ໃນວັນທີ 2 ພຶດສະພາ 2023 ໄດ້ເປີດກອງປະຊູມການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍ ຂົງເຂດຍຸຕິທຳ 4 ສະບັບຢູ່ທີ່ຫ້ອງປະຊຸມຂອງສະພາປະຊາຊົນແຂວງຊຽງຂວາງ ພາຍໃຕ້ການເປັນປະທານຮ່ວມຂອງທ່ານ ຄຳແພງ ວິລະພັນ ກຳມະການຄະນະປະຈຳ, ປະທານກຳມາທິການຍຸຕິທຳສະພາແຫ່ງຊາດ ແລະ ທ່ານ ວຽງໄຊ ສີວິໄລ ກຳມະການພັກແຂວງ, ຮອງປະທານສະພາປະຊາຊົນແຂວງ ແລະ ເປັນກຽດເຂົ້າຮ່ວມຂອງທ່ານ ນ. ບົວສີ ນາຖາວົງ ຄະປະຈຳພັກແຂວງ, ປະທານແນວລາວສ້າງຊາດ ມີບັນດາທ່ານປະທານ-ຮອງປະທານບັນດາຄະນະກຳມະການຂອງສະພາປະຊາຊົນແຂວງ, ຫົວໜ້າ-ຮອງຫົວໜ້າພະແນກການທີ່ກ່ຽວຂ້ອງຂອງແຂວງ, ອົງການຈັດຕັ້ງມະຫາຊົນ ພ້ອມດ້ວຍທີມງານຈາກສະພາແຫ່ງຊາດ ແລະ ພະນັກງານຂອງສະພາປະຊາຊົນແຂວງເຂົ້າຮ່ວມ. 

ກອງປະຊຸມໄດ້ຮັບຟັງການລາຍງານການປະເມີນຜົນ ການຈັດຕັ້ງປະຕິບັດກົດໝາຍ 4 ສະບັບ ຄື: ກົດໝາຍວ່າດ້ວຍ ສານປະຊາຊົນ, ກົດໝາຍວ່າດ້ວຍ ການດຳເນີນຄະດີແພ່ງ, ກົດໝາຍວ່າດ້ວຍ ອົງການໄອຍະການປະຊາຊົນ ແລະ ກົດໝາຍວ່າດ້ວຍ ການດຳເນີນຄະດີອາຍາ ຈາກຕາງໜ້າ ສານປະຊາຊົນແຂວງ ແລະ ອົງການໄອຍະການປະຊາຊົນແຂວງ ເຊິ່ງໃນໄລຍະຜ່ານມາ ສາມາດປະຕິບັດໄດ້ດີໃນຫຼາຍດ້ານ ໃນການປະຕິບັດໜ້າທີ່ວຽກງານ, ການຄົ້ນຄວ້າ, ແກ້ໄຂຕໍ່ກັບບັນຫາຕ່າງໆທີ່ເກີດຂຶ້ນຢູ່ພາຍໃນແຂວງ, ໄດ້ເອົາໃຈໃສ່ຜັນຂະຫຍາຍບັນດາເນື້ອໃນມາດຕາຂອງກົດໝາຍ ອອກເປັນນິຕິກຳໃຕ້ກົດໝາຍ ພ້ອມທັງລົງໂຄສະນາເຜີຍແຜ່ໃຫ້ທົ່ວເຖິງທ້ອງຖິ່ນ ແລະ ຮາກຖານ ຄຽງຄູ່ກັບດ້ານດີຍັງມີດ້ານຄົງຄ້າງທີ່ຍັງຈະຕ້ອງປັບປຸງແກ້ໄຂ ເພື່ອເຮັດໃຫ້ການປະຕິບັດໜ້າທີ່ວຽກງານມີບາດກ້າວໄໝທີ່ດີຂຶ້ນ ເຊິ່ງບັນດາຜູ້ແທນເຂົ້າຮ່ວມກອງປະຊຸມ ໄດ້ຍົກຂຶ້ນມາແລກປ່ຽນໃນບາງມາດຕາຂອງກົດໝາຍທີ່ເຫັນວ່າຍັງບໍ່ສອດຄອງ, ບັນຫາທີ່ຫຍຸ້ງຍາກໃນການຈັດຕັ້ງປະຕິບັດໃນໄລຍະຜ່ານມາ ເພື່ອເປັນຂໍ້ມູນໃນການປັບປຸງ, ສ້າງກົດໝາຍໃນຕໍ່ໜ້າ ໃຫ້ເແທດເໝາະ, ຖືກຕ້ອງສອດຄອງກັບສະພາບຕົວຈິງໃນປັດຈຸບັນ. ໃນຕອນທ້າຍຄະນະປະທານກອງປະຊຸມ ຍັງໄດ້ມີຄຳເຫັນໂອ້ລົມ ແລະ ສັງລວມບັນດາຄວາມຄິດເຫັນຂອງຜູ້ແທນກອງປະຊຸມເພື່ອນຳໄປຄົ້ນຄວ້າ ເພື່ຶອປັບປຸງແກ້ໄຂໃນຕໍ່ໜ້າ.

ສະພາປະຊາຊົນແຂວງຊຽງຂວາງ

ບຸນສີ ສິດທິເດດ 020 99 77 7890