ຕອນແລງ, ບ່າຍໂມງຂອງວັນທີ 24 ຕຸລາ 2022 ນີ້, ທ່ານ ປອ ລີເປີ ລີບົວປາວ ກໍາມະການສູນກາງພັກ, ຄະນະປະຈໍາ, ປະທານກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ພ້ອມດ້ວຍທີມງານ ໄດ້ເຄື່ອນໄຫວເຮັດວຽກຢູ່ແຂວງໄຊສົມບູນ ( ທີ່ຫ້ອງປະຊຸມພູເບ້ຍ ຕຶກຫ້ອງວ່າການແຂວງ ) ໂດຍການຕ້ອນຮັບຂອງ ທ່ານ ແດງ ປະທຸມທອງ ຮອງເລຂາພັກແຂວງ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 18, ປະທານສະພາປະຊາຊົນແຂວງໄຊສົມບູນ ພ້ອມດ້ວຍຄະນະ ແລະ ໃຫ້ກຽດເຂົ້າຮ່ວມຂອງ ທ່ານ ພອຍຄໍາ ຮຸ່ງບຸນຍວງ ເລຂາພັກແຂວງ, ເຈົ້າແຂວງໄຊສົມບູນ ພ້ອມດ້ວຍຄະນະພັກ-ຄະນະນໍາ ຕະຫຼອດຮອດບັນດາ ທ່ານ ຫົວໜ້າ, ຮອງຫົວໜ້າພະແນກ, ອົງການ, ກົມກອງ ອ້ອມຂ້າງແຂວງໄຊສົມບູນ ເຂົ້າຮ່ວມຢ່າງພ້ອມພຽງ.

ໃນໂອກາດດັ່ງກ່າວນີ້, ທ່ານ ແດງ ປະທຸມທອງ ປະທານສະພາປະຊາຊົນແຂວງໄຊສົມບູນ ໄດ້ກ່າວຈຸດປະສົງໃຫ້ຮູ້ວ່າ: ຈຸດປະສົງ ກອງປະຊຸມໃນຄັ້ງນີ້ແມ່ນ ການລົງເຄື່ອນໄຫວວຽກງານຂອງ ຄະນະປະຈໍາສະພາແຫ່ງຊາດ ທີ່ໄດ້ລົງຕິດຕາມ-ກວດກາ 6 ເດືອນ ທ້າຍປີ 2022 ຂອງກໍາມາທິການແຜນການ, ການເງິນ ແລະ ການກວດສອບ ສະພາແຫ່ງຊາດ ທີ່ແຂວງໄຊສົມບູນ ຂັ້ນທ້ອງຖິ່ນນີ້ ບັນດາພະແນກການທີ່ກ່ຽວຂ້ອງ ຂຶ້ນລາຍງານ, ອະທິບາຍ ແລະ ຊີ້ແຈງ ຕໍ່ໍຄໍາຊັກຖາມ ຂອງ ສະມາຊິກສະພາແຫ່ງຊາດ ເພື່ອສາມາດຮັບຮູ້ ແລະ ເຂົ້າໃຈ ເກັບກໍາຂໍ້ມູນດັ່ງກ່າວນີ້ ຈະເປັນບ່ອນອີງທີ່ມີຄວາມໝາຍຄວາມສໍາຄັນ ແລ້ວລາຍງານຕໍ່ ຄະນະປະຈໍາສະພາແຫ່ງຊາດ;

ພ້ອມດຽວກັນນີ້, ທີ່ປະຊຸມໄດ້ຮັບຟັງການລາຍງານ ສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ທີ່ຕິດພັນກັບງົບປະມານ 6 ເດືອນທ້າຍປີ 2022 ຂອງແຂວງໂດຍຫຍໍ້ ຈາກທ່ານ ພອຍຄໍາ ຮຸ່ງບຸນຍວງ ເຈົ້າແຂວງໄຊສົມບູນ ໂດຍທ່ານ ໄດ້ໃຫ້ຮູ້ເຖິງການຈັດຕັ້ງປະຕິບັດແຜນພັດທະນເສດຖະກິດ-ສັງຄົມ ປີ 2022 ແລະ ແຜນງົບປະມານ-ການເງິນ ທີ່ຕິດພັນກັບ ດໍາລັດ 414/ລບ ແຜນງົບປະມານ 6 ເດືອນທ້າຍ ປີ 2022 ເຊິ່ງສະແດງໃຫ້ເຫັນ ຄວາມຫຍຸ້ງຍາກທາງດ້ານເສດຖະກິດ-ການເງິນ, ອັດຕາເງິນເຟີ້, ນໍ້າມັນແພງ, ລາຄາສິ້ນຄ້າ-ການບໍລິການຖີບຕົວສູງຂຶ້ນ ແລະ ການແຜ່ລະບາດ ຂອງພະຍາດໂຄວິດ-19, ສ່ວນ ໂຄງການລົງທຶນຂອງລັດ ຫຼາຍໂຄງການໄດ້ດໍາເນີນໄປຕາມແຜນ ແລະ ມີຜົນສໍາເລັດດີສົມຄວນ, ສະເພາະ ປີ 2022 ແຂວງໄຊສົມບູນໄດ້ຮັບທຶນອະນຸມັດ ໂຄງການທັງໝົດ 162,61 ຕື້ກີບ ໃນຈໍານວນ 183 ໂຄງການ; ສໍາລັບການຈັດຕັ້ງປະຕິບັດ 2 ວາລະແຫ່ງຊາດ ອົງຄະນະພັກ, ອົງການປົກຄອງແຂວງຂອງພວກເຮົາ ກໍໄດ້ເອົາໃຈໃສ່ນໍາພາ-ຊີ້ນໍາ ຜັນຂະຫຍາຍການຈັດຕັ້ງປະຕິບັດຢ່າງແຂງແຮງ ແລະ ມີຜົນສໍາເລັດດີພໍສົມຄວນ.

ຮັບຟັງການລາຍງານ ແລະ ການຕອບຄໍາຖາມເຈາະຈີ້ມ ທີ່ສະພາປະຊາຊົນໄດ້ມີຄໍາຊັກຖາມຕໍ່ ພະແນກແຜນການ ແລະ ການລົງທຶນແຂວງ ໂດຍຫຍໍ້ຈາກ ທ່ານ ພູພັດ ສິງທາວົງໄຊ ຮັກສາການຫົວໜ້າພະແນກແຜນການ ແລະການລົງທຶນແຂວງໄຊສົມບູນ ໄດ້ໃຫ້ຮູ້ຜົນສໍາເລັດຂອງແຜນພັດທະນາເສດຖະກິດ-ສັງຄົມ 6 ເດືອນ ທ້າຍປີ 2022;

ຮັບຟັງການລາຍງານໂດຍຫຍໍ້ ແລະ ການຕອບຄໍາຊັກຖາມ ແບບເຈາະຈີ້ມ 6 ເດືອນທ້າຍ ປີ 2022 ຈາກທ່ານ ປອ ທອງປະເສີດ ໄຊຍະລາດ ຫົວໜ້າພະແນກການເງິນແຂວງໄຊສົມບູນ.

ພາຍຫຼັງ ຮັບຟັງການລາຍງານ ຫຼື ຕອບຄໍາຖາມເຈາະຈີ້ມ ຈາກບັນດາທ່ານ ທີ່ດັ່ງກ່າວມາຂ້າງເທິງ ສໍາເລັດແລ້ວ ທ່ານ ລີເປີ ລີບົວປາວ ປະທານກອງປະຊຸມ ໄດ້ມີຄໍາເຫັນຕໍ່ກອງປະຊຸມວ່າ: ເພື່ອປະຕິບັດຕາມສິດ, ພາລະບົດບາດ ຂອງການເຄື່ອນໄຫວວຽກງານຂອງ ອົງການຈັດຕັ້ງ ຫຼື ພະແນກການໃດໜຶ່ງ ທີ່ເຄື່ອນໄຫວວຽກງານຂອງຕົນນັ້ນແມ່ນ ຕ້ອງເຄື່ອນໄຫວໃຫ້ຖືກຕ້ອງຕາມສິດ, ພາລະບົດບາດ ແລະ ປະຕິບັດຈັດຕັ້ງ ໃຫ້ຖືກຕ້ອງຕາລະບຽບການ ແລະ ກົດໝາຍ ທີ່ພັກ-ລັດ ວາງອອກຢ່າງເຂັ້ມງວດ ໃຫ້ເໝາະສົມຕາມສະພາບຄວາມເປັນຈິງ.

(ນາງ ອໍາໄພພອນ ແກ້ວວິໄລ)