ສະພາແຫ່ງຊາດ ແຫ່ງ ສປປ ລາວ

The National Assembly of the LAO PDR

ໃນວັນທີ 20 ເມສາ 2022  ທີ່ຫ້ອງປະຊຸມຂອງສະພາປະຊາຊົນແຂວງ ໄດ້ຈັດກອງປະຊຸມບັ້ນດຳເນີນຊີວິດການເມືອງທ້າຍສະໄໝ ແລະ ທາບທາມໂຄງປະກອບບຸກຄະລາກອນພັກຮາກຖານ ສະພາປະຊາຊົນແຂວງ ໂດຍການເປັນປະທານຂອງສະຫາຍ ສັນຕິພາບ ພົມວິຫານ ກຳມະການສູນກາງພັກ ເລຂາພັກແຂວງ, ສະຫາຍ ກົງແກ້ວ ມີວໍລະຈັກ ຮອງເລຂາພັກແຂວງ ເລຂາຄະນະພັກຮາກຖານ, ປະທານສະພາປະຊາຊົນແຂວງ, ມີຄະນະຈັດຕັ້ງແຂວງ, ກວດກາພັກແຂວງ ພ້ອມທັງສະມາຊິກພັກພາຍໃນຮາກຖານພັກສະພາປະຊາຊົນແຂວງ ແລະແຂກທີ່ຖືກເຊີນເຂົ້າຮ່ວມ.

ໃນພິທີ ສະຫາຍ ຄຳຜັນ ຄູນສະຫວັນ ກຳມະການຄະນະປະຈຳພັກແຂວງ, ຮອງເລຂາພັກຮາກຖານ, ຮອງປະທານສະພາປະຊາຊົນແຂວງ ໄດ້ຂຶ້້ນຜ່ານ ບົດສຳຫຼວດການນຳພາ-ຊີ້ນຳຂອງຄະນະພັກຮາກຖານສະພາປະຊາຊົນແຂວງ ເຊິ່ງຕະຫຼອດໄລຍະ 05 ປີຜ່ານມາ ( 2017ຫາ 2021 ) ໄດ້ຍົກໃຫ້ເຫັນຜົນງານທີ່ພົ້ນເດັ່ນດັ່ງນີ້: ຮາກຖານພັກສະພາປະຊາຊົນແຂວງປະກອບມີ 04 ໜ່ວຍພັກຂຶ້ນກັບ, ມີສະມາຊິກພັກທັງໝົດ 37 ສະຫາຍ, ຍິງ 11 ສະຫາຍ. ເຊິ່ງໃນຕະຫຼອດໄລຍະຜ່ານມາ, ຄະນະພັກທຸກຂັ້ນ ໄດ້ເອົາໃຈໃສຊີ້ນຳ-ນຳພາໃນແຕ່ລະດ້ານດັ່ງນີ້: ດ້ານການເມືອງ, ແນວຄິດ, ດ້ານການຈັດຕັ້ງປະຕິບັດໜ້າທີ່ການເມືອງ, ດ້ານຊີ້ນຳ -ນຳພາອົງການຈັດຕັ້ງລັດ ແລະ ອົງການຈັດຕັ້ງມະຫາຊົນ, ວຽກງານກໍ່ສ້າງພັກພະນັກງານ ແລະ ບາງບົດຮຽນທີ່ຖອດຖອນໄດ້, ເຊິ່ງເຫັນວ່າບັນດາສະຫາຍສະມາຊິກພັກໄດ້ເປັນແບບຢ່າງ ແລະ ມີຄວາມຫ້າວຫັນຕໍ່ໜ້າທີ່ວຽກງານທີ່ໄດ້ຮັບມອບໝາຍຢ່າງມີຜົນສຳເລັດ.

ກອງປະຊຸມຄັ້ງນີ້,ບັນດາສະຫາຍຜູ້ແທນສົມບູນທີ່ເຂົ້າຮ່ວມ ຍັງໄດ້ເຊື່ອມຊຶມມະຕິ  030/ກມສພ ລົງວັນທີ 03 ມັງກອນ 2018 ວ່າດ້ວຍມາດຖານຂອງພະນັກງານນໍາພາຄຸ້ມຄອງ ຈາກນັ້ນ ບັນດາສະຫາຍຜູ້ແທນສົມບູນທີ່ເຂົ້າຮ່ວມຍັງໄດ້ໃຊ້ສິດປະຊາທິປະໄຕຂອງຕົນທາບທາມໂຄງປະກອບຄະນະພັກຮາກຖານ ຮອບທີ1 ແລະ ຮອບທີ 2 ເພື່ອກະກຽມກອງປະຊຸມໃຫ່ຍຂັ້ນຮາກຖານທີ່ຈະມາເຖິງນີ້.

ໂອກາດດັ່ງກ່າວ, ສະຫາຍ ສັນຕິພາບ ພົມວິຫານ ກໍ່ໄດ້ມີຄຳເຫັນ, ໂອ້ລົມ ແລະ ໃຫ້ທິດຊີ້ນຳ ກໍ່ຄືບັນດາສະຫາຍ ສະມາຊິກພັກ ເພື່ອພ້ອມກັນຊີ້ນຳ-ນຳພາວຽກງານ ກໍ່ຄືການສ້າງພັກ-ພະນັກງານ ໃຫ້ມີຜົນສຳເລັດ, ເອົາໃຈໃສ່ສ້າງຄວາມສາມັກຄີ, ຄວາມເປັນເອກະພາບ,ເຮັດວຽກງານແບບລວມສູນປະຊາທິປະໄຕ,ແບ່ງຄວາມຮັບຜິດຊອບໃຫ້ລະອຽດ ເພື່ອໃຫ້ວຽກງານທຸກຢ່າງເດີນໜ້າຢ່າງມີຜົນສຳເລັດຕາມລະດັບຄາດໝາຍໃຫ້ມີຜົນສຳເລັດຕໍ່ໄປ.