະພາແຫ່ງຊາດ ກັບ ສະພາປະຊາຊົນຂັ້ນແຂວງ ໃຫ້ມີການຮ່ວມມື, ແລກປ່ຽນບົດຮຽນ ແລະ ສ້າງທັກສະດ້ານໄອຊີທີຮ່ວມກັນຢ່າງປົກກະຕິ ໂດຍຫັນເອົາທ່າແຮງການສະໜັບສະໜູນຂອງບັນດາຄູ່ຮ່ວມງານສະພາແຫ່ງຊາດ ແລະ ສະພາປະຊາຊົນຂັ້ນແຂວງ ເວົ້າລວມ, ເວົ້າສະເພາະແມ່ນຈາກອົງການສະຫະປະຊາຊາດເພື່ອການພັດທະນາ ໂດຍຜ່ານໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງ ຫຼື ສະເຕັບສ໌ (STEPs) ເປັນຜູ້ສະໜັບສະໜູນລິເລີ່ມຂັບເຄື່ອນວຽກງານດັ່ງກ່າວ.

ກອງປະຊຸມໄດ້ຮັບຟັງການມີຄໍາເຫັນຕໍ່ກອງປະຊຸມຈາກຕາງໜ້າສະພາປະຊາຊົນຂັ້ນແຂວງ; ຕາງໜ້າ UNDP ສະເໜີຈຸດປະສົງ, ເປົ້າໝາຍ ແລະ ວາລະກອງປະຊຸມ ດ້ານການພັດທະນານະວັດຕະກໍາໃໝ່ໆ; ນຳສະເໜີ ແລະ ແລກປ່ຽນບົດຮຽນຕໍ່ກັບວຽກງານດ້ານໄອຊີທີພາຍໃນສະພາ ຈາກສະພາບລວມສາກົນ ແລະ ພາກພື້ນ; ນໍາສະ ເໜີ ແລະ ແລກປ່ຽນບົດຮຽນຕໍ່ກັບການສະຫຼຸບວຽກງານຈັດຊື້ອຸປະກອນໄອທີ ຂອງ ສພຂ; ນໍາສະເໜີ ແລະ ແລກ ປ່ຽນບົດຮຽນຕໍ່ກັບການມີສ່ວນຮ່ວມໃນວຽກງານນໍາໃຊ້ໄອຊີທີ ລະຫວ່າງ ສພຊ ກັບ ສພຂ; ນໍາສະເໜີ ແລະ ແລກ ປ່ຽນບົດຮຽນຕໍ່ກັບແບບຢ່າງຜົນງານດ້ານນະວັດຕະກໍາ 1 ຫົວຂໍ້: ກ່ຽວກັບຖານຂໍ້ມູນການຄຸ້ມຄອງວຽກງານຄໍາຮ້ອງຂໍຄວາມເປັນທໍາຂອງຄະນະປະຈໍາສະພາແຫ່ງຊາດ; ນໍາສະເໜີ ແລະ ແລກປ່ຽນບົດຮຽນຕໍ່ກັບແບບຢ່າງຜົນງານດ້ານນະວັດຕະກໍາ 2 ຫົວຂໍ້: E-Office ແລະ E-Chat.

ຈາກນັ້ນ, ຜູ້ເຂົ້າຮ່ວມໄດ້ຈັດແບ່ງອອກເປັນ 2 ກຸ່ມ: ກຸ່ມຄະນະເລຂາທິການ ສພຂ ແລະ ກຸ່ມພະນັກງານຂອງ ສພຂ ເຊິ່ງໄດ້ສົນທະນາຕໍ່ກັບບັນຫາເຫຼົ່ານີ້: ກະກຽມແຜນຍຸດທະສາດເພື່ອການພັດທະນາໄອຊີທີໃນລະດັບ ສພຂ, ການຊົມໃຊ້ລະບົບໄອຊີທີໃນປັດຈຸບັນຂອງ ສພຂ, ກະກຽມແຜນການມີສ່ວນຮ່ວມລະຫວ່າງ ສພຊ ກັບ ສພຂ ຕໍ່ກັບວຽກງານພັດທະນາໄອຊີທີ, ໂອກາດ ແລະ ສິ່ງທ້າທາຍຂອງວຽກງານໄອຊີທີໃນປັດຈຸບັນ, ນະວັດຕະກໍາທີ່ມີຄວາມສົນໃຈ ແລະ ສິ່ງທີ່ເປັນໄປໄດ້ໃນການນຳໃຊ້ກັບ ສພຂ ໃນປັດຈຸບັນ, ທາງເລືອກຂອງ ສພຂ ສໍາຫຼັບຍຸດທະສາດດ້ານໄອຊີທີ ແລະ ການປະສານສົມທົບລະຫວ່າງ ສພຂ ກັບ ສພຊ ພ້ອມທັງໃຫ້ຕາງໜ້າແຕ່ລະກຸ່ມຂຶ້້ນນໍາສະເໜີ.

ນອກຈາກນີ້, ຍັງໄດ້ຮັບຟັງການນໍາສະເໜີ ແລະ ແລກປ່ຽນບົດຮຽນຕໍ່ກັບແບບຢ່າງຜົນງານດ້ານນະວັດຕະກໍາ 3 ຫົວຂໍ້: ພາບລວມວຽກງານຈັດຕັ້ງປະຕິບັດດ້ານນະວັດຕະກໍາ, ບົດຮຽນ ແລະ ສິ່ງທ້າທາຍ; ນໍາສະເໜີ ແລະ ແລກປ່ຽນບົດຮຽນຕໍ່ກັບແບບຢ່າງຜົນງານດ້ານນະວັດຕະກໍາ 4 ຫົວຂໍ້: ແຫຼ່ງເກັບກໍາບັນດາຂໍ້ມູນດິຈິຕອນ-ລະບົບ ຈັດການຂໍ້ມູນດິຈິຕອນ (DSpace); ສົນທະນາກ່ຽວກັບບຸລິມະສິດວຽກງານຄົ້ນຄວ້ານະວັດຕະກໍາໃໝ່ໆ ປະຈໍາປີ 2024 ແລະ 2025 ເຊັ່ນ: ຄວາມຕ້ອງການບຸລິມະສິດຕໍ່ກັບນະວັດຕະກໍາໃໝ່ໆເພື່ອຮັບໃຊ້ໃຫ້ແກ່ ສພຂ, ໃນອະ ນາຄົດຈະມີການຜັນຂະຫຍາຍແນວໃດໃນວຽກງານແລກປ່ຽນ ແລະ ແບ່ງປັນບົດຮຽນ ລວມທັງການສ້າງຄວາມ ເຂັ້ມແຂງວຽກງານສື່ສານພາຍໃນ (ຍົກຕົວຢ່າງ: ການນໍາໃຊ້ກຸ່ມສົນທະນາໃນວັອດແອັບ) ແລະ ບາດກ້າວຕໍ່ໜ້າໃນການສ້າງການມີສ່ວນຮ່ວມໃນວຽກງານຫັນເປັນທັນສະໄໝ ແລະ ການພັດທະນາດ້ານໄອທີ ລະຫວ່າງ ສພຂ ກັບ ສພຊ.

(ຂ່າວ ແລະ ພາບ: ສອນສັກ ວັນວິໄຊ)