ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໂດຍປະຕິບັດຕາມຂັ້ນຕອນການສ້າງ ແລະ ປັບປຸງກົດໝາຍ ທີ່ໄດ້ກຳນົດໄວ້ໃນກົດໝາຍວ່າດ້ວຍການສ້າງນິຕິກຳ ສະບັບເລກທີ 06/ສພຊ, ລົງວັນທີ 16 ພະຈິກ 2021 ໂດຍສະເພາະມາດຕາ 56 ການເອົາຮ່າງກົດໝາຍເພື່ອປຶກສາຫາລືກັບປະຊາຊົນ.

ໃນລະຫວ່າງວັນທີ 24-28 ຕຸລາ 2022 ຢູ່ທີ່ ແຂວງຄໍາມ່ວນ ໄດ້ເປີດກອງປະຊຸມທາບທາມຄໍາເຫັນໃສ່ຮ່າງກົດໝາຍ ທີ່ຈະນຳເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນເທື່ອທີ 4 ຂອງສະພາແຫ່ງຊາດ ຊຸດທີ IX ໂດຍການເປັນປະທານຂອງທ່ານ ສົມມາດ ພົລເສນາ ກຳມະການສູນກາງພັກ, ຮອງປະທານສະພາແຫ່ງຊາດ ເປັນກຽດຕ້ອນຮັບເຂົ້າຮ່ວມໂດຍ ທ່ານ ວັນໄຊ ຟອງສະຫວັນ ກຳມະການສູນກາງພັກ ເຈົ້າແຂວງຄໍາມ່ວນ; ທ່ານ ບຸນມີ ພິມມະສອນ ຮອງເລຂາພັກແຂວງ ປະທານສະພາປະຊາຊົນແຂວງຄໍາມ່ວນ,  ພ້ອມດ້ວຍ ທ່ານ ປະທານ, ຮອງປະທານສະພາປະຊາຊົນແຂວງ ສະຫວັນນະເຂດ ແລະ ແຂວງບໍລິຄໍາໄຊ, ມີບັນດາທ່ານ ສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ 3 ແຂວງຄື: ແຂວງຄໍາມ່ວນ, ສະຫັວນນະເຂດ, ແຂວງບໍລິຄໍາໄຊ ແລະ ຜູ້ຕາງໜ້າຈາກກະຊວງ, ອົງການທີ່ກ່ຽວຂ້ອງ ຕະຫຼອດຮອດແຂກທີ່ມີກຽດ ເຂົ້າຮ່ວມ.

ພາຍຫຼັງ ປະທານ ກ່າວເປີດກອງປະຊຸມ ຄະນະຮັບຜິດຊອບສ້າງຮ່າງກົດໝາຍໄດ້ສະເໜີບັນດາກົດໝາຍທີ່ໄດ້ນໍາທາບທາມຄໍາເຫັນຕໍ່ຮ່າງກົດໝາຍຈໍານວນ 12 ສະບັບ ຄື: (1)ຮ່າງກົດໝາຍວ່າດ້ວຍໜັງສືຜ່ານແດນ; (2)ຮ່າງກົດໝາຍວ່າດ້ວຍ ພິພິທະພັນ; (3)ຮ່າງກົດໝາຍວ່າດ້ວຍຄົມມະນາຄົມທາງນໍ້າ; (4)ຮ່າງກົດໝາຍວ່າດ້ວຍທະນາຍຄວາມ; (5)ຮ່າງກົດໝາຍວ່າດ້ວຍທະບຽນສານ; (6)ຮ່າງກົດໝາຍວ່າດ້ວຍວິທະຍາສາດ ແລະ ເຕັກໂນໂລຊີ; (7)ຮ່າງກົດໝາຍວ່າດ້ວຍວິສາຫະກິດ; (8)ຮ່າງກົດໝາຍວ່າດ້ວຍທຸລະກໍາທາງເອເລັກໂຕຣນິກ; (9)ຮ່າງກົດໝາຍວ່າດ້ວຍການກັນ ແລະ ຄວບຄຸມພະຍາດຕິດຕໍ່; (10) ຮ່າງກົດໝາຍວ່າດ້ວຍອົງການໄອຍະການທະຫານ; (11)ຮ່າງກົດໝາຍວ່າດ້ວຍອົງການກວດສອບແຫ່ງລັດ; (12)ຮ່າງກົດໝາຍວ່າດ້ວຍການກວດກາລັດ; ຈາກນັ້ນບັນດາທ່ານ ຜູ້ແທນເຂົ້າຮ່ວມກອງປະຊຸມຈາກ 3 ແຂວງໄດ້ພ້ອມກັນຄົ້ນຄວ້າ ລະດົມແນວຄໍາຄິດ, ຄໍາເຫັນປະກອບໃສ່ຮ່າງກົດໝາຍ ຢ່າງມີຈຸດສຸມເປັນປຶກແຜນໃຫ້ມີຄວາມຄົບຖ້ວນ, ຮັດກຸມ, ສອດຄ່ອງກັບສະພາບຕົວຈິງ ແລະ ຮັບປະກັນເນື້ອໃນກຽມຄວາມພ້ອມກ່ອນນໍາເອົາຮ່າງກົດໝາຍເຂົ້າພິຈາລະນາ ແລະ ຮັບຮອງໃນກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດ ຊຸດທີ IX.

ໃນໂອກາດດັ່ງກ່າວ, ທ່ານ ສົມມາດ ພົລເສນາ ໄດ້ສະແດງຄວາມຍ້ອງຍໍຊົມເຊີຍ ແລະ ໄດ້ຕີລາຄາສູງຕໍ່ກອງປະຊຸມ ເຖິງວ່າກອງປະຊຸມຈະໄດ້ດໍາເນີນເປັນພຽງເວລາ 5 ວັນ ກໍ່ຕາມບັນດາທ່ານສະມາຊິກສະພາແຫ່ງຊາດ ແລະ ສະມາຊິກສະພາປະຊາຊົນແຂວງ ໃນນາມເປັນຕົວແທນ ແລະ ຕາງໜ້າປະຊາຊົນບັນດາເຜົ່າ ໄດ້ເອົາໃຈໃສ່ຄົ້ນຄວ້າ ແລະ ປະກອບຄໍາຄິດເຫັນໃສ່ຮ່າງກົດໝາຍທີ່ໄດ້ນໍາມາທາບທາມ 12 ຈໍານວນ ສະບັບ ທີ່ຈະນຳເຂົ້າພິຈາລະນາ ແລະ ຮັບຮອງເອົາໃນກອງປະຊຸມສະໄໝາສາມັນເທື່ອທີ 4 ຂອງສະພາປະຊາດ ຊຸດທີ IX ທີ່ຈະໄດ້ໄຂຂຶ້ນໃນບໍ່ດົນຕໍ່ໜ້ານີ້.

ກອງປະຊຸມຄັ້ງນີ້ ນຳໃຊ້ງົບປະມານຂອງແຜນງານການມີສ່ວນຮ່ວມຂອງປະຊາຊົນຕໍ່ວຽກງານການປົກຄອງທີ່ດີ ແລະ ການສ້າງລັດທີ່ປົກຄອງດ້ວຍກົດໝາຍ (ແຜນງານເຊກາ CEGGA) ແລະ ມູນນິທິເອເຊຍ (ASIA FOUNDATION) ແລະ ງົບປະມານສົມທົບຈາກຄະນະເລຂາທິການສະພາແຫ່ງຊາດ.

( ອາລີ )