ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນຕອນເຊົ້າວັນທີ 01 ມິຖຸນາ 2022, ທີ່ຫ້ອງປະຊຸມຊັ້ນ 02 ຫໍວັດທະນະທໍາໄກສອນພົມວິຫານ ແຂວງສະຫວັນນະເຂດ ໄດ້ຈັດກອງປະຊຸມທາບທາມຮ່າງກົດໝາຍ ຈໍານວນ 04 ສະບັບ ທີ່ຈະໄດ້ນໍາເຂົ້າພິຈາລະນາຮັບຮອງເອົາໃນກອງສະໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ເຊິ່ງປະກອບມີ: ຮ່າງກົດໝາຍ ວ່າດ້ວຍຊັບສິນຂອງລັດ (ສະບັບປັບປຸງ), ຮ່າງກົດໝາຍ ວ່າດ້ວຍຄວາມປອດໄພຂອງເຂື່ອນ, ຮ່າງກົດໝາຍ ວ່າດ້ວຍວິຈິດສິນ, ຮ່າງກົດໝາຍ ວ່າດ້ວຍການແກ້ໄຂຄໍາຮ້ອງທຸກ (ສະບັບປັບປຸງ ປີ 2022), ໂດຍການເປັນປະທານຂອງທ່ານ ກ່ອງແກ້ວ ມີວໍລະຈັກ ຮອງເລຂາພັກແຂວງ ປະທານຄະນະສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 13 ມີບັນດາຄະນະປະຈຳສະພາປະຊາຊົນແຂວງ, ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ, ບັນດາອົງການຈັດຕັ້ງມະຫາຊົນ, ພະແນກການອ້ອມຂ້າງແຂວງ, ແລະ ພະນັກງານລັດຖະກອນທີ່ກ່ຽວຂ້ອງເຂົ້າຮ່ວມ.

​ກອງປະຊຸມທາບທາມຮ່າງກົດໝາຍໃນຄັ້ງນີ້, ໄດ້ເປີດໂອກາດໃຫ້ບັນດາທ່ານ​ຜູ້​ແທນ​ກອງ​ປະຊຸມໄດ້ພ້ອມກັນຄົ້ນຄວ້າ, ປະກອບຄຳເຫັນຢ່າງກົງໄປກົງມາ ໂດຍມີການປັບປຸງຕໍ່ເນື້ອໃນຂອງຫຼາຍມາດຕາ ຂອງ​ຮ່າງ​ກົດໝາຍ 4 ສະບັບ ເພື່ອເຮັດໃຫ້ມີຄວາມຄົບຖ້ວນ, ຮັດກຸມ ເພື່ອລາຍງານຕໍ່ສະພາແຫ່ງຊາດ ແລະ ສາມາດນຳເຂົ້າພິຈາລະຮັບຮອງໃນກອງປະຊຸມສະ  ໄໝສາມັນເທື່ອທີ 3 ຂອງສະພາແຫ່ງຊາດ ຊຸດທີ IX ໄດ້ຢ່າງມີປະສິດທິຜົນ.

ກອງປະຊຸມແມ່ນໃຊ້ເວລາ 1 ຄາບເຊິ່ງມີຜູ້ແທນກອງປະຊຸມປະກອບຄໍາເຫັນທັງໝົດ 38 ເທື່ອຄົນ, ຍິງ 6 ເທື່ອຄົນ. ໃນໂອກາດດຽວກັນນີ້ປະທານກອງປະຊຸມກໍ່ໄດ້ຍ້ອງຍໍຊົມເຊີຍຕໍ່ບັນດາທ່ານຜູ້ແທນກອງປະຊຸມທີ່ໄດ້ສຸມສະຕິປັນຍາໃນການຄົ້ນຄວ້າ, ປະກອບຄໍາເຫັນ ໂດຍລົງເລີກກ່ຽວກັບບັນຫາທີ່ພົວພັນກັບຄວາມຮັບຜິດຊອບຂອງຕົນ ເພື່ອເຮັດໃຫ້ເນື້ອໃນຂອງກົດໝາຍ ມີຄວາມສອດຄ່ອງກັບລັດຖະທໍາມະນູນ ຂອງ ສ.ປ.ປ.ລາວ, ຜົນສຳເລັດຂອງກອງປະຊຸມ ທາບທາມຮ່າງກົດໝາຍໃນຄັ້ງນີ້ສະແດງເຖິງຄວາມເປັນເຈົ້າການ ແລະ ຄວາມເອົາໃຈໃສ່ຂອງບັນດາຜູ້ແທນກອງປະຊຸມ, ດັ່ງນັ້ນຈິ່ງເຮັດໃຫ້ກອງປະຊຸມມີຄວາມເປັນເອກະພາບກັນທາງດ້ານທັດສະນະແນວຄິດ ແລະ ປະສົບຜົນສໍາເລັດຕາມລະດັບຄາດໝາຍທີ່ວາງໄວ້.