(ສພຊ) ກອງປະຊຸມທາບທາມ ຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນຄະນະບໍລິຫານງານພັກແຂວງໄຊຍະບູລີ ກາງສະໄໝທີ VII ໄດ້ຈັດຂຶ້ນໃນວັນທີ 16 ພຶດສະພາ 2023 ທີ່ຫ້ອງວ່າການປົກຄອງແຂວງໄຊຍະບູລີ ໂດຍການເປັນປະທານຂອງ ສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ; ພ້ອມກັນນັ້ນ, ກໍຍັງມີສະຫາຍ ພົງສະຫວັນ ສິດທະວົງ ກຳມະການສູນກາງພັກ, ເລຂາພັກແຂວງ, ເຈົ້າແຂວງໄຊຍະບູລີ ພ້ອມດ້ວຍບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ກໍາມະການຄະນະບໍລິຫານງານພັກແຂວງ, ພະນັກງານນໍາພາ-ຄຸ້ມຄອງພະແນກການອ້ອມຂ້າງແຂວງ, ເມືອງ, ອົງຄະນະພັກສອງກຳລັງ ປກຊ-ປກສ ແລະ ນາຍບ້ານເຂົ້າຮ່ວມ.

ໃນວາລະດໍາເນີນກອງປະຊຸມ ສະຫາຍ ພົງສະຫວັນ ສິດທະວົງ ໄດ້ກ່າວເປີດກອງປະຊຸມທາບທາມຄວາມໄວ້ວາງໃຈຕໍ່ການນໍາພາລວມ ແລະ ບຸກຄົນ ຄະນະບໍລິຫານງານພັກແຂວງໄຊຍະບູລີ ກາງສະໄໝທີ VII ເຊິ່ງບາງຕອນສະຫາຍໄດ້ກ່າວວ່າ: ໃນທ່າມກາງບັນຍາກາດທີ່ທົ່ວພັກ, ທົ່ວກອງທັບ ແລະ ປວງຊົນລາວທັງຊາດ ເວົ້າລວມ, ເວົ້າສະເພາະ ໃນທົ່ວແຂວງໄຊຍະບູລີ ພວມຕັ້ງໜ້າອອກແຮງແຂ່ງຂັນໃນການຈັດຕັ້ງຜັນຂະຫຍາຍ ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມ 5 ປີ (2021-2025) ຄັ້ງທີ IX, ຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ແລະ ແຜນພັດທະນາເສດຖະກິດ-ສັງຄົມ 5 ປີ ຂອງແຂວງ. ຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ, ຂະບວນການດ້ານຕ່າງໆ. ກອງປະຊຸມທາບທາມຄວາມເຊື່ອໝັ້ນໄວ້ວາງໃຈຕໍ່ການນຳພາລວມ ແລະ ບຸກຄົນຄະນະບໍລິຫານງານພັກແຂວງໄຊຍະບູລີ, ກາງສະໄໝທີ VII ໄດ້ໄຂຂຶ້ນຢ່າງເປັນທາງການ, ເຊິ່ງເນື້ອໃນຕົ້ນຕໍ ຂອງກອງປະຊຸມຄັ້ງນີ້ ຈະໄດ້ເຊື່ອມຊຶມຄຳສັ່ງຂອງຄະນະເລຂາທິການສູນກາງພັກ ເລກທີ 268/ຄລສພ, ລົງວັນທີ 20/1/2023 ວ່າດ້ວຍການດໍາເນີນກອງປະຊຸມຄົບຄະນະກາງສະໄໝ ຂອງຄະນະບໍລິຫານງານພັກແຕ່ລະຂັ້ນ; ມາດຕະຖານຄະນະບໍລິຫານງານພັກແຂວງ; ສິດ ແລະ ໜ້າທີ່ ຂອງຄະນະພັກແຂວງ; ຂໍ້ຫ້າມສໍາລັບສະມາຊິກພັກ ແລະ ມີການທາບທາມລົງຄະແນນສຽງຄວາມໄວ້ວາງໃຈ ການນຳພາລວມ, ບຸກຄົນ ຂອງຄະນະບໍລິຫານງານພັກແຂວງ.

ຫຼັງຈາກນັ້ນ ໄດ້ຮັບຟັງຄໍາເຫັນຊີ້ນໍາຈາກສະຫາຍ ປອ. ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ຜູ້ຊີ້ນໍາແຂວງໄຊຍະບູລີ, ກ່ອນຈະໃຊ້ສິດລົງຄະແນນສຽງໃສ່ບົດທາບທາມຫາງສຽງຄວາມເຊື່ອໝັ້ນໄວ້ວາງໃຈຕໍ່ການນໍາພາລວມ, ບຸກຄົນຄະນະບໍລິຫານງານພັກແຂວງໄຊຍະບູລີ ກາງສະໄໝທີ VII ກອງປະຊຸມຄັ້ງນີ້ ມີຄວາມໝາຍຄວາມສໍາຄັນ ເຊິ່ງເປັນການຕີລາຄາທົບທວນຄືນ ໝາກຜົນຂອງການນໍາພາລວມ ແລະ ບຸກຄົນຄະນະບໍລິຫານງານພັກແຂວງ ໃນໄລຍະສອງປີເຄິ່ງຜ່ານມາ ໂດຍເລັ່ງໃສ່ຍົກສູງຄວາມສາມາດນຳພາ ແລະ ລັກສະນະນໍາໜ້າ ຂອງຄະນະພັກທຸກຂັ້ນ. ສິ່ງສຳຄັນກໍເພື່ອກວດກາຄວາມຮັບຜິດຊອບການເມືອງ ຂອງບັນດາສະຫາຍໃນຄະນະບໍລິຫານງານພັກແຂວງ ຕໍ່ການນຳພາລວມ ແລະ ຄວາມຮັບຜິດຊອບຂອງບຸກຄົນໃນຄະນະພັກຕາມການແບ່ງງານ, ແບ່ງຄວາມຮັບຜິດຊອບ ເຊິ່ງຊອກໃຫ້ເຫັນດ້ານຕັ້ງໜ້າ ທີ່ຈະເສີມຂະຫຍາຍ ແລະ ເຫັນໄດ້ດ້ານອ່ອນ, ຂໍ້ຄົງຄ້າງ ທີ່ຈະຕ້ອງໄດ້ປັບປຸງແກ້ໄຂ ໃຫ້ມີການຫັນປ່ຽນທີ່ຕັ້ງໜ້າ. ເພາະນັ້ນແມ່ນສິ່ງສະແດງໃຫ້ເຫັນເຖິງຄວາມອາດສາມາດ ໃນການນໍາພາຂອງບັນດາສະຫາຍ ເພາະຖ້າຫາກ “ບ່ອນໃດມີພັກນໍາພາ ປະຊາຊົນບ່ອນນັ້ນ ຈະຕ້ອງຫຼຸດພົ້ນອອກຈາກຄວາມທຸກຍາກ”.